ក្នុងនោះដែរ ទីក្រុងសៀងហៃ គឺជាចំណុចក្ដៅបំផុត នៃការឆ្លងរីកដាលកូវីដ១៩នៅប្រទេសចិន ដោយករណីឆ្លងនៅក្នុងទីក្រុងនេះគឺមានដល់ទៅ ៨០% នៃករណីឆ្លងថ្មីសរុបនៅទូទាំងប្រទេសចិន។ ទោះបីជា ករណីឆ្លងនៅថ្ងៃពុធនេះ មានក្នុងចំនួនច្រើនក្ដី ប៉ុន្ដែ មិនមានការរាយការណ៍អំពីករណីស្លាប់ដោយសារកូវីដ១៩នោះទេ។ នេះបើតាមការរាយការណ៍ដោយសារព័ត៌មានបាងកកប៉ុស្ដិ៍។
យុទ្ធសាស្ត្រ "គ្មានកូវីដ" ឬ (Zero Covid) របស់ប្រទេសចិន បានស្ថិតក្រោមភាពតានតឹងយ៉ាងសម្បើម នៅពេលដែលមានករណីឆ្លងកូវីដ-១៩ កើនឡើងកាន់តែច្រើនឡើងៗនៅក្នុងទីក្រុងសៀងហៃ បើទោះបីជាទីក្រុងនេះ កំពុងស្ថិតក្រោមការបិទខ្ទប់ក្ដី។ គិតត្រឹមខែមីនាកន្លងទៅនេះ ប្រទេសចិនបានរក្សាករណីឆ្លងប្រចាំថ្ងៃទាប ជាមួយនឹងការបិទខ្ទប់តាមផ្នែកខ្លះ ការធ្វើតេស្តទ្រង់ទ្រាយធំ និងការរឹតបន្តឹងយ៉ាងតឹងរ៉ឹងលើការធ្វើដំណើរអន្តរជាតិផងដែរ។ ប៉ុន្តែករណីឆ្លងបានរីករាលដាលដល់រាប់ពាន់នាក់ក្នុងមួយថ្ងៃក្នុងប៉ុន្មានសប្តាហ៍ថ្មីៗនេះ ដោយក្នុងនោះ កូវីដ-១៩ អូមីក្រុង កំពុងអុកឡុកខ្លាំងមែនទែននៅតំបន់ជិតៗទីក្រុងសៀងហៃ។
យ៉ាងណាមិញ គណៈកម្មាធិការសុខភាពជាតិបាននិយាយនៅក្នុងសេចក្តីថ្លែងការណ៍មួយថា ប្រទេសចិនបានកត់ត្រាការឆ្លងចំនួនជាង ២ម៉ឺនករណី នៅពីថ្ងៃពុធនេះ ប៉ុន្ដែមិនមានករណីស្លាប់ថ្មីនោះទេ។
អត្ថបទគួរអាន
ទោះបីជាយ៉ាងណាក៏ដោយ កន្លែងដាក់ឲ្យធ្វើចត្តាឡីស័កនៅទីក្រុងសៀងហៃ កំពុងដាក់មនុស្សកាន់តែច្រើន បន្ទាប់ពីពួកគេធ្វើតេស្តវិជ្ជមានកូវីឌ១៩ ខណៈដែលវិធានការតឹងរ៉ឹងនៅតែបន្ដអនុវត្ត។
សូមបញ្ជាក់ថា ទីក្រុងសៀងហៃ ជាទីក្រុងដ៏ធំបំផុតរបស់ប្រទេសចិន ហើយក្នុងចំណោមករណីឆ្លងថ្មីសរុបនៅថ្ងៃពុធនេះ គឺមាន៨០% ទៅហើយ គឺបានរកឃើញនៅក្នុងទីក្រុងនេះ។ ទីក្រុង សៀងហៃ ដែលមានប្រជាជនចំនួនជាង២៥លាននាក់ ត្រូវបានស្ថិតនៅក្រោមការបិទខ្ទប់ តាមរយៈវិធានការតឹងរ៉ឹងរបស់អាជ្ញាធរ ដែលបណ្តាលឲ្យពលរដ្ឋមានការភ័យស្លន់ស្លោ ហើយអាជ្ញាធរក៏បានប្រកាសធ្វើតេស្តកូវីដ១៩ទ្រង់ទ្រង់ធំក្នុងទីក្រុងសៀងហៃផងដែរ។
បច្ចុប្បន្ន ប្រជាជនក្នុងទីក្រុងកំពុងមានការខឹងសម្បារនឹងវិធានការបិទខ្ទប់ ដោយសារតែពួកគេកំពុងខ្វះខាតស្បៀងអាហារ ដោយសរតែការបិទខ្ទប់បន្ដអូសបន្លាយ ហើយតាមការរាយការណ៍ពីសារព័ត៌មានចិន CCTV ទីក្រុងសៀងហៃ នឹងរៀបចំឲ្យមានការធ្វើតេស្ដទ្រង់ទ្រាយធំថ្មីមួយទៀត ទៅលើប្រជាជនទាំងនៅក្នុងទីក្រុងនេះផងដែរ៕
អត្ថបទ៖ ម៉ុន សុកែវ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
