តើមានកត្តាអ្វីខ្លះជំរុញឱ្យការធ្វើពាណិជ្ជកម្មរបស់ចិននៅដើមឆ្នាំនេះ សម្រេចបានលើសការព្យាករ?

កំណើនការនាំចេញ និងនាំចូលរបស់ចិន នៅពីរខែ ដើមឆ្នាំនេះ បានឈានដល់កម្រិតលើសការព្យាករពីមុន ស្របពេលដែលអ្នកវិភាគវាយតម្លៃថា ពាណិជ្ជកម្មពិភពលោកបច្ចុប្បន្នកំពុងស្ថិតនៅក្នុងភាពស្រពេចស្រពិល។ ទិន្នន័យពីអាជ្ញាធរគយចិន បានបង្ហាញកាលពីពេលថ្មីៗថា ការនាំចេញទំនិញរបស់ចិននៅពីរខែ ដើមឆ្នាំនេះ សម្រេចបានជាង៧% ខ្ពស់ជាងឆ្នាំមុន រីឯការនាំចូលវិញ គឺមានកំណើនប្រមាណ៣,៥ %។ លទ្ធផលនេះ គឺលើសពីអ្វីដែលគេបានរំពឹងទុក ដោយក្នុងនោះការនាំចេញរំពឹងកើនឡើងជិត២% រីឯការនាំចូលកើន១,៥%។

កំណើននៃការនាំចេញរបស់ចិន ចាប់ផ្តើមមានល្បឿនតាំងពីអំឡុងខែធ្នូ ឆ្នាំមុន ដែលត្រូវបានជំរុញដោយការស្ទុះងើបឡើងវិញនៃតម្រូវការរបស់អតិថិជននៅក្រៅប្រទេសលើផលិតផលគ្រឿងអេឡិចត្រូនិក និងគ្រឿងបង្គុំសៀឃ្វីអគ្គីសនី។ ទីភ្នាក់ងារគយចិន បានចេញផ្សាយទិន្នន័យពាណិជ្ជកម្មខែមករា និងកុម្ភៈ រួមបញ្ចូលគ្នា ដោយសារតែកាលពីខែកុម្ភៈ ចិនបានឈប់សម្រាកច្រើន ហើយជាទូទៅសន្ទុះពាណិជ្ជកម្មនៅក្នុងអំឡុងពេលឈប់សម្រាកបុណ្យចូលឆ្នាំប្រពៃណីចិននេះ គឺច្រើនថមថយខ្លាំង។

នាយករដ្ឋមន្ត្រីចិន លោក លី ឈាង ( Li Qiang) កាលពីថ្ងៃអង្គារបានប្រកាសពីគោលដៅជំរុញកំណើនសេដ្ឋកិច្ចឆ្នាំ២០២៤ ដ៏មានមហិច្ឆតាក្នុងរង្វង់៥% ហើយបានសន្យាថា នឹងផ្លាស់ប្តូរគំរូអភិវឌ្ឍន៍របស់ប្រទេស ដែលពឹងផ្អែកខ្លាំងលើការនាំចេញទំនិញ ដែលជាផលិតផលសម្រេច និងឧស្សាហកម្មអេឡិចត្រូនិក៕

ដោយ: សរ សុជាតិ