ទោះយ៉ាងណា ប្រធានសមាគមម្រេចកំពតអះអាងថា ការនាំចេញម្រេចកំពតនៅឆ្នាំនេះនឹងមានការកើនឡើងជាងឆ្នាំមុនផងដែរ ដោយរំពឹងថា នឹងអាចនាំចេញបានក្នុងរង្វង់ជាង១០០តោននៅពេញមួយឆ្នាំ២០២៣នេះ។
លោក ងួន ឡាយ ប្រធានសមាគមម្រេចកំពតបានគូសបញ្ជាក់ថា ស្ថានភាពនាំចេញម្រេចកំពត គិតត្រឹមដំណាច់ខែសីហានេះ ហាក់មិនមានការប្រែប្រួលខ្លាំងពីខែមុនៗនោះទេ ពោលគឺនៅរយៈពេល៨ខែដើមឆ្នាំ២០២៣នេះ ការនាំចេញម្រេចកំពតកម្ពុជាទៅកាន់ទីផ្សារអន្តរជាតិសម្រេចបានប្រមាណ៦២តោនកើនឡើងតិចតួចបើធៀបនឹងបរិមាណនាំចេញកាលពីឆ្នាំ២០២២។ តាមរយៈលទ្ធផលនេះ ប្រធានសមាគមរូបនេះ រំពឹងថា ការនាំចេញម្រេចកំពតកម្ពុជាទៅកាន់ទីផ្សារអន្តរជាតិនៅពេញមួយឆ្នាំ២០២៣នេះ នឹងអាចសម្រេចបានជាង១០០តោន សម្រាប់ទីផ្សារសហគមន៍អឺរុប អាមេរិក និងអាស៊ី។ ការរំពឹងបែបនេះ ក្រោយលោកសង្កេតឃើញមានក្រុមហ៊ុនមួយចំនួនបានបង្កើនការបញ្ជាទិញម្រេចពីកសិករនៅឆ្នាំនេះ តួយ៉ាងនៅពេលថ្មីៗនេះ មានក្រុមហ៊ុនមួយ ដែលទើបទិញម្រេចកំពតពីកសិករក្នុងបរិមាណប្រមាណជា២៦តោន និងបានស្នើសុំឯកសារសម្រាប់នាំចេញនៅក្នុងខែកញ្ញានេះតែម្តង ដូច្នេះបរិមាណនាំចេញម្រេចសរុបអាចឈានដល់រង្វង់៩០តោន គិតត្រឹមខែកញ្ញានេះ ហើយនឹងអាចឈានដល់ជាង១០០តោនទៅតាមការរំពឹងទុកនៅដំណាច់ឆ្នាំ២០២៣នេះ។
អត្ថបទគួរអាន
ចំពោះការប្រមូលផលម្រេចនៅឆ្នាំនេះវិញ លោក ងួន ឡាយ អះអាងថា មកទល់ពេលនេះការប្រមូលផលម្រេចកំពតរបស់ប្រជាកសិករបានបញ្ចប់ការប្រមូលផលអស់ហើយ ខណៈទិន្នផលម្រេចដែលទទួលបានសម្រាប់លក់នៅឆ្នាំនេះ គឺទទួលបានក្នុងបរិមាណច្រើនផងដែរ ដោយសារឆ្នាំនេះ មានភ្លៀងធ្លាក់គ្រប់គ្រាន់ គួរផ្សំមានការថែទាំ និងដាក់ជីគ្រប់គ្រាន់លើចម្ការម្រេចរបស់កសិករ។ ដោយឡែក សម្រាប់ការដាំដុះម្រេចកំពតវិញ ប្រធានសមាគមរូបនេះបញ្ជាក់ថា មិនសូវមានកសិករដាំថ្មីច្រើននោះទេ ពោលគឺមានកសិករថ្មីប្រមាណ២២គ្រួសារប៉ុណ្ណោះ ដែលបានចូលជាសមាជិកថ្មី ដោយពួកគេបានដាំដុះស្របនឹងគោលការណ៍របស់សមាគម។ ហើយគិតមកដល់ពេលនេះ ផ្ទៃដីដាំដុះម្រេចកំពតសរុបមានប្រមាណ២ម៉ឺន៤ពាន់ហិកតា។ យ៉ាងណាមិញ បើទោះបីបាតុភូត អែលនីណូ កំពុងគម្រាមកំហែងដល់ទិន្នផលកសិកម្មនៅក្នុងតំបន់អាស៊ីអាគ្នេយ៍យ៉ាងណាក៏ដោយ ប៉ុន្តែសម្រាប់ប្រធានសមាគមម្រេចកំពតរូបនេះ អះអាងថា វាមិនមានផលប៉ះពាល់ដល់ការដាំដុះ និងទិន្នផលម្រេចកំពតនោះទេ។
គួរជម្រាបថា ជាច្រើនឆ្នាំមកហើយ តម្លៃម្រេចកំពតដែលបានលក់នៅលើទីផ្សារអន្តរជាតិ គឺមានតម្លៃថេរដោយម្រេចខ្មៅមានតម្លៃ១៥ដុល្លារ រីឯម្រេចក្រហមមានតម្លៃ២៥ដុល្លារ និងម្រេចសមានតម្លៃ២៨ដុល្លារក្នុងមួយគីឡូក្រាម។ ហើយទីផ្សារសំខាន់ៗសម្រាប់ការនាំចេញម្រេចកំពតកម្ពុជារួមមានសហភាពអឺរ៉ុប សហរដ្ឋអាមេរិក ជប៉ុន កូរ៉េខាងត្បូង ហុងកុង និងតៃវ៉ាន់ជាដើម៕
