សភាអាម៉េរិកធ្វើសេចក្ដីព្រាងច្បាប់ ដើម្បីចាប់បង្ខំឱ្យក្រុមហ៊ុន TikTok កាត់ផ្ដាច់ទំនាក់ទំនងជាមួយក្រុមហ៊ុនចិន

គណៈកម្មាធិការសភាតំណាងរាស្រ្តអាម៉េរិក កាលពីថ្ងៃទី៧ ខែមីនា បានបោះឆ្នោតដោយសំឡេង៥០លើ០ (៥០-០) ដើម្បីជំរុញសេចក្តីព្រាងច្បាប់ ដែលមានរិតលក្ខណៈចាប់បង្ខំឱ្យក្រុមហ៊ុន Tik Tiok កាត់ផ្តាច់ទំនាក់ទំនងជាមួយចិន ដែលអាចនឹងឈានទៅដល់ការបោះឆ្នោតពេញលេញនាពេលដ៏ខ្លីខាងមុខ​។ លោក ស្ទីវ ស្កាឡៃស៍ (Steve Scalise) ប្រធានសំឡេងភាគច្រើននៃសភាអាម៉េរិក បានបញ្ជាក់តាមបណ្ដាញទំនាក់ទំនងសង្គម X ថា លោកនឹងនាំយកសេចក្ដីព្រាងច្បាប់សន្តិសុខជាតិដ៏សំខាន់នេះទៅកាន់សភាសម្រាប់ការបោះឆ្នោតនៅសប្តាហ៍ក្រោយ។

សេចក្ដីព្រាងច្បាប់ដែលដាក់ចេញដោយលោក ម៉ៃ ហ្គាឡាហ្គើ (Mike Gallagher) មកពីគណបក្សសាធារណរដ្ឋនេះនឹងទុកពេលឱ្យក្រុមហ៊ុនមេរបស់ TikTok ពោលគឺ ByteDance ដែលមានការិយាល័យកណ្តាលនៅទីក្រុងប៉េកាំង ប្រទេសចិន ប្រហែល៦ខែ ដើម្បីផ្ដាច់ខ្លួនចេញពី TikTok បើមិនដូច្នោះទេ TikTok នឹងត្រូវប្រឈមបម្រាមនៅលើទឹកដីសហរដ្ឋអាម៉េរិក។

ចំណាត់ការចុងក្រោយបំផុតក្នុងការរឹតបន្តឹង TikTok នេះកើតមានឡើង បន្ទាប់ពីការព្យាយាមរបស់អតីតប្រធានាធិបតីអាម៉េរិក លោក ដូណាល់ ត្រា ដើម្បីហាមឃាត់ Platform ចែករំលែកវីដេអូនេះក្នុងឆ្នាំ២០២០ ត្រូវបានរារាំងដោយតុលាការ។ បណ្ដាអ្នករិះគន់ TikTok បានអះអាងថា ក្រុងប៉េកាំងអាចនឹងបង្ខំឱ្យក្រុមហ៊ុន TikTok ចែករំលែកទិន្នន័យរបស់អ្នកប្រើប្រាស់ខ្លួននៅលើទឹកដីសហរដ្ឋអាម៉េរិក និងផ្សព្វផ្សាយការឃោសនា និងព័ត៌មានមិនពិត ដើម្បីបំភាន់មតិសាធារណៈ។

ជាការឆ្លើយតប ក្រុមហ៊ុន TikTok បដិសេធថា ខ្លួនមិនបានចែករំលែកទិន្នន័យផ្ទាល់ខ្លួនរបស់អ្នកប្រើប្រាស់ជាមួយរដ្ឋាភិបាលចិននោះទេ ហើយអះអាងថា ខ្លួននឹងបដិសេធរាល់សំណើបែបនោះ ប្រសិនបើមានមែន៕