ប្រភពពីវិមានក្រឹមឡាំងឲ្យដឹងថា រុស្ស៊ីបានធ្វើតេស្ដមីស៊ីលល្បឿនលឿនជាងសំឡេង និងមីស៊ីលប្រដេញប្រកបដោយជោគជ័យ អំឡុងការធ្វើសមយុទ្ធយោធា របស់កងកម្លាំងនុយក្លេអ៊ែររុស្ស៊ី។ លោក ពូទីនបានដឹកនាំ និងបញ្ជាដោយផ្ទាល់ការធ្វើតេស្តមីស៊ីលទាំងនេះ ហើយប្រធានាធិបតីបេឡារុស លោក អាឡិចហ្សាន់ដ័រ លូកាសឈិនកូ (Alexander Lukashenko) ក៏បានចូលរួមជាមួយលោក ពូទីនផងដែរ ក្នុងការត្រួតពិនិត្យការធ្វើសមយុទ្ធ យុទ្ធសាស្ត្រនុយក្លេអ៊ែរកាលពីថ្ងៃសៅរ៍នេះ។ គួរកត់សម្គាល់ថា បេឡារុសជាប្រទេសមួយស្ថិតក្នុងតំបន់អឺរ៉ុប ប៉ុន្តែបច្ចុប្បន្នរបបដឹកនាំប្រទេសមួយនេះ ហាក់មានទំនោរខ្លាំងទៅលើរដ្ឋាភិបាលទីក្រុងម៉ូស្កូ ជាក់ស្តែងប្រទេសទាំងពីរទើបបានបញ្ចប់សមយុទ្ធទ្រង់ទ្រាយធំរួមគ្នាមួយ រយៈពេល១០ថ្ងៃ នៅជិតព្រំដែនអ៊ុយក្រែន ដោយមិនខ្វល់ពីភាពតានតឹងសោះឡើយ។
សូមជម្រាបថា ការធ្វើសមយុទ្ធនុយក្លេអ៊ែរនេះ ធ្វើឡើងនៅក្រោយពេលតែប៉ុន្មានម៉ោងប៉ុណ្ណោះ បន្ទាប់ពីលោកចូ បៃឌិន បានចេញមកព្រមានម្តងទៀតថា ប្រធានាធិបតីរុស្ស៊ី បានសម្រេចចិត្តរួចហើយ ក្នុងការឈ្លានពានអ៊ុយក្រែន។ ប្រធានាធិបតីអាម៉េរិក លោក ចូ បៃឌិន បានបញ្ជាក់ច្បាស់ៗបែបនេះដោយបន្តថា ក្រុងមូស្គូ បានបន្តផ្សាយព័ត៌មានមិនពិត ដើម្បីយកលេសវាយប្រហារលើក្រុងកៀវ។ ការលើកឡើងរបស់លោកបៃឌិនបែបនេះទៀតសោត ធ្វើឡើងស្របពេលមន្ត្រីអាម៉េរិកបានបញ្ចេញរបាយការណ៍ថ្មីមួយ ជុំវិញរុស្ស៊ីបង្កើនកម្លាំងទ័ពដល់ ១៩ម៉ឺននាក់ នៅតំបន់ក្បែរព្រំដែនអ៊ុយក្រែន។
អត្ថបទគួរអាន
វិបត្តិអ៊ុយក្រែនកាន់តែក្តៅគគុកឡើងៗទោះមានកិច្ចខិតខំប្រឹងប្រែងពីគ្រប់ភាគីពាក់ព័ន្ធ ដោយប្រើប្រាស់ធម៌ក្តៅផង និងធម៌ត្រជាក់ផងក្តី។ ប្រការនេះធ្វើឲ្យ ប្រធានាធិបតីអ៊ុយក្រែនលោក Volodymyr Zelenskyy ជាថ្មីម្តងទៀតនៅថ្ងៃសៅរ៍បានអំពាវនាវឱ្យប្រធានាធិបតីរុស្ស៊ីលោកវ្ល៉ាឌីមៀ ពូទីន ជួបពិភាក្សាគ្នា ដើម្បីស្វែងរកដំណោះស្រាយចំពោះវិបត្តិនៅអ៊ុយក្រែន។ ប៉ុន្តែមិនទាន់មានការឆ្លើយតបណាមួយ ពីវិមានក្រឹមឡាំងនោះទេ ខណៈដែលការស្នើសុំជួបជាមួយសមភាគីរុស្សីលើកមុនៗ ត្រូវបានបដិសេធ។
ជុំវិញវិបត្តិនៅអ៊ុយក្រែននេះដែរ ភាគីចិនឯណោះវិញ ដែលជាលើកទីមួយហើយ រដ្ឋមន្ត្រីការបរទេសក្រុងប៉េកាំងបានចេញមុខនិយាយដោយផ្ទាល់ពីបញ្ហានៅអ៊ុយក្រែន ដោយកាលពីថ្ងៃសោរ៍សប្ដាហ៍មុននេះ រដ្ឋមន្ត្រីការបរទេសចិនលោក Wang Yi បាននិយាយថា អ៊ុយក្រែនមិនគួរក្លាយជាទីលានប្រកួតប្រជែងរបស់មហាអំណាចធំៗនោះទេ។ លោកទទូចឲ្យ ភាគីទាំងអស់គួរតែអង្គុយចុះ ដើម្បីពិភាក្សាស៊ីជម្រៅ ហើយបង្កើតផែនទីបង្ហាញផ្លូវច្បាស់លាស់មួយ ឆ្ពោះទៅរកច្រកចេញ។ ប្រមុខការទូតក្រុងប៉េកាំងរូបនេះ បន្តថា អធិបតេយ្យភាព ឯករាជ្យភាព និងបូរណភាពទឹកដីនៃប្រទេសណាមួយ គួរតែត្រូវបានគោរព និងការពារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
