លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបងបានឱ្យដឹងថា បច្ចុប្បន្នពោតស្នូលត្រូវបានលក់ចេញក្នុងតម្លៃ៣៨០រៀល ក្នុង១គីឡូក្រាម និងគ្រាប់ពោតលក់ចេញក្នុងតម្លៃ៩២០រៀល ក្នុង១គីឡូក្រាម តម្លៃនេះមានការធ្លាក់ចុះតិចតួចបើធៀបនឹងតម្លៃលក់ចេញកាលពីពេលកន្លងទៅ ដែលអាចលក់ចេញបានចន្លោះពី១,១០០ទៅ១,២០០រៀល ក្នុងមួយគីឡូក្រាម។ បើតាមការគូសបញ្ជាក់របស់ប្រធានមន្ទីរកសិកម្មរូបនេះ គ្រាប់ពោតក្រហមនៅខេត្តបាត់ដំបង ប្រមាណ៦៥% ត្រូវបាននាំចេញទៅលក់នៅប្រទេសថៃ ហើយក្រៅពីនេះត្រូវបានកែច្នៃសម្រាប់បម្រើតម្រូវការប្រើប្រាស់ក្នុងស្រុក និងនាំចេញទៅលក់នៅប្រទេសៗផ្សេងៗ។ បើទោះបីតម្លៃពោតក្រហមមានការធ្លាក់ចុះបន្តិចក្តី តែប្រធានមន្ត្រីកសិកម្មរូបនេះអះអាងថា កសិករដាំដុះពោតនៅតែទទួលបានផលចំណេញ ហើយការចំណេញតិច ឬច្រើនវាអាស្រ័យលើបច្ចេកទេសដាំដុះ និងការថែទាំរបស់កសិករ។
ពាក់ព័ន្ធបញ្ហាធ្លាក់ចុះតម្លៃពោតក្រហមនេះដែរ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា តម្លៃពោតក្រហមតែងតែមានការធ្លាក់ចុះនៅរដូវនេះជារៀងរាល់ឆ្នាំ ដោយសារថៃ ដែលជាឈ្មួញប្រមូលទិញពោតពីកម្ពុជា ដល់រដូវប្រមូលផងដូចគ្នា ដែលធ្វើតម្រូវការទិញមានការធ្លាក់ចុះ ហើយតម្លៃក៏មានការធ្លាក់ចុះទៅតាមនឹងដែរ។ ទន្ទឹមនឹងនេះមន្ត្រីជាន់ខ្ពស់រូបនេះលើកទឹកចិត្តឱ្យកសិករអ្នកដាំពោតពិចារណាចងក្រងគ្នាជាសហគមន៍ រួចធ្វើផលិតកម្មតាមកិច្ចសន្យា។
បើតាមការគូសបញ្ជាក់របស់ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង ផ្ទៃដីដំណាំពោតក្រហម នៅខេត្តបាត់ដំបង ក្នុងឆ្នាំ២០២៤ មានប្រមាណ៥ម៉ឺន៤ពាន់ហិកតា គឺតិចជាងឆ្នាំ២០២៣ ប្រមាណជាង៣ម៉ឺនហិកតា ដោយសារកសិករមួយចំនួនបានបង្វែរដីទៅដាំដំឡូងមី ដែលមានទីផ្សារល្អ និងម្យ៉ាងទៀតនៅតំបន់មួយចំនួនដែលធ្លាប់ដាំពោត បានរងផលប៉ះពាល់ដោយសារកត្តារាំងស្ងួតពីបាតុភូតអ៊ែលនីណូ៕
អត្ថបទ៖ បូ ដូឡា
