លោក គីស៊ីដា កំពុងបំពេញទស្សនកិច្ចនៅប្រទេសអារ៉ាប៊ីសាអូឌីត ដែលជាផ្នែកមួយនៃដំណើរទស្សនកិច្ចទៅកាន់តំបន់មជ្ឈិមបូព៌ា ហើយក្នុងអំឡុងពេលទស្សនកិច្ចនេះ គេបានរំពឹងថា ក្រសួងសេដ្ឋកិច្ច និងអង្គការជប៉ុនគាំទ្រ ដោយរដ្ឋសម្រាប់សុវត្ថិភាពលោហៈ និងថាមពល (JOGMEC) របស់ប្រទេសជប៉ុន និងក្រសួងឧស្សាហកម្ម និងធនធានរ៉ែរបស់អារ៉ាប៊ីសាអូឌីត នឹងចុះហត្ថលេខាលើអនុស្សរណៈ នៃកិច្ចសហប្រតិបត្តិការ ដែលជាផ្នែកមួយនៃកិច្ចព្រមព្រៀងនេះ ក្នុងពេលឆាប់ៗនេះ។
តាមកិច្ចព្រមព្រៀងនេះ ប្រទេសជប៉ុន និងអារ៉ាប៊ីសាអូឌីត នឹងបង្កើតគម្រោងអភិវឌ្ឍន៍ធនធាននៅក្នុងប្រទេសទី៣សម្រាប់ការវិនិយោគរួមគ្នា។ ពួកគេសង្ឃឹមថា នឹងទទួលបានសិទ្ធិក្នុងការរុករករ៉ែសំខាន់ៗដូចជាលោហៈកម្រ ដែលប្រើក្នុងរថយន្តអគ្គិសនីជាដើម ខណៈដែលតម្រូវការរថយន្តអគ្គិសនីកំពុងកើនឡើងចំពេលមានការជំរុញជាសកលឆ្ពោះទៅរកការគ្មានកាបូន។
អត្ថបទគួរអាន
ប្រទេសអារ៉ាប៊ីសាអូឌីតកំពុងស្វែងរកសារធាតុរ៉ែកម្រថ្មីៗ នៅក្នុងស្រុកដែលជាផ្នែកមួយនៃយុទ្ធសាស្ត្រជាតិរបស់ខ្លួន ហើយអង្គការ JOGMEC របស់ប្រទេសជប៉ុន នឹងរួមចំណែកផ្ដល់ជំនាញបច្ចេកទេសដើម្បីជួយរដ្ឋាភិបាលក្រុងរីយ៉ាដ ក្នុងការសិក្សាលើគម្រោងរុករកធនធានរ៉ែនេះ។
ប្រទេសជប៉ុនក៏នឹងជួយពន្លឿនការអភិវឌ្ឍលើធនធានរ៉ែមួយចំនួន ដែលត្រូវកំពុងមានប្រតិបត្តិការរុករកស្រាប់នៅក្នុងប្រទេសអារ៉ាប៊ីសាអូឌីតផងដែរ ដូចជាទង់ដែង ដែក និងស័ង្កសីផងដែរ។
ប្រទេសមួយចំនួនតូចរួមទាំងប្រទេសចិន បច្ចុប្បន្នផលិតបានច្រើននូវសារធាតុរ៉ែដ៏កម្រនៅក្នុងពិភពលោក ព្រមទាំងសារធាតុដែលប្រើក្នុងអាគុយរបស់រថយន្តអគ្គិសនីដូចជា លីចូម និងកូបាល់ (cobalt) ជាដើម។ ប្រទេសជប៉ុន និងអារ៉ាប៊ីសាអូឌីតមានបំណងធ្វើពិពិធកម្មខ្សែ ចង្វាក់ផ្គត់ផ្គង់សម្រាប់លោហធាតុបែបនេះ ដើម្បីជៀសវាងការពឹងផ្អែកខ្លាំងពេកតែទៅលើអ្នកផ្គត់ផ្គង់ជាក់លាក់ណាមួយ។
ប្រទេសជប៉ុនបានពឹងផ្អែកយ៉ាងខ្លាំងទៅលើប្រទេសចិនសម្រាប់ការផ្គត់ផ្គង់សារធាតុលីចូមអ៊ី ដ្រូអុកស៊ីតជិត ៨០% និងពឹងផ្អែកជាង ៦០%លើដំណើរការកែច្នៃសារធាតុកូបាល់របស់ខ្លួន៕
