ការរៀបចំឲ្យមានយន្តការបែបនេះ ធ្វើឡើងក្រោយធនាគារជាតិសង្កេតឃើញការជួបបញ្ហាក្នុងការប្រើប្រាស់សេវាហិរញ្ញវត្ថុរបស់ប្រជាពលរដ្ឋ តែងតែកើតមានជារឿយៗនៅមួយរយៈចុងក្រោយនេះ។ បើគ្មានការប្រែប្រួលទេធនាគារជាតិនៃកម្ពុជានឹងចេញសេចក្តីប្រកាសស្តីពីយន្តការទទួលបណ្តឹង និងដោះស្រាយបញ្ហានេះក្នុងពេលឆាប់ៗខាងមុខនេះ។
លោកជំទាវ ជា សិរី ទេសាភិបាលរងធនាគារជាតិនៃកម្ពុជាបានគូសបញ្ជាក់ថា ធនាគារជាតិនៃកម្ពុជានឹងចេញសេចក្តីប្រកាសព័ត៌មានមួយស្តីពីយន្តការទទួលបណ្តឹង និងដោះស្រាយបណ្តឹងជូនអតិថិជនក្នុងវិស័យហិរញ្ញវត្ថុក្នុងពេលឆាប់ៗខាងមុខនេះ សំដៅជួយពន្លឿនការដោះស្រាយបញ្ហា និងផ្តល់ទំនុកចិត្តដល់អតិថិជនមកលើវិស័យហិរញ្ញវត្ថុកម្ពុជា។ តាមរយៈយន្តការនេះវានឹងជួយឲ្យអតិថិជនដឹងពីនីតិវិធី និងរបៀបនៃការដោះស្រាយបញ្ហា រួមទាំងរយៈពេលនៃការដោះស្រាយ និងការដាក់ពាក្យបណ្តឹងផងដែរ។ បើតាមការលើកឡើងរបស់លោកជំទាវ ជា សិរី យន្តការនេះនឹងត្រូវដាក់ឲ្យអនុវត្តន៍នៅតាមគ្រឹះស្ថានធនាគារ និងហិរញ្ញវត្ថុទាំងអស់នៅកម្ពុជា។
អត្ថបទគួរអាន
បើតាមការលើកឡើងរបស់លោកជំទាវ ជា សិរី ការគ្រោងដាក់ចេញនូវយន្តការទទួលបណ្តឹង និងដោះស្រាយបញ្ហាក្នុងវិស័យហិរញ្ញវត្ថុនេះធ្វើឡើយ ក្រោយធនាគារជាតិសង្កេតឃើញជារឿយៗអតិថិជនតែងតែជួបបញ្ហាក្នុងការដោះស្រាយបញ្ហាភាពយឺតយ៉ាវ បើទោះបីជា គ្រឹះស្ថានធនាគារ និងហិរញ្ញវត្ថុមានយន្តការដោះស្រាយបញ្ហាជូនអតិថិជនរបស់ខ្លួនក្ដី។ ម្យ៉ាងទៀត ធនាគារជាតិនៃកម្ពុជា តែងតែទទួលបានការត្អូញត្អែរ និងស្នើសុំជួយអន្តរាគមន៍ពីអតិថិជនជុំវិញបញ្ហានេះ នៅលើទំព័រហ្វេសប៊ុកផ្លូវការរបស់ធនាគារជាតិនៃកម្ពុជា។
ទេសាភិបាលរងធនាគារជាតិនៃកម្ពុជារូបនេះបានគូសបញ្ជាក់បន្ថែមថា បញ្ហារអាក់រអួលក្នុងការធ្វើប្រតិបត្តិការក្នុងប្រព័ន្ធហិរញ្ញវត្ថុនេះមិនមែនកើតឡើងតែក្នុងក្របខណ្ឌក្នុងស្រុកនោះទេ សូម្បីការធ្វើប្រតិបត្តិការទូទាត់សងប្រាក់ជាអន្តរជាតិក៏ជួបបញ្ហាដូចគ្នាដែរ។ ជាការកត់សម្គាល់របស់ថ្នាក់ដឹកនាំរូបនេះ បញ្ហាទាំងនោះភាគច្រើនកើតឡើង ដោយសារបញ្ហាបច្ចេកទេសរបស់ធនាគារអ្នកផ្ញើ ឬទទួល និងការធ្វើប្រតិបត្តិការច្រឡំរបស់អតិថិជនខ្លួនឯង។ ក្រៅពីយន្តការដោះស្រាយបញ្ហាក្នុងស្រុក ធនាគារជាតិនៃកម្ពុជាក៏នឹងរៀបចំយន្តការដោះស្រាយសម្រាប់ការធ្វើប្រតិបត្តិការហិរញ្ញវត្ថុជាអន្តរជាតិផងដែរ៕
