រុស្សីបញ្ជូនទ័ពចូលតំបន់ផ្តាច់ខ្លួននៅអ៊ុយក្រែន ក្រោយទទួលស្គាល់ជារដ្ឋឯករាជ្យ

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចេញបញ្ជាឱ្យកងទ័ពរុស្ស៊ី ចូលទៅកាន់តំបន់ចំនួនពីរ ដែលបច្ចុប្បន្នកំពុងកាន់កាប់ដោយក្រុមឧទ្ទាមផ្ដាច់ខ្លួននៅភាគខាងកើតប្រទេសអ៊ុយក្រែន។ ការបញ្ជូនទ័ពនេះត្រូវបានរុស្សីអះអាងថាធ្វើឡើង ក្រោមក្របខណ្ឌនៃបេសកកម្មរក្សាសន្តិភាព ក្រោយនៅប៉ុន្មានថ្ងៃចុងក្រោយមានការប៉ះទង្គិចគ្នាកាន់តែខ្លាំងឡើងរវាងក្រុមឧទ្ទាមនិង ទាហានអ៊ុយក្រែន។ នៅចំពោះមុខបញ្ហានេះ សហរដ្ឋអាមេរិកកំពុងវាយតម្លៃថាតើបទបញ្ជារបស់លោក ពូទីន គឺជាសកម្មភាពឈ្លានពាន ឬក៏យ៉ាងណា។

ផែនទីតំណាង

លោក ពូទីន នៅព្រឹកថ្ងៃអង្គារសប្ដាហ៍នេះ បានបញ្ជាឱ្យកងទ័ពរុស្ស៊ីចូលទៅក្នុងតំបន់កាន់កាប់ដោយក្រុមឧទ្ទាមដែលធាតុពិតមានការគាំទ្រពីម៉ូស្គូ ដោយអះអាងថា វាជាបេសកកម្មរក្សាសន្តិភាព ពោលគឺនៅតែប៉ុន្មានម៉ោងប៉ុណ្ណោះ បន្ទាប់ពីលោកបានចុះហត្ថលេខាលើច្បាប់មួយ ទទួលស្គាល់ឯករាជ្យភាពរបស់តំបន់ផ្តាច់ខ្លួនទាំងពីររបស់អ៊ុយក្រែនគឺ តំបន់ដូណេតក៍ (Donetsk) និង លូហាន់ក៍ (Luhansk) ដែលរុស្ស៊ីហៅឈ្មោះជារួមថា ដុនបាស (Donbass) «ជារដ្ឋឯករាជ្យ»។ ការប្រកាសទទួលស្គាល់តំបន់ដែលក្រុមឧទ្ទាមកាន់កាប់ នៅភាគខាងកើតអ៊ុយក្រែនជារដ្ឋឯករាជ្យ បានសេចក្តីថា រុស្ស៊ីនឹងមិនទទួលស្គាល់តំបន់ទាំងនោះ ថាជាទឹកដីអ៊ុយក្រែនទៀតឡើយ។

ដូចទៅនឹងអ្វីដែលលោកខាងលិចបានព្រមានជារឿយៗយ៉ាងដូច្នេះមែនទស្សនិកជន ប្រការនេះវាជាការត្រួសត្រាយផ្លូវឲ្យរុស្ស៊ី បញ្ជូនកងទ័ពដោយបើកចំហចូលទៅកាន់តំបន់ ហើយប្រើប្រាស់លេសថា ជាការចូលមកការពារតំបន់ទាំងនោះ ពីការវាយប្រហារដោយកងទ័ពអ៊ុយក្រែន។

យ៉ាងណាក៏ដោយ ការប្រកាសរបស់លោក ពូទីន បានទាក់ទាញការថ្កោលទោសជាអន្តរជាតិ និងការដាក់ទណ្ឌកម្មភ្លាមៗរបស់សហរដ្ឋអាមេរិក ដូចជាការបញ្ឈប់សកម្មភាពអាជីវកម្មរបស់សហរដ្ឋអាមេរិក នៅក្នុងតំបន់ទាំងពីរខាងលើ និងហាមឃាត់ការនាំចូលទំនិញទាំងអស់ពីតំបន់ទាំងនោះផងដែរ។ សេតវិមានបានបន្ថែមថា ខ្លួននឹងប្រកាសវិធានការបន្ថែមទៀតនៅថ្ងៃអង្គារនេះ។

ដោយឡែក អង់គ្លេស បារាំង និងអាឡឺម៉ង់ក៏បានសន្យាថា នឹងដាក់ទណ្ឌកម្ម ដើម្បីឆ្លើយតបទៅនឹងការទទួលស្គាល់របស់រុស្ស៊ីចំពោះតំបន់ផ្តាច់ខ្លួនទាំងពីរផងដែរ។

ទន្ទឹមនឹងនេះ ក្រុមប្រឹក្សាសន្តិសុខអង្គការសហប្រជាជាតិបានបើកកិច្ចប្រជុំបន្ទាន់មួយនៅភ្លាមៗក្រោយការទទួលស្គាល់តំបន់ផ្តាច់ខ្លួនទាំងពីរ ដោយរុស្សី។ លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ បាននិយាយថា ការទទួលស្គាល់របស់ទីក្រុងមូស្គូលើតំបន់ភាគខាងកើតអ៊ុយក្រែនជារដ្ឋឯករាជ្យ គឺជាផ្នែកមួយនៃការប៉ុនប៉ងរបស់ខ្លួនដើម្បីបង្កើតលេសសម្រាប់ការឈ្លានពានបន្ថែមទៀតលើអ៊ុយក្រែនតែប៉ុណ្ណោះ។

ជាការឆ្លើយបតប ឯកអគ្គរដ្ឋទូតរុស្ស៊ី Vasily Nebenzia បានព្រមានមហាអំណាចលោកខាងលិច ត្រូវគិតឲ្យបានពីរដងសិនមុននឹងនិយាយអ្វីមួយ ហើយទទូចកុំធ្វើឱ្យស្ថានភាពកាន់តែអាក្រក់ទៅៗ។ ដោយឡែក អាមេរិក អង់គ្លេស និងបារាំងបានស្នើឲ្យមានកិច្ចប្រជុំក្រុមប្រឹក្សាសន្តិសុខម្តងទៀត នៅថ្ងៃចន្ទសប្តាហ៍ក្រោយ។

នៅចំពោះមុខស្ថានការណ៍ដ៏តានតឹង ស្ថានទូតចិនប្រចាំនៅអ៊ុយក្រែននៅថ្ងៃអង្គារ បានព្រមានទៅកាន់ជនជាតិចិនឲ្យប្រុងប្រយ័ត្នពីការធ្វើដំណើរទៅតំបន់ដែលអស្ថិរភាព តែចិនមិនបានប្រាប់ឲ្យជនជាតិខ្លួនចាកចេញពីអ៊ុយក្រែនដូចដែលប្រទេសលោកខាងលិចមួយចំនួនបានធ្វើនោះទេ៕