មន្ត្រីអាកាសចរស៊ីវិល៖ គ្មានការផ្តល់ឱ្យអ្នកដំណើរជិះយន្តហោះដោយឥតគិតថ្លៃ ក្នុងអំឡុងពេលដំណើរការសាកល្បងព្រលានយន្តហោះសៀមរាបថ្មីនោះទេ

ការចេញមកអះអាងបែបនេះរបស់មន្ត្រីអាកាសចរណ៍ស៊ីវិល ធ្វើឡើងក្រោយមានសារព័ត៌មានមួយចំនួនចុះផ្សាយថា នៅក្នុងអំឡុងបើកដំណើរការសាងល្បង១០ថ្ងៃខាងមុន អ្នកដំណើរអាចជិះយន្តហោះដោយឥតគិតថ្លៃ ដែលធ្វើឲ្យមហាជនមានការយល់ច្រឡំ។

ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានគូសបញ្ជាក់ថា គ្មានការផ្តល់ឲ្យអ្នកដំណើរអាចជិះយន្តដោយឥតគិតថ្លៃក្នុងអំឡុងពេលបើកដំណើរការសាងល្បងអាកាសយានដ្ឋានអន្តរជាតិសៀមរាបអង្គរចន្លោះពីថ្ងៃទី៥-១៥ ខែតុលា ខាងមុខនោះទេ។ ការអះអាងបែបនេះធ្វើឡើងបន្ទាប់ពីអ្នកប្រើប្រាស់បណ្តាញសង្គម និងសារព័ត៌មានមួយចំនួនបានផ្សព្វផ្សាយថា ក្នុងពេលបើកដំណើរការសាកល្បងនៃអាកាសយានដ្ឋានអន្តរជាតិសៀមរាបអង្គរថ្មីរយៈពេល១០ថ្ងៃខាងមុខ នឹងមានការផ្តល់ការធ្វើដំណើរតាមយន្តហោះដោយឥតថ្លៃ។ បើតាមការលើកឡើងរបស់មន្ត្រីជាន់ខ្ពស់រូបនេះ នៅក្នុងអំឡុងពេលបើកដំណើរការសាកល្បងនេះ ព្រលានយន្តហោះនេះនឹងអនុញ្ញាតឱ្យយន្តហោះប្រភេទឆាតទ័រ និងការហោះទាំងឡា ដែលមិនស្វែងរកប្រាក់ចំណេញ ដូចជាការចុះចតសម្រាប់យន្តហោះ VIP, ប្រភេទយន្តហោះសម្រាប់បណ្តុះបណ្តាលដល់អ្នកបើកយន្តហោះថ្មី និងការហោះហើរសាកល្បងបច្ចេកទេសតែប៉ុណ្ណោះ។

បើតាមសេចក្តីជូនដំណឹងរបស់រដ្ឋលេខាធិការដ្ឋានអាកាសចរស៊ីវិលកាលពីថ្ងៃទី២៦ កក្កដា ឆ្នាំ២០២៣ បានឱ្យដឹងថា អាកាសយានដ្ឋានអន្តរជាតិសៀមរាបអង្គរថ្មី ដែលមានទីតាំងស្ថិតនៅភូមិក្រៀលពង ឃុំពពេល និងភូមិប្រវាល ឃុំតាយ៉ក ស្រុកសូទ្រនិគម ខេត្តសៀមរាប គ្រោងដាក់ឱ្យដំណើរការចាប់ពីថ្ងៃទី១៦ ខែតុលា ឆ្នាំ២០២៣តទៅ។ ក្រោយព្រលានយន្តហោះថ្មីនេះដាក់ឲ្យដំណើរការ គ្រប់ជើងហោះហើរអាជីវកម្មដឹកជញ្ជូនអ្នកដំណើរ និងទំនិញតាមផ្លូវអាកាស ដែលកំពុងប្រតិបត្តិការហោះហើរនៅអាកាសយានដ្ឋានអន្តរជាតិសៀមរាបបច្ចុប្បន្ន នឹងផ្ទេរទាំងស្រុង និងតែមួយលើកគត់ទៅកាន់អាកាសយានដ្ឋានអន្តរជាតិសៀមរាបអង្គរថ្មី។

គួរបញ្ជាក់ថា អាកាសយានដ្ឋានអន្តរជាតិនេះសាងសង់ក្រោមទម្រង់វិនិយោគ«សាងសង់-ធ្វើអាជីវកម្ម-ផ្ទេរ» ហើយជាការកសាងហេដ្ឋារចនាសម្ព័ន្ធថ្មីទាំងស្រុងលើផ្ទៃដី៧០០ហិកតា និងមានដីបម្រុងទុក១ពាន់ហិកតាសម្រាប់កសាងតំបន់សេដ្ឋកិច្ចពិសេស/តំបន់ឧស្សាហកម្មរណបឱ្យអាកាសយានដ្ឋានអន្តរជាតិសៀមរាបអង្គរ ដែលអាចហៅថា«ទីក្រុងអាកាសយានដ្ឋាន/Airport City» នាពេលខាងមុខ។ អាកាសយានដ្ឋានអន្តរជាតិដែលអភិវឌ្ឍន៍ដោយក្រុមហ៊ុន Angkor International Airport Investment (AIAI) មានតម្លៃវិនិយោគប្រមាណ១ពាន់១រយលានដុល្លារ ខណៈការវាយតម្លៃដំបូងគ្រោងចំណាយប្រមាណ៨៨០លានដុល្លារអាមេរិកប៉ុណ្ណោះ។

សម្រាប់ការដាក់ឲ្យដំណើរការការសាងសង់ដំណាក់កាលទី១នេះ ព្រលានយន្តហោះនេះ មានសមត្ថភាពអាចឲ្យយន្តហោះធុនធំ ដែលប្រើប្រាស់កូដអ៊ី ដូចជា A-340-300, A-350-900 និង B777 និង B747 ចុះចតបាន។ ព្រលានយន្តហោះនេះមានចំណតយន្តហោះចំនួន៣៨យន្តហោះ ដែលអាចទទួលអ្នកដំណើរបានពី៧លាននាក់ទៅជាង១០លាននាក់ និងអាចទទួលជើងហោះហើរពីជិត៦ម៉ឺនជើងទៅជាង៨ម៉ឺនជើង និងទំនិញពី១ម៉ឺនតោនក្នុង១ឆ្នាំទៅ៣ម៉ឺនតោនក្នុង១ឆ្នាំពីឆ្នាំ២០២៣ដល់ឆ្នាំ២០៤០៕