ក្រសួងពាណិជ្ជកម្មនិងឧស្សាហកម្មសិង្ហបុរីបានគូសបញ្ជាក់ទៀតថា ទន្ទឹមនឹងកំណើនសេដ្ឋកិច្ចជារួម ទំហំផលិតផលក្នុងស្រុកសរុបរបស់សិង្ហបុរីក៏ត្រូវបានគេព្យាករថានឹងមានកំណើនពី ៦%ទៅ៧% ផងដែរសម្រាប់ពេញមួយឆ្នាំ ២០២១នេះតែម្តង។ កំណើនសេដ្ឋកិច្ច វិជ្ជមាននេះ សបញ្ជាក់ពីការអនុវត្តគោលនយោបាយស្តារសេដ្ឋកិច្ចក្រោយកូវីដ១៩របស់សិង្ហបុរីបានល្អ គួបផ្សំនឹងដំណើរងើបឡើងវិញនៃសេដ្ឋកិច្ចរបស់ប្រទេសធំៗ ដែលជាដៃគូររបស់សិង្ហបុរីផងដែរ។
ជាមួយនឹងស្ថានភាពកូវីដ ១៩ នៅសិង្ហបុរី មានស្ថិរភាព ខណៈដែលកម្មវិធីចាក់វ៉ាក់សាំងកំពុងដំណើរការទៅមុខយ៉ាងរលូន និង ក្នុងចំនួនកាន់តែច្រើនឡើងៗ សេដ្ឋកិច្ចសិង្ហបុរីត្រូវបានគេរំពឹងថា នឹងបន្តងើបឡើងវិញ ពីមួយជំហានទៅមួយជំហាន នៅឆមាសទីពីរនៃឆ្នាំ២០២១នេះ ដែលគាំទ្រដោយវិស័យអាទិភាពរបស់ខ្លួន។
ស្ថានភាពកូវីដ១៩បានប្រសើរឡើងនៅសិង្ហបុរី បូករួមនឹងការបង្កើតប្រព័ន្ធភាពស៊ាំបានជោគជ័យ រដ្ឋាភិបាលសិង្ហបុរី បានឈានទៅបន្ធូរបន្ថយការរឹតបន្តឹងក្នុងស្រុក និងតាមព្រំដែនដែលវាបានដើរតួនាទីសំខាន់ ជាផ្នែកមួយក្នុងការគាំទ្រដល់ការងើបឡើងវិញនៃវិស័យ ដែលរងគ្រោះអំឡុងការរាលដាលកូវីដ១៩កន្លងមក ដូចជាវិស័យអាហារដ្ឋាន ផ្សារទំនើប និងអាជីវកម្មខ្នាតតូច និងមធ្យមដទៃទៀត។
អត្ថបទគួរអាន
យ៉ាងណាមិញ វិស័យអាកាសចរណ៍ និងទេសចរណ៍សិង្ហបុរីនៅតែមិនទាន់អាចស្តារឡើងវិញបានល្អនៅឡើយទេ ដោយហេតុថា វិស័យទាំងពីរនេះពាក់ព័ន្ធនឹងចរន្តការធ្វើដំណើរ និងទេសចរណ៍ជាសកល។ ដរាបណាប្រទេសកាន់តែច្រើននៅបន្តបិទព្រំដែន និង ជើងហោះហើរ នោះវិស័យអាកាសចរណ៍ និងទេសចរណ៍សិង្ហបុរីនៅបន្តជាប់គាំងដដែល។
សូមជម្រាបផងដែរថា កាលពីពេលថ្មីៗនេះប្រទេសដែលមានសេដ្ឋកិច្ចរីកចម្រើនជាងគេនៅអាស៊ានមួយនេះ បានប្រកាសពីការចាប់ផ្តើមចរចាកិច្ចព្រមព្រៀងសេដ្ឋកិច្ចឌីជីថលជាមួយចក្រភពអង់គ្លេស ដែលវានឹងក្លាយជាកិច្ចព្រមព្រៀងដំបូងគេក្នុងប្រវត្តិសាស្ត្រ ដែលបានធ្វើឡើងរួមគ្នារវាងប្រទេសនៅទ្វីបអាស៊ី និង នៅទ្វីបអឺរ៉ុប។ សេដ្ឋកិច្ចឌីជីថល ដើរតួនាទីសំខាន់ណាស់សម្រាប់ការរក្សាភាពធន់នៃសេដ្ឋកិច្ច ទោះបីជាមានការប្រឈមនឹងការរីករាលដាលនៃជំងឺរាតត្បាតកូវីដ-១៩ក៏ដោយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
