ឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជាបានអះអាងប្រាប់ខេមបូណូមីសថា ការនាំចេញអង្កររបស់កម្ពុជាមិនទាន់បង្ហាញសញ្ញាវិជ្ជមាន នៃការកើនឡើងនៅឡើយទេ។ បើទោះបីជា នៅក្នុងខែកក្កដា ឆ្នាំ២០២១ ការនាំចេញអង្កររបស់កម្ពុជាសម្រេចបានជិត៣ម៉ឺនតោន គិតជាប្រាក់ជាង២១លានដុល្លារអាមេរិក កើនឡើងជាង៣% បើធៀបនឹងខែកក្កដា ឆ្នាំ២០២០ ក៏ដោយចុះ ប៉ុន្ដែ ឧកញ៉ា សុង សារ៉ន នៅតែចាត់ទុកថាវានៅតែជាកំណើនមួយតិចតួចនៅឡើយ ដ្បិតថា កម្ពុជាត្រូវការនាំចេញអង្ករឲ្យបានពី ៥ម៉ឺនទៅ ៦ម៉ឺនតោនក្នុង១ខែ ទើបអាចសម្រេចផែនការនៅឆ្នាំនេះ។
មូលហេតុដែលធ្វើឲ្យការនាំចេញអង្កររបស់កម្ពុជានៅតែបង្ហាញភាពអវិជ្ជមាន ត្រូវបានអ្នកជំនាញក្នុងវិស័យស្រូវអង្ករខាងលើគូសបញ្ជាក់ថា គឺដោយសារតម្លៃដឹកជញ្ជូនឡើងថ្លៃ និងកង្វះទូកុងតឺន័រ ដែលវាគឺជាបញ្ហាចាក់ស្រេះមិនទាន់មានដំណោះស្រាយ ដែលកំពុងចោទជាបញ្ហាសម្រាប់វិស័យដឹកជញ្ជូនរបស់កម្ពុជា ក៏ដូចជាប្រទេសផ្សេងៗទៀតនៅក្នុងតំបន់។
យ៉ាងណាក៏ដោយចុះ នៅតែមានក្ដីរំពឹងថា ការនាំចេញអង្កររបស់កម្ពុជា នឹងអាចវិលមករកភាពល្អប្រសើរឡើងវិញនៅអំឡុងខែតុលា ខាងមុខនេះ ប្រសិនបើស្ថានភាពការរាតត្បាតនៃជំងឺកូវីដ-១៩ លើពិភពលោកមានភាពល្អប្រសើរឡើងវិញ គួបផ្សំបញ្ហាតម្លៃដឹកជញ្ជូនឡើងថ្លៃ និងកង្វះទូកុងតឺន័រ ត្រូវបានដោះស្រាយ។
អត្ថបទទាក់ទង
សូមបញ្ជាក់ថា បើតាមអ្នកជំនាញខាងវិស័យស្រូវអង្ករ និងផ្នែកដឹកជញ្ជូន ធ្លាប់បានអះអាងប្រាប់ខេមបូណូមីសថា តម្លៃដឹកជញ្ជូនតាមកប៉ាល់ពិសេសទៅតំបន់អឺរ៉ុប គឺមានការកើនឡើងខ្ពស់កប់ពពក ដល់ទៅ៦ ទៅ៧ដង នៃតម្លៃធ្លាប់មានពីមុន ពោលគឺតម្លៃកប៉ាល់ដឹកទំនិញមួយទូរកុងត័រ គឺមានតម្លៃស្ទើរតែថ្លៃជាងអង្ករមួយទូ ដឹកទៅអាមេរិក និងអឺរ៉ុបទៅហើយ។
ប្រធានសហព័ន្ធស្រូវអង្ករកម្ពុជា ឧកញ៉ា សុង សារ៉ន បានវាយតម្លៃថា បញ្ហាតម្លៃដឹកជញ្ជូនឡើងថ្លៃនេះ គឺអាចបណ្តាលមកពីក្រុមហ៊ុនអន្តរជាតិរកស៊ីលើវិស័យដឹកជញ្ជូនដំឡើងថ្លៃ និងការផ្អាកដំណើរការកំពង់ផែអន្តរជាតិនៅប្រទេសធំៗមួយចំនួនដោយសារការរាតត្បាតនៃជំងឺកូវីដ-១៩ ដែលធ្វើឲ្យកប៉ាល់ដឹកជញ្ជូនទំនិញត្រូវបានកកស្ទះនៅតាមកំពង់ផែមួយចំនួន ជាពិសេសនៅប្រទេសប៉ែកអឺរ៉ុប។ ទន្ទឹមនឹងនេះ ឧកញ៉ា សុង សារ៉ន ស្នើសុំឲ្យក្រុមហ៊ុនដឹកជញ្ជូនអន្តរជាតិជួយបន្ធូរបន្ថយលើតម្លៃដឹកជញ្ជូន និងកុំដំឡើងថ្លៃខ្ពស់ខ្លាំងពេក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
