ចិនបញ្ចេញកម្ចីធនាគារច្រើនបំផុតមិនធ្លាប់មានក្នុងឆ្នាំ២០២៣ ប៉ុន្តែសេដ្ឋកិច្ចនៅតែជួបការលំបាក

បើតាមទិន្នន័យដែលចេញផ្សាយដោយធនាគារកណ្ដាលចិន (PBOC) កាលពីថ្ងៃសុក្រ សប្ដាហ៍មុនបានបង្ហាញថា បណ្ដាធនាគារនៃប្រទេសចិន ដែលមានសេដ្ឋកិច្ចធំបំផុតទី២ របស់ពិភពលោកបានផ្ដល់ប្រាក់កម្ចីថ្មីៗជាង១៦៣ពាន់លានដុល្លារ កាលពីខែធ្នូ គឺច្រើនជាងខែវិច្ឆិកា ប៉ុន្តែវានៅតែទាបជាងការរំពឹងទុករបស់ក្រុមអ្នកវិភាគ។

ការស្ទង់មតិរបស់ទីភ្នាក់ងារព័ត៌មានដ៏ធំមួយបានបង្ហាញថា ក្រុមអ្នកវិភាគបានព្យាករថា ប្រាក់កម្ចីថ្មីៗនឹងកើនឡើងដល់ជាង១៩៥ពាន់លានដុល្លារ កាលពីខែធ្នូ ឆ្នាំ២០២៣ ដោយកើនឡើងច្រើនជាងកាលពីខែវិច្ឆិកា ដែលមានចំនួនជាង១៥១ពាន់លានដុល្លារ។ សម្រាប់ឆ្នាំ២០២៣ ការផ្តល់កម្ចីធនាគារថ្មីៗបានកើនឡើងដល់កម្រិតខ្ពស់បំផុតមិនធ្លាប់មានឈានដល់ជាង៣ទ្រីលានដុល្លារ ដែលស្មើនឹងទំហំផលិតផលក្នុងស្រុកសរុប​​ (GDP) របស់អង់គ្លេសទាំងមូល និងបានកើនឡើង៦,៨% បើធៀបនឹងឆ្នាំ២០២២ ដែលមានចំនួនជិត៣ទ្រីលានដុល្លារ។

ទោះជាយ៉ាងណា សេដ្ឋកិច្ចចិន នៅតែជួបការលំបាកក្នុងការស្ទុះងើបឡើងវិញក្រោយវិបត្តិកូវីដ-១៩។ ទំនុកចិត្តរបស់អ្នកប្រើប្រាស់ និងអាជីវកម្មនៅតែមានភាពទន់ខ្សោយ ហើយបណ្ដារដ្ឋបាលមូលដ្ឋានកំពុងពុះពារងើបចេញពីបំណុលដ៏ច្រើន ខណៈវិបត្តិអចលនទ្រព្យដែលអូសបន្លាយពេលកំពុងជះផលប៉ះពាល់ខ្លាំងលើការសាងសង់ និងការវិនិយោគ។

ស្របពេលតម្រូវការចុះខ្សោយ សេដ្ឋកិច្ចចិន ក៏កំពុងប្រឈមមុខនឹងសម្ពាធបរិត្តផរណាដែលបន្តឈានចូលដល់ឆ្នាំ២០២៤ ផងដែរ ខណៈដែលមានការរំពឹងទុកថា នឹងមានវិធានការបន្ធូរបន្ថយគោលនយោបាយបន្ថែមទៀត ដើម្បីជំរុញកំណើនសេដ្ឋកិច្ច។

លោក ចុង លាំង (Zong Liang) ប្រធានផ្នែកស្រាវជ្រាវនៅធនាគាររដ្ឋចិន Bank of China បាននិយាយថា គោលនយោបាយរូបិយវត្ថុនឹងត្រូវបានបន្ធូរបន្ថយ នៅពេលណាធនាគារប្រឈមមុខនឹងសម្ពាធបរិត្តផរណា ហើយថា អត្រាការប្រាក់គួរត្រូវបានបញ្ចុះឱ្យទាបថែមទៀត៕

អត្ថបទ៖ សុខ ជា