រាជរដ្ឋាភិបាលកម្ពុជាសម្រេចផ្ដល់ប្រាក់ឧបត្ថមដល់កម្មករ-កម្មការិនីព្យួរការងារ ជាង៣ម៉ឺននាក់

ថ្លែងនៅក្នុងឱកាសអញ្ជើញជាអធិបតីប្រារព្ធពិធីអបអរសាទរទិវានារីអន្តរជាតិ ៨មីនា ខួបលើកទី១១២ នៅថ្ងៃទី៧ ខែមីនា ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានសម្រេចផ្ដល់ប្រាក់ឧបត្ថមដល់កម្មករ-កម្មការិនី ជាង៣ម៉ឺននាក់ ដែលត្រូវបានរោងចក្រព្យួរការងារអំឡុងកូវីដ១៩។ សម្ដេច ហ៊ុន សែន បានគូសបញ្ជាក់ថា សម្ដេចបានចុះហត្ថលេខារួចហើយ កាលពីថ្ងៃទី៦ ខែមីនា ពាក់ព័ន្ធទៅលើការផ្តល់ប្រាក់ឧបត្ថម្ភ នៅក្នុងស្ថានភាពដែលរោងចក្រត្រូវបានព្យួរ បន្ទាប់ពីសម្ដេចបានបញ្ជាឲ្យរដ្ឋមន្រ្តីនៃក្រសួងការងារនិងបណ្តុះបណ្តាលវិជ្ជាជីវៈ និងក្រសួងសេដ្ឋកិច្ចនិងហិរញ្ញវត្ថុ ធ្វើកិច្ចអន្តរាគមន៍បន្ទាន់ដើម្បីជួយដោះស្រាយលើបញ្ហានេះ។ បើតាមការគូសបញ្ជាក់របស់សម្ដេច ហ៊ុន សែន ស្របពេលដែលកម្មករ-កម្មការិនី ប្រមាណជាង ៣ម៉ឺននាក់ កំពុងបាត់បង់ការងារធ្វើនៅក្នុងរោងចក្រចំនួន ៧១រោងចក្រនោះ បែរជានៅក្នុងខេត្តកំពង់ស្ពឺ កំពុងមានការខ្វះខាតកម្មករ-កម្មការិនី រហូតប្រមាណ ៣ម៉ឺននាក់ទៅវិញ។ ត្រង់ចំណុចនេះ សម្ដេចក៏បានជំរុញឲ្យក្រសួងការងារ និងបណ្ដុះបណ្ដាលវិជ្ជាជីវៈ គិតគូនូវរៀបនៃការដោះស្រាយលើបញ្ហានេះ ជាពិសេសបង្កើនឱកាសការងារសម្រាប់ស្រ្តី។
ទោះបីជា ស្ថានភាពនៅក្នុងវិស័យរោងចក្រកាត់ដេរ សម្លៀកបំពាក់ ស្បែកជើង និងផលិតផលធ្វើដំណើរកំពុងប្រឈមនឹងការបញ្ជាទិញធ្លាក់ចុះក្ដី ប៉ុន្ដែ សម្ដេចតេជោ ហ៊ុន សែន នៅតែកត់សម្គាល់ឃើញពីភាពវិជ្ជមាននៃសេដ្ឋកិច្ចនៅកម្ពុជា នារយៈពេលប៉ុន្មានឆ្នាំចុងក្រោយនេះ។ ជាពិសេសនៅឆ្នាំ២០២២ ទោះបីថា ប្រទេសកម្ពុជា ក៏ដូចជា ពិភពលោកទាំងមូលទទួលរងផលប៉ះពាល់យ៉ាងធ្ងន់ធ្ងរពីការរីករាលដាលនូវជំងឺកូវីដ១៩ ក៏ដោយ តែកម្ពុជានៅតែអាចសម្រេចបាននូវសមិទ្ធិផលថ្មីៗ ជាច្រើនគួរឲ្យកត់សម្គាល់។ យ៉ាងណាក៏ដោយ សម្រាប់កិច្ចការអភិវឌ្ឍន៍សង្គម និងសេដ្ឋកិច្ចនៅកម្ពុជា ត្រូវបានសម្ដេចតេជោ ហ៊ុន សែន អះអាងថា ពិតជាមិនអាចរីកចម្រើនបានឡើយ ប្រសិនណា មិនមានស្ត្រីចូលរួម។ សម្ដេចបានចាត់ទុកស្រ្តី គឺជាចលករដ៏សំខាន់ក្នុងការជំរុញកំណើនសេដ្ឋកិច្ច ដោយសម្ដេចក៏បានអំពាវនាវដល់ក្រសួង-ស្ថាប័នពាក់ព័ន្ធនានា ក៏ដូចជា វិស័យឯកជនត្រូវអនុវត្តការងារបញ្ជ្រាបយែនឌ័រ ជាពិសេសពង្រឹងអំណាចសេដ្ឋកិច្ចរបស់ស្រ្តីឲ្យកាន់តែប្រសើរឡើងថែមមួយកម្រិតទៀត។