អ្នកដំណើរដែលមកពីប្រទេស និង ដែនដី ទាំង ៤៦ នោះ គឺជាអ្នកដែលមកពីប្រទេសមានហានិភ័យទាប ហើយភាគច្រើនមកពី តំបន់អឺរ៉ុប ទ្វីបអាមេរិក តំបន់មជ្ឈឹមបូព៌ា និង តំបន់អាស៊ី ក្នុងនោះរួមមានប្រទេសកម្ពុជាផងដែរ។ ទន្ទឹមនេះ ប្រទេសដែលនៅតំបន់អាហ្វ្រិកពុំមានឈ្មោះក្នុងបញ្ជីធ្វើដំណើររបស់ថៃនោះឡើយ។ នេះបើយោងតាមចុះផ្សាយរបស់សារព័ត៌មានបាងកកប៉ុស្ដិ៍។
អ្នកដំណើរដែលមកពីប្រទេសទាំង ៤៦ នោះ ដែលថៃនឹងបើកឲ្យចូលចាប់ពីថ្ងៃទី១ ខែវិច្ឆិកាតទៅនេះ គឺមិនចាំបាច់ធ្វើចត្តាឡីស័កឡើយ ប៉ុន្តែពួកគេត្រូវតែគោរពតាមលក្ខខណ្ឌដែលបានកំណត់តាមវិធានសុខាភិបាល។ តើលក្ខខណ្ឌនោះមានអ្វីខ្លះ? លក្ខខណ្ឌទី១. ដាច់ខាចត្រូវតែជាអ្នកដំណើរតាមផ្លូវអាកាស។ លក្ខខណ្ឌទី២. ត្រូវតែជាអ្នកបានចាក់វ៉ាក់សាំងរួចរាល់។ លក្ខខណ្ឌទី៣. ត្រូវតែបង្ហាញលទ្ធផលតេស្តអវិជ្ជមានមុនពេលហោះហើរ។ លក្ខខណ្ឌទី៤. ត្រូវធ្វើតេស្តម្ដងទៀតពេលមកដល់ប្រទេសថៃ។ លក្ខខណ្ឌទី៥. ត្រូវមានការធានារ៉ាប់រងសុខភាពយ៉ាងតិច ៥ ម៉ឺនដុល្លារ ។
លោក ប្រាយុទ្ធ ចាន់អូចា បានលើកឡើងដោយសង្កត់ធ្ងន់ថា រដ្ឋាភិបាលចាំបាច់ណាស់ត្រូវតែពន្លឿនការបើកប្រទេសឡើងវិញ។ ប្រសិនបើរង់ចាំរហូតដល់អ្វីៗល្អប្រសើរទាំងស្រុង នោះថៃនឹងយឺតពេលហើយ។ ក្រៅពីនេះ ភ្ញៀវទេសចរអាចនឹងជ្រើសរើសទៅកន្លែងផ្សេងសម្រាប់ដំណើរកម្សាន្ដរបស់ពូកគេផងដែរ។
អត្ថបទទាក់ទង!
លោកនាយករដ្ឋមន្ត្រីថៃ បានបន្ថែមថា ការពន្លឿនល្បឿននៃការបើកទទួលអ្នកដំណើរបរទេសអាចនាំមកនូវហានិភ័យនៃការឆ្លងក្នុងស្រុកកាន់តែខ្ពស់ ប៉ុន្តែនេះ ជាអ្វីដែលរដ្ឋាភិបាលត្រូវតែធ្វើ។ ក្នុងន័យនេះ គឺរដ្ឋាភិបាលថៃ ត្រូវយកដៃម្ខាងបើកទ្វារឲ្យភ្ញៀវទេសចរចូល តែដៃម្ខាងក៏ត្រូវទប់ស្កាត់យ៉ាងណាកុំឲ្យមានករណីឆ្លងរីករាលដាលក្នុងស្រុក។ បើតាមនាយករដ្ឋមន្ត្រីថៃ អះអាងថា ដោយសារប្រទេសថៃមានឧបករណ៍ល្អៗជាងមុន ដើម្បីដោះស្រាយហានិភ័យ ដូចនេះយើងត្រូវរៀនរស់នៅជាមួយវា។
ទន្ទឹមនេះ ក្រសួងសុខាភិបាលសាធារណៈថៃនឹងពន្លឿនការចាក់វ៉ាក់សាំងនៅតាមមូលដ្ឋាន ហើយជំរុញឲ្យប្រជាពលរដ្ឋប្រកាន់ខ្ជាប់នូវវិធានការសុខភាពប្រឆាំងកូវីដ១៩ ដែលបានកំណត់ដោយ ពាក់ម៉ាស់ លាងដៃឲ្យបានញឹកញាប់ និងរក្សាគម្លាតសង្គម។
សូមជ្រាបថា គិតត្រឹមថ្ងៃទី ២១ តុលា អ្នកឆ្លងថ្មីក្នុងប្រទេសថៃមានចំនួនជិត ១ ម៉ឺននាក់ និងអ្នកស្លាប់ថ្មីមាន ៧៣នាក់ ដែលធ្វើឱ្យករណីឆ្លងសរុបកើនឡើងជាង ១លាន ៨សែននាក់ ខណៈអ្នកស្លាប់សរុបប្រមាណ ១ម៉ឺន ៨ពាន់នាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
