ក្រុមហ៊ុនអ្នកវិភាគដែលត្រូវបានស្រង់សម្ដីដោយសារព័ត៌មានរ៉យទ័របានឲ្យដឹងថា ការអត្ថាធិប្បាយរបស់លោក ស៊ីជីន ពីងប្រធានាធិបតីចិនកាលពីថ្ងៃសុក្រសប្ដាហ៍មុន ដោយបានអំពាវនាវបង្កើនពន្ធលើអចលនទ្រព្យ ក៏បានធ្វើឲ្យប៉ះពាល់ទៅដល់សតិអារម្មណ៍វិនិយោគិនផ្សារភាគហ៊ុនផងដែរ ខណៈដែលវិនិយោគិនទាំងនេះ ក៏មានការព្រួយបារម្ភលើការវិនិយោគរួចទៅហើយដែរ តាំងពីតម្លៃប្រេងបាននិងកំពុងបន្ដឡើងថ្លៃកាន់តែខ្លាំងនោះ។
នៅថ្ងៃបើកជួញដូរនៅថ្ងៃចន្ទដើមសប្ដាហ៍នេះ តម្លៃទីផ្សារភាគហ៊ុន Chinese Blue Chips របស់ចិន បានធ្លាក់ចុះ១,៥៥% និងសន្ទស្សន៍ផ្សារភាគហ៊ុននៅហុងកុងវិញ ធ្លាក់ចុះ ០,៥៤%។
សន្ទស្សន៍ផ្សារភាគហ៊ុនតំបន់ ក៏មានការដាំក្បាលចុះដែរ ដោយសារតែផ្សារភាគហ៊ុនចិនធ្លាក់ចុះនេះ។ តួយ៉ាង ផ្សារភាគហ៊ុន MSCI នៅតំបន់អាស៊ីប៉ាស៊ីហ្វិក ក្រៅពីប្រទេសជប៉ុន ក៏បានធ្លាក់ចុះ ០,៣៤% ដែរ ខណៈផ្សារភាគហ៊ុនជប៉ុនធ្លាក់ចុះ ០,១៥%។ ជាមួយគ្នា ផ្សារភាគហ៊ុនអាមេរិក S&P500 ក៏បានធ្លាក់ចុះ ០,៣%ផងដែរ។អត្ថបទគួរអាន
បញ្ហាតម្លៃប្រេងថ្មីៗនេះ បានហក់កើនឡើងកាន់តែខ្លាំង នៅចំពេលដែលពិភពលោកកំពុងមានបញ្ហាកង្វះថាមពលប្រើប្រាស់។ ជាក់ស្ដែង តម្លៃប្រេងឆៅនៅអាមេរិកបានឡើងថ្លៃដល់កម្រិតខ្ពស់បំផុតក្នុងរយៈពេល៧ឆ្នាំកន្លងមកនេះ ហើយនៅតម្លៃប្រេងនៅអង់គ្លេសវិញក៏កើនថ្លៃខ្ពស់បំផុតគិតក្នុងរយៈពេល៣ឆ្នាំកន្លងមកនេះផងដែរ។
នៅត្រីមាសទី៣ ឆ្នាំ២០២១ ផលិតផលក្នុងស្រុកសរុបរបស់ចិន មានកំណើនត្រឹមតែ ៤,៩% ប៉ុណ្ណោះ ធៀបនឹងត្រីមាសទី៣ឆ្នាំ២០២០ ដោយសារតែប្រទេសមហាអំណាចសេដ្ឋកិច្ចពិភពលោកធំបំផុតទី២នេះ កំពុងជួបបញ្ហាកង្វះខាតថាមពល ការផ្គត់ផ្គង់រួមតូច,ការឆ្លងរីករាលដាលកូវីដ១៩ និងបញ្ហាបំណុលនៅក្នុងវិស័យអចលនទ្រព្យជាដើម។
អ្នកសេដ្ឋកិច្ចខ្លះនិយាយថា តួលេខនៃការដើរយឺតនៃសេដ្ឋកិច្ចចិននៅត្រីមាសទី៤ អាចនឹងមានកាន់តែយ៉ាប់យ៉ឺនជាងត្រីមាសទី៣ទៅទៀត ដោយសារតែនឹងត្រូវរងនូវផលប៉ះពាល់កាន់តែខ្លាំងដែលបង្កឡើងដោយបញ្ហកង្វះថាមពលនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
