ឧត្តមសេនីយ មីន អ៊ុងឡាំងបានអំពាវនាវ ឲ្យប្រទេសដែលលោកហៅថា ប្រទេសជាមិត្ត រួមមានប្រទេសនៅតំបន់អាស៊ាន និង ប្រទេសធំៗនានា រួមគ្នាដើម្បីប្រយុទ្ធប្រឆាំងទប់ស្កាត់ការឆ្លងរាលដាលកូវីដ១៩។ ក្នុងន័យនេះ មេដឹកនាំរបបសឹកភូមាទំនងជាចង់ឲ្យប្រទេសទាំងនោះជួយដល់ប្រទេសភូមា ក្នុងការជួយប្រយុទ្ធប្រឆាំងនឹងកូវីដ១៩ ស្របពេលដែលភូមាកំពុងតែផុងខ្លួនកាន់តែជ្រៅក្នុងវិបត្តិកូវីដ១៩ដែលចាប់ផ្តើមរាលដាលខ្លាំងតាំងពីខែមិថុនា មក។
មេដឹកនាំយោធាភូមារូបនេះ បានបន្តលើកឡើងពីគោលបំណងចង់បង្កើនសន្ទុះកម្មវិធីចាក់វ៉ាក់សាំងនៅក្នុងប្រទេសខ្លួន តាមរយៈវ៉ាក់សាំងដែលទទួលបានពីជំនួយ និង វ៉ាក់សាំងដែលផលិតនៅក្នុងស្រុកតាមរយៈការគាំទ្រពីប្រទេសរុស្សី។ មេដឹកនាំរូបនេះ ក៏បានបង្ហើបពីការចង់ស្នើសុំថវិកាពីអាស៊ានដើម្បីយកមកប្រើប្រាស់ផងដែរ។
កន្លងមកជារឿយៗ ភូមាតែងទទួលបានវ៉ាក់សាំងក្នុងនាមជាជំនួយ ពីប្រទេសចិនតែមួយប៉ុណ្ណោះ។ រហូតមកទល់នឹងពេលនេះមានពលរដ្ឋភូមាប្រមាណ៣%ប៉ុណ្ណោះ ដែលទទួលបានការចាក់វ៉ាក់សាំងពីរដ្ឋាភិបាល។ នេះបើយោងតាមទិន្នន័យទីភ្នាក់ងារ Reuters ។
អត្ថបទគួរអាន
វិបត្តិកូវីដ១៩ក្នុងប្រទេសភូមាកាន់តែធ្ងន់ធ្ងរទៅៗ ក្រោយពលរដ្ឋភូមាកាន់តែច្រើនបានធ្លាក់ខ្លួនឈឺធ្ងន់ ហើយត្រូវការបំពង់អុកស៊ីហ្សែនជាចាំបាច់។ បើយោងតាមការចុះផ្សារដោយសារព័ត៌មាន Myanmar Now កាលពីចុងសប្តាហ៍មុន មានពលរដ្ឋ៨នាក់បានស្លាប់បាត់បង់ជីវិតនៅក្នុងមន្ទីរពេទ្យនៃទីក្រុងយ៉ាំងហ្គោន ដោយសារតែមន្ទីរពេទ្យក្នុងរដ្ឋធានីមួយនេះ មានតែបំពង់អុកស៊ីសែនតែមិនមានខ្យល់អុកស៊ីហ្សែន។
ភូមាបន្តរកឃើញអ្នកឆ្លងកូវីដ១៩ថ្មីៗ ក្នុងរង្វង់ជាមធ្យម ៧ពាន់នាក់ក្នុងមួយថ្ងៃ និងស្លាប់ជាច្រើនរយនាក់ទៀតក្នុងមួយថ្ងៃៗ។ ជាក់ស្តែង គិតត្រឹម២៤ម៉ោងថ្ងៃអង្គារសប្តាហ៍នេះ មានអ្នកស្លាប់ដល់ទៅជាង ៣០០នាក់ ដែលភាគច្រើន គឺស្លាប់ដោយសារគ្មានបំពង់អុកស៊ីហ្សែនសម្រាប់ជំនួយដល់ការដកដង្ហើម។
សូមជម្រាបថា ប្រទេសភូមាបានធ្លាក់ទៅក្នុងភាពវឹកវរចាប់តាំងពីថ្ងៃរដ្ឋប្រហារដោយយោធា កាលពីដើមខែកុម្ភៈមក ស្របពេលដែលចលនាបាតុកម្ម ក៏មិនបានកម្រើកឡើងវិញទៀតដែរចាប់តាំងពីមានការផ្ទុះរាលដាលកូវីដ១៩ខ្លាំង កាលពីខែមិថុនាមក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
