ចៅក្រមអាម៉េរិក លោកស្រី អ៊ីវ៉ន ហ្គនហ្សាឡេស រ៉ចជើ (Yvonne Gonzalez Rogers) បានកំណត់យកថ្ងៃទី៥ ខែកុម្ភៈ ឆ្នាំ២០២៤ សម្រាប់ការបើកសវនាការជំនុំជម្រះរឿងក្ដីរដ្ឋប្បវេណីដ៏ធំខាងលើនេះ បន្ទាប់ពីមេធាវីតំណាងក្រុមហ៊ុន Google និងមេធាវីតំណាងអ្នកប្រើប្រាស់អ៊ីនធឺណិតអះអាងថា ពួកគេបានព្រមព្រៀងគ្នាឈានដល់ការដោះស្រាយបឋម។
ពាក្យបណ្តឹងនេះបានទាមទារសំណងជំងឺចិត្តរួមយ៉ាងតិច៥ពាន់លានដុល្លារ ពីក្រុមហ៊ុន Google។ លក្ខខណ្ឌនៃការដោះស្រាយបណ្ដឹងនេះមិនត្រូវបានលាតត្រដាងឱ្យដឹងនោះទេ ប៉ុន្តែមេធាវីតំណាងភាគីទាំងពីរអះអាងថា ពួកគេបានព្រមព្រៀងគ្នាលើលក្ខខណ្ឌដោះស្រាយតាមរយៈការចរចារួចហើយ ហើយរំពឹងថា នឹងបង្ហាញដំណោះស្រាយផ្លូវការ ដើម្បីដាក់ជូនឱ្យតុលាការសម្រេចនៅត្រឹមថ្ងៃទី២៤ ខែកុម្ភៈ ឆ្នាំ២០២៤។
ទោះជាយ៉ាងណា ភ្លាមៗទាំងមេធាវីតំណាងក្រុមហ៊ុន Google ដែលជាចុងបណ្ដឹង និងមេធាវីតំណាងអ្នកប្រើប្រាស់ដែលជាដើមបណ្ដឹង មិនបានឆ្លើយតបសំណើសុំការឆ្លើយបំភ្លឺជុំវិញរឿងនេះនោះទេ។
ដើមបណ្តឹងបានចោទប្រកាន់ថា ប្រព័ន្ធវិភាគទិន្នន័យ ឃុកឃី (Cookie) និង អ៊ែប (App) របស់ក្រុមហ៊ុន Google អនុញ្ញាតឱ្យក្រុមហ៊ុននេះលួចតាមដានសកម្មភាពរបស់ពួកគេជាសម្ងាត់ សូម្បីនៅពេលពួកគេធ្វើការកំណត់ Browser របស់ Google Chrome ដើម្បីប្ដូរទៅ Browser ឯកជនយ៉ាងណាក្ដី។
ដើមបណ្ដឹងបានអះអាងថា កត្តានេះបានធ្វើឱ្យ Google ក្លាយជាប្រភពព័ត៌មាន ដែលគ្មានការទទួលខុសត្រូវ ហើយក្រុមហ៊ុននេះអាចតាមដានដឹងពីមិត្តភក្តិ ចំណង់ចំណូលចិត្ត អាហារចូលចិត្ត និងទម្លាប់ដើរទិញអីវ៉ាន់របស់អ្នកប្រើប្រាស់អ៊ីនធឺណិត។
ក្រុមហ៊ុន Google បានព្យាយាមច្រានចោលបណ្ដឹងនេះ ប៉ុន្តែត្រូវបានលោកស្រីចៅក្រម អ៊ីវ៉ន ហ្គនហ្សាឡេស រ៉ចជើ (Yvonne Gonzalez Rogers) បានច្រានចោលការមិនទទួលស្គាល់កំហុសរបស់ក្រុមហ៊ុននេះ៕
ដោយ: តែម សុខុម
