ចិនលែងខ្វល់ពីអាម៉េរិកលើការរិតត្បិតសម្ភារសៀគ្វីដែលជាគ្រឿងសំខាន់សម្រាប់ផលិតរថយន្តអគ្គិសនី

ដោយប្រឈមមុខនឹងការរិតត្បិតរបស់សហរដ្ឋអាម៉េរិកលើខ្សែច្រវាក់ផលិតកម្មរបស់ចិន នៅពេលនេះទីក្រុងប៉េកាំងបានព្យាយាមបង្កើនការគ្រប់គ្រង និងការផ្គត់ផ្គង់អ្វី ដែលខ្វះដោយខ្លួនឯង ដោយរួមទាំងការដាក់ចេញនូវផែនការផលិតបន្ទះសៀគ្វីអេឡិចត្រូនិកដោយខ្លួនឯងផងដែរ។

តាមសេចក្តីរាយការណ៍របស់សារព័ត៌មាន Nikkei នៅពេលនេះក្រុមហ៊ុនផលិតរថយន្តធំៗរបស់ចិនជាច្រើនបានផ្លាស់ប្តូរពីការទិញគ្រឿងអេឡិចត្រូនិកពីក្រៅស្រុក ខណៈដែលទីក្រុងប៉េកាំងកំពុងតែស្វែងរកការពង្រឹងខ្សែច្រវាក់ផ្គត់ផ្គង់សម្ភារដែលខ្លួនខ្វះដោយខ្លួនឯង ដើម្បីឆ្លើយតបទៅនឹងការរឹតបន្តឹងពាណិជ្ជកម្មរបស់សហរដ្ឋអាម៉េរិក។

ក្រុមហ៊ុន Great Wall Motor បាននិយាយថា ខ្លួនបានចាប់ផ្តើមផលិតឧបករណ៍អេឡិចត្រូនិកដែលហៅថា សៀគ្វីអេឡិចត្រូនិក ដើម្បីជាការទម្លាយនៃរបាំងបច្ចេកវិទ្យា។ ការផ្លាស់ប្តូរនេះឆ្លុះបញ្ចាំងពីសារសំខាន់កាន់តែខ្លាំងឡើងនៃឧបករណ៍ semiconductor នៅក្នុងឧស្សាហកម្មរថយន្តរបស់ចិន ដែលកំពុងផ្លាស់ប្តូរយ៉ាងឆាប់រហ័សទៅកាន់រថយន្តអគ្គិសនី និងរថយន្តបើកបរដោយខ្លួនឯង។

លោក ហ្វូ ប៊ិងហ្វេង ( Fu Bingfeng) អនុប្រធានប្រតិបត្តិនៃសមាគមក្រុមហ៊ុនផលិតរថយន្តចិនបាននិយាយក្នុងសន្និសីទឧស្សាហកម្ម semiconductor កាលពីថ្ងៃពុធ នៅទីក្រុង វូស៊ី (Wuxi )ថា ស្របពេលការកើនឡើងនៃការការពារនិយម នៃឧបករណ៍ semiconductor លើឧស្សាហកម្មរថយន្តបានក្លាយជាការប្រកួតប្រជែងជាសកលនោះ នៅពេលនេះខ្លួនអាចបង្កើតឧស្សាហកម្ម semiconductor រថយន្តថ្មីបានដោយខ្លួនឯង។

នេះគឺជាគំនិតផ្តួចផ្តើមដែលដំណើរការដោយរដ្ឋាភិបាលរបស់ប្រទេសចិន នៅក្នុងការលើកកម្ពស់ភាពជឿនលឿននៅក្នុងឧស្សាហកម្មរថយន្ត ខណៈដែលគេដឹងថា ក្រោមគំនិតផ្តួចផ្តើមនេះ ធ្វើឡើងក្នុងគោលដៅដើម្បីជំរុញដំណើរការផលិតកម្មរថយន្តកូនកាត់ និងរថយន្តអគ្គិសនីរហូតដល់ទៅជិត៧លានគ្រឿង។

តាមការសិក្សាដោយវិទ្យាស្ថានស្រាវជ្រាវរថយន្តចិន បានឱ្យដឹងងថា សម្រាប់ឧស្សាហកម្មរថយន្តធម្មតា គឺត្រូវការបន្ទះឈីបសរុបតិចជាង៥០០បន្ទះ ប៉ុន្តែសម្រាប់រថយន្តអគ្គិសនីគឺត្រូវការរហូតដល់ទៅ១ពាន់៣រយបន្ទះ ហើយប្រសិនបើរថយន្តនោះកាន់តែទំនើប តម្រូវការបន្ទះឈី បនឹងឡើងដល់៣ពាន់បន្ទះ៕

ដោយៈ សរ សុជាតិ