កិច្ចសហការជាយុទ្ធសាស្ត្ររវាង ធនាគារ មេយប៊ែង និង ក្រុមហ៊ុន អេចអេច អូតូ ប្រេស្ទីហ្ស៍ ឯ.ក គឺជាកិច្ចសហការលើសពីកិច្ចព្រមព្រៀងផ្នែងហិរញ្ញវត្ថុ និងបានឆ្លុះបញ្ចាំងពីការគាំទ្រយ៉ាងមោះមុត របស់ភាគីទាំងពីរចំពោះការអភិវឌ្ឍប្រកបដោយចីរភាពតាមរយៈហិរញ្ញប្បទានបៃតង។ ចំណុចស្នូលនៃភាពកិច្ចសហការជាដៃគូនេះផងដែរ គឺជាការផ្តល់ជូនជាពិសេសនូវអត្រាការប្រាក់ដែលមានអត្រាទាបជាងកម្ចីរថយន្តដទៃ ០,៥% ដែលជាការផ្តល់ជូនសម្រាប់កម្ចីរថយន្ត EV AION ពីធនាគារ មេយប៊ែងក្នុងអំឡុងពេលកម្មវិធីប្រូម៉ូសិន។ អត្រាពិសេសនេះ បានរួមចំណែកធ្វើឲ្យ
រថយន្តនេះកាន់តែមានភាពទាក់ទាញ និងមានតម្លៃកាន់តែសមរម្យជាងរថយន្តប្រើប្រាស់សាំង និងម៉ាស៊ូតធម្មតា ។ ភាពជាដៃគូនេះក៏មានគោលបំណងជំរុញឲ្យមានការគាំទ្រកាន់តែទូលំទូលាយនូវយានយន្ត ដែលផ្តល់ការប៉ះពាល់ទាបដល់បរិស្ថាននៅក្នុងប្រទេសកម្ពុជា។
AION គឺជាម៉ាករថយន្ត EV ដ៏ថ្មីស្រឡាងមួយ ស្របតាមស្តង់ដារពិភពលោក ដែលបំពាក់ដោយបច្ចេកវិទ្យា ផលិតភាពថាមពល និងបច្ចេកទេសក្នុងរថយន្តបែបទំនើប និងឆ្លាតវៃ ខណៈចូលរួមលើកកម្ពស់ដល់ការអភិវឌ្ឍប្រកបដោយចីរភាព។ សមាសធាតុសំខាន់នៃរថយន្តអគ្គិសនីនេះ គឺជាអាគុយ Magazine ដ៏ច្នៃប្រឌិតរបស់ខ្លួន ដែលត្រូវបានរចនា និងផលិតផ្តាច់មុខឡើងដោយ ក្រុមហ៊ុន GAC។ អាគុយដ៏ទំនើបនេះ ត្រូវបានបង្កើតដោយធាតុផ្សំគីមី ផូស្វាតដែកលីចូម (Lithium Iron Phosphate) និងមានភាពធន់ខ្លាំងទៅនឹងសីតុណ្ហភាពខ្ពស់ ដែលការពាររថយន្តពីការងាយរងផ្ទុះឆេះ។ បច្ចេកវិទ្យានេះត្រូវបានធ្វើតេស្តយ៉ាងម៉ត់ចត់និងត្រឹមត្រូវ ដែលរួមមានការធ្វើតេស្តដោយបាញ់គ្រាប់កាំភ្លើង ហើយជាលទ្ធផលនៃការធ្វើតេស្តជាច្រើនសារមិនបានបង្ហាញនូវសញ្ញារងគ្រោះនៃការផ្ទុះឬឆេះឡើយ ដែលនេះបានបង្ហាញពីប្រព័ន្ធសុវត្ថិភាពដ៏គួរឲ្យកត់សម្គាល់របស់អាគុយរថយន្តនេះ។
រីឯរថយន្ត EV ម៉ូឌែល AION Y Plus មានការប្រើប្រាស់បច្ចេកវិទ្យាអាគុយ Magazine ស្តង់ដារ២.០ ដែលរឹតតែធានាបាននូវកម្រិតសុវត្ថិភាពដែលមិនអាចប្រៀបផ្ទឹមបាន។ បច្ចេកវិទ្យានានារួមមាន ប្រព័ន្ធពន្លត់អគ្គីភ័យដោយស្វ័យប្រវត្តិ ប្រព័ន្ធរំសាយកំដៅកម្រិតខ្ពស់ និងមានការរចនាសម្ព័ន្ធអាគុយដែលមានស្ថិរភាពខ្ពស់បំផុត។ ទំនើបភាពទាំងនេះបានឆ្លុះបញ្ចាំងពីការប្តេជ្ញាចិត្តពីរថយន្តអគ្គិសនីម៉ូឌែល AION Y Plus ចំពោះសុវត្ថិភាព និងទំនុកចិត្ត។
រថយន្តទំនើបEVនេះ ត្រូវបានដាក់តាំងបង្ហាញជាផ្លូវការតែមួយគត់ និងអាចរកទិញបាននៅសាលតាំងបង្ហាញរថយន្ត AION Cambodia។
លោក រ័ត្ន សោភ័ណ្ឌ នាយកប្រតិបត្តិ និងនាយកប្រចាំប្រទេសនៃធនាគារ មេយប៊ែង កម្ពុជា បានមានប្រសាសន៍ថា “នៅធនាគារ មេយប៊ែង យើងមានការគាំពារខ្ពស់ដល់និរន្តរភាព។ ទស្សនវិស័យ និងផែនការយុទ្ទសាស្រ្តរបស់យើងក្នុងការផ្តល់ហិរញ្ញប្បទានរថយន្តអគ្គិសនីគឺជាការគាំទ្ររបស់យើងយ៉ាងពេញទំហឹងក្នុងការឆ្ពោះទៅកាន់អនាគតពណ៌បៃតង។ អនុស្សារណៈនៃការយោគយល់គ្នាមួយនេះ ជាការបង្ហាញនូវការគាំទ្ររបស់យើងការផ្តល់ហិរញ្ញប្បទានប្រកបដោយចីរភាព ខណៈតែមួយដែលស្ថាប័នរបស់យើងនឹងបន្តបង្កើនលទ្ធភាពដើម្បីភាពជោគជ័យកាន់តែត្រចះត្រចង់ក្នុងការបន្តផ្តល់ហិរញ្ញប្បទានដែលប្រកបដោយការទទួលខុសត្រូវខ្ពស់។
លោកបានបន្តថា "តាមរយៈការផ្តល់ហិរញ្ញប្បទានឥណទានរថយន្តប្រភេទអគ្គិសនីនេះ យើងក៏មានបំណងក្នុងការរួមចំណែកយ៉ាងសំខាន់ទៅលើផែនការយុទ្ធសាស្រ្តរបស់រដ្ឋាភិបាលកម្ពុជា ក្នុងការជំរុញ កំណើនការប្រើប្រាស់យានយន្តអគ្គីសនីនៅកម្ពុជា និងឈានទៅសម្រេចឲ្យបាននូវការប្រើប្រាស់រថយន្តអគ្គិសនីក្នុងអត្រា ៤០% និងទោចក្រយានយន្ត(ម៉ូតូ)អគ្គិសនីក្នុងអត្រា៧០% ក្នុងឆ្នាំ២០៥០។ គំនិតផ្តួចផ្តើមមួយនេះ គឺជាយុទ្ធសាស្ត្រដែលស្របទៅតាមចក្ខុវិស័យរបស់ធនាគារយើងផងដែរ ដើម្បីលើកកម្ពស់កំណើនសេដ្ឋកិច្ចប្រកបដោយ
ចីរភាព។”
អំឡុងពេលនៃកម្មវិធីចុះហត្ថលេខានេះ លោក ម៉េង ហេង អគ្គនាយកក្រុមហ៊ុន អេចអេច អូតូ ប្រេស្ទីហ្ស៍ ឯ.ក ដែលជាក្រុមហ៊ុននាំចូលផ្តាច់មុខរថយន្តម៉ាក AION ក៏បានលើកឡើងផងដែរថា៖ “ការប្តេជ្ញាចិត្តរបស់យើង ដើម្បីលើកកម្ពស់ចីរភាព នេះត្រូវបានឆ្លុះបញ្ចាំងតាមរយៈភាពជាដៃគូរបស់យើងជាមួយក្រុមហ៊ុន AION។ ការនាំចូលនូវរថយន្តអគ្គិសនីនៅកម្ពុជា ជាការបង្ហាញពីនិន្នាការផ្លាស់ប្តូរនៅក្នុងវិស័យយានយន្ត ហើយយើងពិតជារំភើបដែលមានកិតិ្តយសក្នុងការត្រួសត្រាយផ្លូវសម្រាប់និន្នាការនេះ”។
បន្ថែមពីលើការបង្ហាញជម្រើសរថយន្តថ្មីរបស់ក្រុមហ៊ុន អេចអេច អូតូ ប្រេស្ទីហ្ស៍ ឯ.ក ក្រុមហ៊ុនផ្តល់ជូននូវអតិថិជនក្នុងលទ្ធភាពក្នុងការលក់បន្តយានយន្តក្នុងតម្លៃដ៏សមរម្យផងដែរ។ អតិថិជនដែលទិញរថយន្ត AION EV Car ចាប់ពីថ្ងៃនេះរហូតដល់ដំណាច់ខែមីនា ឆ្នាំ ២០២៤ នឹងទទួលបានអត្រាការប្រាក់ទាបជាងរថយន្តដទៃ ០,៥% និងប្រាក់កម្ចីរហូតដល់ ៧០% ពីធនាគារ មេយប៊ែង។
