ទីក្រុងវ៉ាស៊ីនតោន និងសម្ព័ន្ធមិត្តជឿជាក់ថា កូរ៉េខាងជើងអាចនឹងចាប់ផ្តើមការសាកល្បងគ្រាប់បែកនុយក្លេអ៊ែរឡើងវិញជាលើកដំបូងចាប់តាំងពីឆ្នាំ ២០១៧ ប៉ុន្តែអ្នកជំនាញនិយាយថា ប្រទេសកូរ៉េខាងត្បូង និងជប៉ុន រួមទាំងអាមេរិកមានជម្រើសល្អតិចតូចណាស់ សម្រាប់ការពារខ្លួន ឬឆ្លើយតបចំពោះទង្វើបែបនេះរបស់ទីក្រុងព្យុងយ៉ាង។
អនុរដ្ឋមន្ត្រីការបរទេសកូរ៉េខាងត្បូងលោក លោក Cho Hyun-dong បានពិភាក្សាបញ្ហាជាមួយសមភាគីជប៉ុនលោក Takeo Mori និងអនុរដ្ឋមន្ត្រីការបរទេសអាមេរិក លោកស្រី Wendy Sherman នៅទីក្រុងតូក្យូ។
ក្នុងនោះ លោកឆូ យ៉ុន ដុន អនុរដ្ឋមន្ត្រីការបរទេសកូរ៉េខាងត្បូង បានប្រាប់សន្និសីទសារព័ត៌មានរួមមួយថា «កូរ៉េខាងត្បូង អាមេរិក និងជប៉ុន បានព្រមព្រៀងគ្នាថា រូបភាពនៃការឆ្លើយតបពីសំណាក់ប្រទេសទាំងបីនេះ គឺនឹងធ្វើឡើងយ៉ាងខ្លាំងក្លា មិនអាចមានអ្វីមកផ្ទឹមបានទេ ប្រសិនបើកូរ៉េខាងជើងសម្រេចចិត្តសាកល្បងគ្រាប់បែកនុយក្លេអ៊ែរលើកទីប្រាំពីររបស់ខ្លួនមែននោះ»។
មែនទែនទៅ សហរដ្ឋអាមេរិក និងសម្ព័ន្ធមិត្តបានផ្តល់ព័ត៌មានលម្អិតមួយចំនួនអំពីវិធានការថ្មី ដែលពួកគេអាចនឹងប្រើក្នុងការឆ្លើយតបទៅនឹងការបន្តការសាកល្បងនុយក្លេអ៊ែរឡើងវិញរបស់ទីក្រុងព្យុងយ៉ាង ដោយអ្នកនាំពាក្យក្រសួងការបរទេសសហរដ្ឋអាមេរិក លោក Vedant Patel បានលើកឡើងកាលពីថ្ងៃពុធ ទី ២៦ តុលាដែរថា «សកម្មភាពបង្កហេតុទាំងអម្បាលម៉ានរបស់កូរ៉េខាងជើងបាននិងកំពុងគំរាមកំហែងយ៉ាងធ្ងន់ធ្ងរដល់ស្ថិរភាពក្នុងតំបន់»។
ការសាកល្បងនុយក្លេអ៊ែរលើកចុងក្រោយរបស់កូរ៉េខាងជើង បានបង្ហាញឱ្យឃើញថា ប្រទេសចិន និងរុស្ស៊ីនៅតែជួយបន្តបន្ធូរបន្ថយទណ្ឌកម្មរបស់អង្គការសហប្រជាជាតិទៅលើទីក្រុងព្យុងយ៉ាង ក្រោយពីមានភាពរកាំរកូសរវាងទំនាក់ទំនងវ៉ាស៊ីនតោន និងម៉ូស្គូក្នុងសំណុំរឿងសង្គ្រាមនៅអ៊ុយក្រែន និងរវាងអាមេរិក និងចិនលើភាពតានតឹងនៃកោះតៃវ៉ាន់។
អត្ថបទគួរអាន
នៅពេលត្រូវបានសួរអំពីការសាកល្បងនុយក្លេអ៊ែររបស់កូរ៉េខាងជើង ឯកអគ្គរដ្ឋទូតរុស្ស៊ីប្រចាំនៅអង្គការសហប្រជាជាតិ លោកវ៉ាស៊ីលី នេបេនហ្ស៊ី (Vassily Nebenzia) បានថ្លែងថា យើងត្រូវដោះស្រាយនៅពេលវាកើតឡើងមែន ដោយយើងមិនអាចចេះតែស្មានទុកមុននោះទេ តែបើវាអ៊ីចឹងមែននោះ យើងក៏មិនពេញចិត្តនឹងការសាកល្បងនោះដែរ»។
ម្យ៉ាងវិញទៀត នៅក្នុងសន្និសីទសារព័ត៌មាននៅទីក្រុងតូក្យូ លោកស្រី វេនឌី ស៊ើមែន (Wendy Sherman) បានជំរុញឲ្យរបបក្រុងព្យុងយ៉ាងបញ្ឈប់ការបង្កហេតុ ដូចជាការសាកល្បងនុយក្លេអ៊ែរជាដើម ដែលវាបង្កឱ្យមានអស្ថិរភាពយ៉ាងខ្លាំងសម្រាប់តំបន់ និងសន្តិសុខនៃពិភពលោកទាំងមូល។
ទន្ទឹមគ្នានេះ អ្នកនាំពាក្យក្រសួងការបរទេសចិន លោក Wang Wenbin បានអំពាវនាវឱ្យប្រទេសទាំងអស់ត្រូវទទួលស្គាល់ និងយល់អំពី «ឫសគល់នៃភាពជាប់គាំងដ៏យូរអង្វែង» លើកម្មវិធីអាវុធនុយក្លេអ៊ែររបស់កូរ៉េខាងជើង ហើយភាគីទាំងអស់ត្រូវចាត់វិធានការ ដើម្បីបង្កើនការជឿទុកចិត្តគ្នាទៅវិញទៅមក និងដោះស្រាយបញ្ហាទាំងអស់គ្នាទើបវាប្រសើរជាង៕
