ចំនួនអ្នកឆ្លងកូវីដ-១៩នៅឥណ្ឌាក្នុងថ្ងៃច័ន្ទដើមសប្តាហ៍នេះ បានបំបែកកំណត់ត្រាប្រវត្តិសាស្ត្រក្លាយជាចំនួនតួលេខអ្នកឆ្លងដ៏អាក្រក់បំផុតមិនធ្លាប់មាន ក្រោយអ្នកឆ្លងកូវីដ១៩ មានជាង ២៧ម៉ឺននាក់ ចំណែកអ្នកស្លាប់វិញបានកើនពីជិត១.៧០០នាក់ មកដល់ជាង ១៧ម៉ឺននាក់ហើយ។
ចំនួនគ្រែសម្រាប់ព្យាបាលអ្នកជំងឺកូវីដ-១៩ ធ្ងន់ធ្ងរ ក៏កំពុងជួបការខ្វះខាតផងដែរ ដោយហេតុថា នៅក្នុងរដ្ឋធានីញូដេលី គ្រែសម្រាប់ព្យាបាលអ្នកជំងឺកូវីដកម្រិតធ្ងន់មានតិចជាង១០០គ្រែប៉ុណ្ណោះ គ្រាដែលពលរដ្ឋរស់នៅក្នុងរដ្ឋធានីមួយនេះ មានដល់ជាង ២០លាននាក់។ កត្តានេះហើយទើបបណ្តាលឲ្យកំណើនអ្នកស្លាប់កើនឡើងយ៉ាងលឿនរហ័សបែបនេះ។
សូមរំឭកផងដែរថា កត្តាចម្បងនៃការឆ្លងរាតត្បាតខ្លាំង ឬចាត់ទុកជារលកទី ៣នៃ កូវីដ-១៩ ក្នុងប្រទេសឥណ្ឌាពេលនេះ នៅតែត្រូវគេមើលឃើញថា ដោយសារតែមានការជួបជុំគ្នាយ៉ាងកកុញនៅក្នុងឱកាសប្រារព្ធពិធីបុណ្យ គុម មេឡា (Kumbh Mela) នៃសាសនាហិណ្ឌូ ដែលពិធីបុណ្យនេះនឹងត្រូវអូសបន្លាយ ពេញមួយខែមេសានេះតែម្តង។
អត្ថបទទាក់ទង
ដោយមានក្តីបារម្ភពីការឆ្លងដ៏លឿនរហ័សក្នុងចំនួនដ៏សម្បើមនៅឥណ្ឌា ប្រទេសមួយចំនួនបានផ្តើមផ្អាកជើងហោះហើរជាមួយប្រទេសឥណ្ឌាបណ្តើរៗទៀតហើយ ដើម្បីធានាបានពីការចម្លងចូលក្នុងប្រទេសរបស់ខ្លួនក្នុងនោះរួមមាន ហុងកុង និងញូហ្សេលែន ជាដើម។
កាលពីពេលកន្លងទៅថ្មីៗ វិទ្យាស្ថានសេរ៉ូមដែលជាអ្នកទទួលបន្ទុកផលិតវ៉ាក់សាំងរបស់ឥណ្ឌាបានប្រកាសស្វែងរកជំនួយពីរដ្ឋាភិបាលក្នុងការផលិតវ៉ាក់សាំងសម្រាប់ពលរដ្ឋរបស់ខ្លួន ក្រោយប្រទេសកំពុងខ្វះខាតវ៉ាក់សាំងខ្លាំង។
ឥណ្ឌាខ្វះវ៉ាក់សាំងក៏ដោយសារតែខ្លួនមានការនាំចេញច្រើន ក្នុងនោះ មានទាំងសម្រាប់លក់ មានទាំងទ្រង់ទ្រាយជាជំនួយ ពិសេសការរួមចំណែកដល់យន្តការ COVAX រួមផ្សំនឹងតម្រូវការក្នុងស្រុកក៏មានច្រើនណាស់ដែរ។
ប្រការនេះបានជំរុញឲ្យប្រទេសអ្នកផលិតវ៉ាក់សាំងធំមួយក្នុងលោក បែរទៅបញ្ជាទិញវ៉ាក់សាំងបន្ថែមពីបរទេសរួមមាន វ៉ាក់សាំងរបស់អាមេរិក Pfizer Johnson and Johnson Moderna និងរបស់រុស្សី StupnikV ជាដើម។ បើតាមភ្នាក់ងារព័ត៌មាន Reuters រដ្ឋាភិបាលឥណ្ឌានឹងបញ្ជាទិញវ៉ាក់សាំងរបស់រុស្សីមុនគេធ្វើយ៉ាងណា ចាក់ជូនពលរដ្ឋខ្លួនឲ្យបាន ១២៥លាននាក់។
សូមបញ្ជាក់ថា រដ្ឋាភិបាលលោក ណារីន ដ្រាម៉ូឌី ចាប់តាំងពីខែមីនា គ្រាដែលកំពុងខ្វះខាតវ៉ាក់សាំងខ្លាំង បានផ្តើមរឹតត្បិតការនាំចេញវ៉ាក់សាំង AstraZeneca (Covishield) ដែលខ្លួនផលិតបាន។ ទោះបីយ៉ាងណាក៏ដោយ វាមិនអាចទប់ទល់ជាមួយតម្រូវការដ៏ច្រើនលើសលប់របស់ពលរដ្ឋឥណ្ឌាទាំងជាង ១ពាន់លាននាក់បានទេ ជាហេតុទាមទារឲ្យមានការបញ្ជាទិញពីបរទេសបន្ថែម៕
ទស្សនាវីដេអូ៖
ចុច Like Facebook Page របស់ខេមបូណូមីស និងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
