ចិនលែងសូវអួតបង្ហាញពីទិវាទិញទំនិញ Single’s Day នៅឆ្នាំនេះ ក្រោយក្រុមហ៊ុនលក់ទំនិញអនឡាញធំៗមួយចំនួនរងការបង្ក្រាបពីរដ្ឋ

គេនៅចាំបានថាក្នុងកម្មវិធី​ទិញទំនិញ​ធំបំផុតប្រចាំឆ្នាំ​ Single’s Day កាលពីឆ្នាំមុនៗ គេឃើញក្រុមហ៊ុន Alibaba តែងតែ​អួតបង្ហាញពីតួលេខ​នៃការលក់ដ៏សម្បើម​ ដែលកើនឡើងជារៀងរាល់ម៉ោង។ ប៉ុន្ដែ នៅឆ្នាំនេះវិញ ក្រុមហ៊ុនអាលីបាបា មិនបានបង្ហាញតួលេខការលក់​ដូចមុននោះទេ។ ខណៈកាលពីឆ្នាំមុន ក្រុមហ៊ុន Alibaba និងដៃគូប្រកួតប្រជែងធំបំផុតរបស់ខ្លួនគឺ JD.com បានរាយការណ៍ថា ការលក់​រួមគ្នា​របស់​​​ក្រុមហ៊ុនទាំងពីរ​ទទួល​ចំនួន ១១៥ ពាន់លានដុល្លារឯណោះ។

គួរកត់សម្គាល់ផងដែរថា ក្នុងកំឡុងពេលទិញទំនិញនៅថ្ងៃ Single’s Day នេះដែរ គេមិនទាន់ឃើញមានការលើកឡើង ឬការអត្ថាធិប្បាយដោយនាយកប្រតិបត្តិពីក្រុមហ៊ុនធំៗទាំងនោះទេ។ មិនតែប៉ុណ្ណោះប្រព័ន្ធផ្សព្វផ្សាយរដ្ឋចិនក៏មានភាពស្ងប់ស្ងាត់ផងដែរ ក្នុងការផ្សព្វផ្សាយនៅក្នុងនៅឆ្នាំនេះ បន្ទាប់ពីរដ្ឋាភិបាលទីក្រុងប៉េកាំង បាន​បង្ក្រាប​ទៅលើ​ក្រុមហ៊ុន​បច្ចេកវិទ្យាយក្សៗជាបន្តបន្ទាប់ ដូចជា ក្រុមហ៊ុន អាលីបាបា និង​ Tencent ជាដើម ។

យ៉ាងណាក៏ដោយចុះ រដ្ឋាភិបាលទីក្រុងប៉េកាំងក៏បានចេញគោលការណ៍ណែនាំពិសេស និងបានហាមឃាត់យ៉ាងតឹងរ៉ឹងដល់ក្រុមហ៊ុនទាំងនោះ កុំឱ្យមានការបំភាន់ លើការបញ្ចុះតម្លៃ ឬលើប្រសិទ្ធភាពនៃផលិតផល ការរៀបចំតួលេខលក់ និងការលក់ផលិតផលក្លែងក្លាយ៕

អត្ថបទ ស៊ើង​ និមល់