លក្ខណៈនៃជំងឺដុំពកៗលើស្បែនេះ មាន ខ្លះហើមជើង និង បំពង់ក ជាដើម មកដល់ពេលនេះមិនទាន់មានថ្នាំណាអាចព្យាបាលបាននោះឡើយ ហើយក៏មិនទាន់មានការណែនាំអ្វីច្បាស់នោះទេ។ ពលរដ្ឋក៏ធ្លាប់បានទាក់ទងទៅកាន់ពេទ្យសត្វដើម្បីស្វែងរកថ្នាំនិងវិធីការពារពីជំងឺនោះផងដែរតែនូវតែគ្មានដំណោះស្រាយ។
លោក អាត ស្រ៊ន ភូមិកណ្ដាលកោង ឃុំសំរោង ស្រុកព្រៃឈរ ខេត្តកំពង់ចាម បានប្រាប់ក្រុមការងារខេមបូណូមីសថា សត្វគោរបស់គាត់ និងប្រជាពលរដ្ឋជាច្រើនគ្រួសារទៀតនៅក្នុងភូមិ បានជួបនូវបញ្ហាជំងឺជំងឺដុំពកស្បែកនេះ ហើយវាជាការកើតឡើងដំបូងគេនៅក្នុងភូមិរបស់លោក។
កសិករម្នាក់ទៀត និងជាមេរភូមិកណ្ដាលកោង បានលើកឡើងថា ចំពោះប្រជាពលរដ្ឋដែលចិញ្ចឹមគោនៅក្នុងភូមិនេះប្រមាណជាង៧០% បានជួបបញ្ហាគោកើតជំងឺដុំពកស្បែកនេះ។ ចំពោះលក្ខណៈនៃជំងឺនោះ គឺមានដុំពកៗលើស្បែក ខ្លះហើមជើង បំពង់ក ជាដើមហើយរហូតមកដល់ពេលនេះមិនទាន់ថ្នាំណាដែលអាចព្យាបាលបាននោះឡើយ ហើយក៏មិនទាន់មាននូវការណែនាំអ្វីច្បាស់នោះឡើយ ក៏ប៉ុន្តែលោកពូក៏ធ្លាប់បានទាក់ទងទៅកាន់ពេទ្យសត្វដើម្បីស្វែងរកថ្នាំនិងវិធីការពារពីជំងឺនោះផងដែរ។
អត្ថបទគួរអាន
ខេមបូណូមីស បានទាក់ទងទៅកាន់ប្រធានមន្ទីរកសិកម្មខេត្តកំពង់ចាម លោក សឹម ថាវីរៈ ប៉ុន្ដែ លោកថាជាប់រវល់ ហើយបានប្រាប់ថា បើចង់ដឹងច្បាស់ទាក់ទងនឹងបញ្ហានេះ គួរតែទៅសួរខាងពេទ្យសត្វខេត្ត។
ប្រជាកសិករនៅក្នុងភូមិកណ្ដាលកោង ឃុំសំរោង ស្រុកព្រៃឈរ ខេត្តកំពង់ចាម បានលើកឡើងថា អំឡុងពេលគោរបស់ពួកគាត់ជួបបញ្ហាជំងឺនេះ ក៏ត្រូវបានឈ្មួញទិញទម្លាក់ថ្លៃយ៉ាងខ្លាំងដែរ ហើយពួកគាត់ស្នើឲ្យអាជ្ញាធរជួយរកដំណោះស្រាយបញ្ហាជំងឺនេះផង។
បើតាមក្រសួងកសិកម្ម ជំងឺដុំពកស្បែកគោក្របី ជាជំងឺម្យ៉ាង ដែលកើតឡើងដំបូងនៅប្រទេសហ្សាំប៊ី ក្នុងឆ្នាំ១៩២៩ ហើយបានឆ្លងរាលដាលពាសពេញពិភពលោក ដោយកន្លងមកនៅប្រទេសវៀតណាម រួមទាំងខេត្តមួយចំនួននៅកម្ពុជាក៏បានរកឃើញឆ្លងជំងឺនេះលើគោក្របីដែរ។
ក្រសួងកសិកម្មអះអាងថា ជំងឺដុំពកស្បែកគោក្របី អាចធ្វើឲ្យអត្រាគោក្របីឈឺពី ៥ ទៅ ៤៥ភាគរយ និអត្រាស្លាប់តិចជាង១០% ដែលវាបង្កឲ្យមានការខាតបង់ធ្ងន់ធ្ងរដល់សេដ្ឋកិច្ចជាតិ៕
អត្ថបទ៖ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
