លោកជំទាវ មិថុនា ភូថង អភិបាលខេត្តកោះកុងបានគូសបញ្ជាក់កាលពីពេលកន្លងមកថា អាកាសយានដ្ឋានអន្តរជាតិតារាសាគរដំណាក់កាលទី១នៅខេត្តកោះកុង នឹងមិនមានការពន្យារពេលក្នុងការដាក់ឲ្យដំណើរការទៀតនោះទេ ពោលគឺព្រលានយន្តហោះនេះនឹងបើកឲ្យហោះហើរសាកល្បងនៅពាក់កណ្តាលឆ្នាំ២០២៣ នេះ។ ការអះអាងបែបនេះ ធ្វើឡើងក្រោយព្រលានយន្តហោះនេះត្រូវបានពន្យារក្នុងការបើកឲ្យហោះហើរសាកល្បងជាបន្តបន្ទាប់ ដោយសារការឆ្លងរាតត្បាតនៃជំងឺកូវីដ-១៩ គួបផ្សំក្រុមហ៊ុនអភិវឌ្ឍន៍ជួបបញ្ហាលំហូរសាច់ប្រាក់។ ទោះយ៉ាងណា គម្រោងបើកឲ្យហោះហើរសាកល្បងនេះនៅមិនទាន់ប្រាកដប្រជា ១០០%នោះទេ។
យ៉ាងណាក៏ដោយចុះ លោក សន សៀប ប្រធានសមាគមអ្នកវាយតម្លៃ និងភ្នាក់ងារអចនវត្ថុកម្ពុជាជឿជាក់ថា ប្រសិនបើព្រលានយន្តហោះនេះពិតជាបើកដំណើរការដូចការគ្រោងទុកមែននេះ វានឹងជួយឲ្យធ្វើឲ្យតំបន់តារាសាគរកាន់តែមានភាពទាក់ទាញមួយកម្រិតទៀត សម្រាប់វិនិយោគិនជាតិ និងអន្តរជាតិក្នុងការសម្លឹងឱកាសវិនិយោគនៅតំបន់នោះ។ ជាពិសេស វានឹងជួយជំរុញឲ្យតម្លៃអចលនទ្រព្យ និងការអភិវឌ្ឍនៅតំបន់នោះមានការកើនឡើងបន្ថែមទៀត។ ការជឿជាក់បែបនេះ ក៏ដោយសារអ្នកជំនាញរូបនេះ មើលឃើញពីថា ការបើកឲ្យហោះហើរសាកល្បងនេះ វានឹងជួយជំរុញកំណើនភ្ញៀវទេសចរ និងវិនិយោគិនបរទេសទៅកម្សាន្ត និងសម្លឹងឱកាសវិនិយោគនៅតំបន់នោះឲ្យមានការកើនឡើង។
អត្ថបទគួរអាន
ទន្ទឹមនឹងមើលឃើញពីការជំរុញកំណើនអភិវឌ្ឍរបស់គម្រោងព្រលានយន្ដហោះតារាសាគរ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា ក៏បានបង្ហាញពីក្ដីកង្វល់មួយចំនួនជុំវិញការអភិវឌ្ឍហេដ្ឋារចនានៅក្នុងខេត្តកោះកុង ដែលអាចទាក់ទាញភ្ញៀវទេសចរ និងអ្នកវិនិយោគឲ្យទៅកម្សាន្ត និងសម្លឹងឱកាសវិនិយោគនៅទីនោះ។
ជុំវិញគម្រោងបើកដំណើរព្រលានយន្តហោះអន្តរជាតិតារាសាគរដំណាក់កាលទី១នេះ ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានគូសបញ្ជាក់ប្រាប់ខេមបូណូមីសថា គម្រោងបើកព្រលានយន្តហោះតារាសាគរឲ្យហោះហើរសាកល្បងនៅពាក់កណ្តាលឆ្នាំនេះទំនងជាអាចមានការពន្យារពេលបន្ថែមទៀត។ ប៉ុន្ដែ ឯកឧត្តមមិនបានផ្តល់ហេតុផលលម្អិតជុំវិញបញ្ហានេះនោះទេ។
គួរបញ្ជាក់ថា អាកាសយានដ្ឋានអន្តរជាតិតារាសាគរដំណាក់កាលទី១អភិវឌ្ឍន៍លើផ្ទៃដី២១៨ហិកតា និងមានដីបម្រុងសម្រាប់ការអភិវឌ្ឍន៍បន្តចំនួន១ពាន់ហិកតា ដោយគ្រោងចំណាយថវិកាប្រមាណ២រយលានដុល្លារ ដែលជាការវិនិយោគគាំទ្រវិស័យទេសចរណ៍។ តាមផែនការអភិវឌ្ឍន៍រយៈពេលខ្លី និងមធ្យម ព្រលានយន្តហោះនេះរំពឹង ទទួលបានអ្នកដំណើរ៧លាននាក់ និងទំនិញ១ម៉ឺនតោនក្នុង១ឆ្នាំចាប់ពីឆ្នាំ២០២១-២០៣០ និងបន្តកើនឡើងអ្នកដំណើរ២០លាននាក់ និងទំនិញ៦ម៉ឺនតោនក្នុង១ឆ្នាំចាប់ពីឆ្នាំ២០៣០-២០៥០៕
