ទោះបីការឆ្លងរាតត្បាតនៃជំងឺកូវីដ-១៩ សកល បានធ្វើឲ្យមានការរាំងស្ទះមួយចំនួនដល់វិស័យដឹកជញ្ជូនក៏ពិតមែន តែវាមិនបានធ្វើឲ្យប៉ះពាល់ធ្ងន់ធ្ងរដល់ការនាំចេញទំនិញពីកម្ពុជាទៅកាន់ទីផ្សារអន្តរជាតិនោះទេ ពោលគឺការនាំចេញលើមុខទំនិញមួយចំនួននៅតែរក្សាកំណើនគួរឲ្យកត់សម្គាល់។ ជាក់ស្តែង ទិន្នន័យពីអគ្គនាយកដ្ឋានគយ និងរដ្ឋាករបង្ហាញថា ការនាំចេញទំនិញវិនិយោគមិនមែនកាត់ដេរនៅ៩ខែក្នុងឆ្នាំ២០២១ សម្រេចបានជាង ៣ពាន់៣រយលានដុល្លារអាមេរិក មានការកើនឡើងជាង ១ពាន់១រយលានដុល្លារអាមេរិក ឬស្មើនឹងជិត ៥០% បើធៀបនឹងរយៈពេលដូចគ្នាកាលពីឆ្នាំ២០២០។ ផលិតផលវិនិយោគមិនមែនកាត់ដេររួមមាន កង់ គ្រឿងបំណែកអេឡិចត្រូនិក បង្គុំខ្សែភ្លើង គ្រឿងបន្លាស់រថយន្ត អំពូលភ្លើង ឈើប្រណិត ផលិតផលប្លាស្ទិក ស្បែកសត្វកែច្នៃ និងផលិតផលផ្សេងៗទៀត។
ពាក់ព័ន្ធបញ្ហានេះដែរ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា បានលើកឡើងថា កត្តាដែលធ្វើឲ្យការនាំចេញរបស់កម្ពុជាមានការកើនឡើង គឺដោយសារកម្ពុជាមានទំនាក់ទំនងល្អជាមួយប្រទេសជាដៃគូ គួបផ្សំអ្នកផលិត និងអ្នកផ្គត់ផ្គង់នៅកម្ពុជាមានទំនាក់ទំនងល្អជាមួយអ្នកបញ្ជាទិញ។ មួយវិញទៀត ដោយសារផលិតផល ដែលផលិតនៅកម្ពុជាមានតម្រូវការកើនឡើងខ្ពស់ពីប្រទេសបញ្ជាទិញ ទោះបីស្ថិតក្នុងវិបត្តិកូវីដ-១៩។
អត្ថបទគួរអាន
អ្នកជំនាញសេដ្ឋកិច្ចរូបនេះជឿជាក់ថា វិស័យឧស្សាហកម្មមិនមែនកាត់ដេរនេះនឹងបន្តកើនឡើងជាបន្តបន្ទាប់ទៀត ដ្បិតវាជាវិស័យយុទ្ធសាស្ត្រមួយ ដែលរាជរដ្ឋាភិបាលកម្ពុជាត្រូវការ ហើយរាជរដ្ឋាភិបាល ក៏បាននិងកំពុងជួយសម្រួលលក្ខខណ្ឌ និងនីតិវិធីមួយចំនួន ដើម្បីទាក់ទាញវិនិយោគិនឲ្យមកបោះទុនលើវិស័យនេះនៅកម្ពុជាផងដែរ។ សម្រាប់លោកបណ្ឌិត ហុង វណ្ណៈ វិស័យឧស្សាហកម្មមិនមែនកាត់ដេរ គឺជាវិស័យស្នូលដ៏រឹងមាំ ក្នុងការជួយជំរុញកំណើនសេដ្ឋកិច្ចរបស់កម្ពុជា។
មិនមែនមានតែផលិតផលមិនមែនការកាត់ដេរនោះទេ ដែលមានការកើនឡើង សូម្បីការនាំចេញផលិតផលកសិកម្មក៏មានការកើនឡើងផងដែរ។ របាយការណ៍ពីក្រសួងកសិកម្មកម្ពុជា ការនាំចេញផលិតផលកសិកម្មរបស់កម្ពុជានៅ៩ខែមកនេះ រកបានប្រាក់ចំណូលជាង៣ពាន់លានដុល្លារ ជាមួយនឹងបរិមាណនាំចេញសរុបនជិត៦លានតោន មានការកើនឡើងជាង៨៨% បើធៀបនឹងរយៈពេលដូចគ្នាកាលពីឆ្នាំ២០២០។ ក្នុងនោះ ការនាំចេញផលិតផលកសិកម្មទៅកាន់ប្រទេសវៀតណាមមានប្រមាណ ជាង៦៤% នៃការនាំចេញសរុប នាំចេញទៅថៃមានជាង ២១% និងនាំចេញទៅចិនមានជិត៧% និងគោលដៅប្រទេសដទៃទៀតជិត៥%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
