ថ្នាក់ដឹកនាំកម្ពុជាចាត់ទុកការស្លាប់របស់លោក លី ខឺឈាំង គឺជាការបាត់បង់ធនធានមនុស្សដ៏សំខាន់របស់ចិន

ភ្លាមៗក្រោយទទួលបានដំណឹងមរណភាពរបស់លោក លី ខឺឈាំង អតីតនាយករដ្ឋមន្ត្រីចិន សម្ដេចតេជោ ហ៊ុន សែន អតីតនាយករដ្ឋមន្រ្តី នៅថ្ងៃទី១៧ ខែតុលា បានផ្ញើសាររំលែកទុក្ខជូនប្រធានាធិបតីចិនលោក ស៊ី ជិនពីង ចំពោះមរណភាពដ៏ក្រៀមក្រំនេះ។ សម្តេចតេជោ បានចាត់ទុកការស្លាប់របស់លោក លី ខឺឈាំង គឺជាការបាត់បង់ធនធានមនុស្សដ៏សំខាន់មួយរូបរបស់ប្រជាជន និងបក្សកុម្មុយនីសចិន។

ប្រធានគណបក្សប្រជាជនកម្ពុជារូបនេះ បានចាត់ទុកលោក លី គឺជាមិត្តដ៏ល្អរបស់កម្ពុជា ហើយប្រជាជនកម្ពុជានឹងចងចាំជានិច្ចនូវការរួមចំណែកដ៏មានតម្លៃរបស់លោក ចំពោះទំនាក់ទំនងមិត្តភាពដ៏ជិតស្និទ្ធរវាងប្រជាជាតិ និងប្រជាជននៃប្រទេសទាំងពីរ ដែលត្រូវបានគូសបញ្ជាក់ ដោយទំនាក់ទំនងនយោបាយដ៏រឹងមាំរវាងគណបក្សទាំងពីរ។

ជាមួយគ្នានេះ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ក៏បានផ្ញើសារចូលរួមរំលែកទុក្ខជូនប្រធានាធិបតីចិនលោក ស៊ី ជិនពីង និងក្រុមគ្រួសាររបស់លោក លី ខឺឈាំង ចំពោះមរណភាពនេះផងដែរ។ សម្រាប់សម្ដេច ហ៊ុន ម៉ាណែត ការទទួលមរណភាពនេះ ជាការបាត់បង់ឥស្សរជននយោបាយដ៏លេចធ្លោបំផុតមួយក្នុងប្រវត្តិសាស្ត្រនៃសាធារណរដ្ឋប្រជាមានិតចិន ដែលបានចូលរួមដោយផ្ទាល់ ដើម្បីជួយរួមចំណែករក្សាស្ថិរភាព និងអភិវឌ្ឍន៍សង្គម និងសេដ្ឋកិច្ចចិនឱ្យមានការរីកចម្រើនដូចសព្វថ្ងៃ។

មិនខុសពីសម្តេចតេជោ ហ៊ុន សែន នោះទេ សម្តេចធិបតីបានចាត់ទុកលោក លី ខឺឈាំង គឺជាមិត្តរបស់កម្ពុជា ហើយនៅក្នុងអំឡុងលោកកាន់តំណែងជានាយករដ្ឋមន្ត្រីលោក លី បានបំពេញទស្សនកិច្ចផ្លូវការនៅកម្ពុជាចំនួនពីរដងគឺនៅឆ្នាំ២០១៨ និង ២០២២។

លោក លី ខឺឈាំង បានរួមចំណែកយ៉ាងសំខាន់ក្នុងការជួយអភិវឌ្ឍន៍សង្គម និងសេដ្ឋកិច្ចកម្ពុជាស្ទើរគ្រប់វិស័យ រាប់ចាប់តាំងពីវិស័យហេដ្ឋារចនាសម្ព័ន្ធ កសិកម្ម ថាមពល និងសុខភាពរហូតដល់ការប្រែប្រួលអាកាសធាតុ បច្ចេកវិទ្យាទំនៀមទម្លាប់ ឱសថបុរាណ និងការអប់រំជាដើម។ សម្តេចធិបតីបានរំលឹកថា ពេលលោក លី នៅមានជីវិតលោកបានដើរតួនាទីយ៉ាងសកម្មក្នុងការចូលរួមជាមួយមេដឹកនាំអាស៊ានក្នុងអំឡុងពេលកិច្ចប្រជុំអាស៊ាន-ចិន និងអាស៊ានបូកបី។

សូមបញ្ជាក់ថា ឯកឧត្តម លី ខឺឈាង អតីតនាយករដ្ឋមន្ត្រីចិន បានទទួលមរណភាព កាលពីយប់រំលងអាធ្រាត្រថ្ងៃទី២៦ ឈានចូលថ្ងៃទី២៧ ខែតុលា ឆ្នាំ២០២៣ ក្នុងវ័យ៦៨ឆ្នាំ ដោយសារគាំងបេះដូងនៅទីក្រុងសៀងហៃប្រទេសចិន៕

អត្ថបទ៖ បូ ដូឡា