ម៉ាឡេស៊ីកំពុងរៀបចំផែនការស្តារគម្រោងផ្លូវដែកល្បឿនលឿនភ្ជាប់តម្លៃ១៧ពាន់លានដុល្លារឡើងវិញ

ម៉ាឡេស៊ីកំពុងមានគម្រោងធ្វើឲ្យផែនការសាងសង់ផ្លូវរថភ្លើងល្បឿនលឿនដំបូងដែលតភ្ជាប់ពីទីក្រុងកូឡាឡាំពួរ ទៅកាន់សិង្ហបុរីរស់ឡើងវិញ បន្ទាប់ពីវាបានស្ងប់ស្ងាត់អស់ជាច្រើនឆ្នាំ ក្រោយរដ្ឋាភិបាលម៉ាឡេស៊ី និងសិង្ហបុរី បានបរាជ័យក្នុងការធ្វើឲ្យគម្រោងនេះដំណើរការ។ ក្រុមហ៊ុនឯកជនទាំងក្នុងស្រុក និងបរទេសចំនួន៧កំពុងមានការចាប់អារម្មណ៍នឹងគម្រោងនេះ ដោយរួមទាំងក្រុមហ៊ុនសាងសង់ផ្លូវដែក ដែលគ្រប់គ្រងដោយរដ្ឋរបស់ចិន ក្រុមហ៊ុន Hyundai Rotem របស់កូរ៉េខាងត្បូងជាដើម។

រដ្ឋាភិបាលម៉ាឡេស៊ី ត្រូវបានគេរំពឹងថា នឹងបង្ហាញសំណើនេះទៅកាន់ប្រទេសសិង្ហបុរីក្នុងរយៈពេលប៉ុន្មានខែខាងមុខ ដើម្បីពិភាក្សាអំពីគម្រោងនេះឡើងវិញ ហើយគេដឹងថា ប្រទេសសិង្ហបុរី ក៏កំពុងតែមានឆន្ទៈក្នុងការពិភាក្សាលើសំណើថ្មីណាមួយពីប្រទេសម៉ាឡេស៊ីផងដែរ។

គួរបញ្ជាក់ថា គម្រោងសាងសង់ផ្លូវរថភ្លើងល្បឿនលឿនជាមួយសិង្ហបុរីនេះ ត្រូវបានស្នើជាលើកដំបូងក្នុងឆ្នាំ២០១៣ ក្នុងអំឡុងពេល ដែលម៉ាឡេស៊ី ស្ថិតនៅក្រោមរដ្ឋបាលរបស់អតីតនាយករដ្ឋមន្ត្រី ណាជីប រ៉ាហ្សាក់ (Najib Razak)។

គម្រោងផ្លូវដែកល្បឿនលឿនដែលមានប្រវែងសរុប៣៥០គីឡូម៉ែត្រនេះទទួលការព្រមព្រៀងគ្នាជាមួយនឹងសិង្ហបុរី នៅក្នុងឆ្នាំ២០១៦ ដោយគ្រោងនឹងបើកដំណើរការនៅឆ្នាំ២០២៦។ ក្នុងករណីគម្រោងនេះអាចដំណើរការ នោះសេវាកម្មដឹកជញ្ជូនតភ្ជាប់រវាងម៉ាឡេស៊ី និងសិង្ហបុរី នឹងកាត់បន្ថយមកនៅត្រឹមប្រហែល៩០នាទីប៉ុណ្ណោះ ខណៈដែលបច្ចុប្បន្នការដឹកជញ្ជូនតាមរថយន្ត គឺមានរយៈពេល៤ម៉ោង។

ខ្សែរថភ្លើងល្បឿនលឿននេះត្រូវបានគេរំពឹងថា នឹងជំរុញអាជីវកម្មឆ្លងព្រំដែន ក៏ដូចជាការអភិវឌ្ឍន៍តំបន់នៅតាមបណ្តោយខ្សែនេះ។ គម្រោងនេះត្រូវបានលុបចោល ក្នុងឆ្នាំ២០២១ បន្ទាប់ពីម៉ាឡេស៊ី និងសិង្ហបុរី បរាជ័យក្នុងការឈានដល់កិច្ចព្រមព្រៀងចុងក្រោយមួយ ដោយនៅពេលនោះម៉ាឡេស៊ីបានចំណាយប្រាក់ជាង ប្រមាណជា ៧៤ លានដុល្លារ ជាសំណងដល់សិង្ហបុរី សម្រាប់ការបញ្ចប់គម្រោងនេះ៕

ដោយៈសរ សុជាតិ