តើទីផ្សារលំនៅដ្ឋាននៅទូទាំងពិភពលោកកំពុងឈានដល់ចំណុចរបត់ ឬយ៉ាងណា?

នៅក្នុងប្រទេសឧស្សាហកម្មទាំង៣៧ ដែលជាសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) តម្លៃលំនៅដ្ឋានបានហក់ឡើងក្នុងអត្រា ២,១%ក្នុងត្រីមាសទី៣ ឆ្នាំ២០២៣ បើធៀបនឹងត្រីមាសទី២។

យោងតាមការចុះផ្សាយរបស់សារព័ត៌មាន Financial Times បានឱ្យដឹងថា ក្នុងចំណោមប្រទេសទាំងនោះ គឺមានតែប្រមាណ១ភាគ៣ប៉ុណ្ណោះ ដែលបានរាយការណ៍ពីការធ្លាក់ចុះតម្លៃប្រចាំត្រីមាសក្នុងរយៈពេលចុងក្រោយនេះ។

ការធ្លាក់ចុះតម្លៃបានធូរស្រាល ឬ អាចត្រលប់មកតម្លៃក្នុងស្ថានភាពដើមវិញនៅក្នុងប្រទេសជាច្រើន ដោយសារការរំពឹងទុកថា បណ្ដាធនាគារកណ្តាលនឹងបញ្ចុះអត្រាការប្រាក់នៅឆ្នាំនេះ បានជួយឱ្យអត្រាការប្រាក់កម្ចីទិញផ្ទះធ្លាក់ចុះ។ ទាំងនេះ គឺជាកត្តាសំខាន់ ដែលជួយធ្វើឲ្យទីផ្សារលំនៅដ្ឋាន ចាប់ផ្ដើមមានសម្ទុះរើបខ្លួនបន្ដិចម្ដងៗ នៅតាមបណ្ដាប្រទេសជឿនលឿនភាគច្រើន បើទោះបីជាទីផ្សារលំនៅដ្ឋានក្នុងប្រទេសខ្លះ នៅមិនទាន់រលាស់ខ្លួនរួចក៏ដោយចុះ។

កង្វះនៃការផ្គត់ផ្គង់លំនៅឋានសម្រាប់លក់ ក៏បានជួយឱ្យតម្លៃលំនៅឋានហក់ឡើងផងដែរ ហើយតម្លៃពិតប្រាកដនៅក្នុងប្រទេសឧស្សាហកម្មទាំង៣៧ ដែលជាសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានត្រលប់ទៅរកកំណើនវិញនៅក្នុងត្រីមាសចុងក្រោយនៃឆ្នាំ២០២៣។

ទោះយ៉ាងណា លោក អ៊ែនឌ្រូ វីស្សាត (Andrew Wishart) អ្នកជំនាញសេដ្ឋកិច្ចអចលនទ្រព្យនៅក្រុមហ៊ុនស្រាវជ្រាវសេដ្ឋកិច្ចអង់គ្លេស Capital Economics បានលើកឡើងថា តម្លៃលំនៅឋានទំនងជានឹងធ្លាក់ចុះបន្ថែមទៀតនៅក្នុងប្រទេសមួយចំនួនដូចជា អាល្លឺម៉ង់ ដាណឺម៉ាក និងស៊ុយអែត ជាដើមដែលមានទីផ្សារជួលធំជាងគេ ប៉ុន្តែធ្លាក់ចុះក្នុងកម្រិតទាប។

លោក ថូម៉ាស វីឡាដេក (Tomasz Wieladek) អ្នកជំនាញសេដ្ឋវិទូនៅក្រុមហ៊ុនវិនិយោគ ធី រ៉ូវ ប្រាយស៍ (T. Rowe Price) និយាយថា តម្លៃលំនៅឋានបានធ្លាក់ចុះជិតដល់បាតទៅហើយនៅកន្លែងជាច្រើន ហើយកំពុងស្ទុះងើបឡើងវិញនៅកន្លែងជាច្រើនរួមទាំងចក្រភពអង់គ្លេស កាណាដា និងអូស្ត្រាលី ផងដែរ។

ដោយឡែក ថ្វីដ្បិតតែអត្រាប្រាក់កម្ចីទិញផ្ទះរបស់ចក្រភពអង់គ្លេស និងសហរដ្ឋអាម៉េរិក បានកើនឡើងក្នុងខែកុម្ភៈ ដើមឆ្នាំ២០២៤ យ៉ាងណាក្ដី ក៏វានៅតែទាបជាងកម្រិតទូទាំងប្រទេស ដែលបានឈានដល់កម្រិតកំពូលនៅក្នុងឆ្នាំ២០២៣។

តម្លៃលំនៅឋានបានហក់ឡើងក្នុងកម្រិតល្អបំផុតនៅសហរដ្ឋអាម៉េរិក ដ្បិតកំណើនសេដ្ឋកិច្ច និងអត្រាអ្នកមានការងារធ្វើរឹងមាំ បានជួយឱ្យតម្លៃលំនៅឋានហក់ឡើង៥,២%នៅក្នុងឆ្នាំ២០២៣ គិតត្រឹមខែវិច្ឆិកា។

ដោយ: តែម សុខុម