ផ្លូវជាតិលេខ៣តម្លៃជាង ២០០លានដុល្លារ នឹងសម្ពោធដាក់ឲ្យប្រើប្រាស់ជាផ្លូវការនៅថ្ងៃស្អែកនេះ

ឯកឧត្តមទេសរដ្ឋមន្ត្រី ស៊ុន ចាន់ថុល បានបញ្ជាក់ឲ្យដឹងថា ការបើកសម្ពោធដាក់ឲ្យប្រើប្រាស់ជាផ្លូវការ ផ្លូវជាតិលេខ៣ភ្នំពេញ-កំពតនេះ  ចាប់ពីរង្វង់មូលចោមចៅទៅដល់ទីរួមខេត្តកំពត គឺមានប្រវែងសរុបប្រមាណ ១៣៤គីឡូម៉ែត្រ ដែលគម្រោងសាងសង់ត្រូវបានបែងចែកជា ២ដំណាក់កាល គឺពីចោមចៅទៅបែកគូសមានប្រវែងប្រមាណ ៧០ គីឡូម៉ែត្រដែលត្រូវបានពង្រីកពី២គន្លង ទៅ៤គន្លង ព្រមទាំងមានសួនច្បារកណ្តាលទ្រូងផ្លូវ និងពីបែកគូសទៅកំពត ត្រូវបានពង្រីក១២ម៉ែត្រ ដែលមានមួយគន្លងទៅ មួយគន្លងមក និងបានសាងសង់រួចរាល់ជាស្ថាពរហើយ។

ផ្លូវជាតិលេខ៣ សូមជម្រាបថា គម្រោងសាងសង់ផ្លូវជាតិលេខ៣នេះ ប្រើប្រាស់រយៈពេលសាងសង់ ៤៨ខែ ដែលចំណាយថវិកាសរុបប្រមាណជិត ២២០លានដុល្លារអាមេរិក ដែលជាហិរញ្ញប្បទានសម្បទានពីសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា។

ទន្ទឹមនឹងការប្រកាសពីគម្រោងសម្ពោធផ្លូវជាតិលេខ៣នេះដែរ ឯកឧត្តម ស៊ុន ចាន់ថុល ក៏បានរំឭកពីបច្ចុប្បន្នភាពនៃការសាងសង់គម្រោងផ្លូវជាតិលេខ២ និងលេខ ២២ផងដែរ។ បើតាមរដ្ឋមន្ត្រីក្រសួងសាធារណការ និងដឹកជញ្ជូនរូបនេះ ក្រុមហ៊ុនសាងសង់ផ្លូវជាតិលេខ២ និង ផ្លូវលខ ២២ បានបន្តស្នើសុំពន្យាពេលសាងសង់រយៈពេល ១៦៨ ថ្ងៃបន្ថែមទៀតមកកាន់ក្រសួង ប៉ុន្តែក្រសួងពុំទាន់ឯកភាពក្នុងការពន្យារពេលនោះទេ ដ្បិតថាកន្លងមកក្រសួងសង្កេតឃើញថា ការសាងសង់របស់ក្រុមហ៊ុននេះ គឺមានភាពយឺតយ៉ាវខ្លាំងមែនទែន ហើយក៏មានការរអ៊ូរទាំពីប្រជាពលរដ្ឋទាក់ទងនឹងការងារសាងសង់យឺតរបស់ក្រុមហ៊ុននេះផងដែរ៕