នៅមួយរយៈចុងក្រោយនេះក្រុមហ៊ុននាំចូលរថយន្តថ្មីៗ ពីក្រៅប្រទេសមកលក់នៅកម្ពុជាមួយចំនួនបានងាកមកបង្កើតរោងចក្រផ្គុំ និងដំឡើងរថយន្តដោយផ្ទាល់នៅកម្ពុជាកាន់តែច្រើន ដែលជាសញ្ញាណបង្ហាញឲ្យឃើញពីភាពរីកចម្រើននៃឧស្សាហកម្មយានយន្ត ជាពិសេសលើតម្រូវការរថយន្តថ្មីតែម្តង។ ជាក់ស្តែងនៅថ្ងៃទី៨ ខែកញ្ញា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជាបានអនុម័តឲ្យក្រុមហ៊ុន Toyota Tsusho Manufacturing (Cambodia) Co.,LTd បង្កើតរោងចក្រផ្គុំ និងដំឡើងរថយន្តម៉ាកតូយ៉ូតានៅតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ។ រោងចក្រ ដែលមានទំហំវិនិយោគជិត ៣៧លានដុល្លារអាមេរិកនេះ អាចផ្តល់ការងារប្រមាណ១៥០កន្លែង។
លោក កែវ វឌ្ឍនៈ នាយកចាត់ការទូទៅផ្នែកលក់ និងទីផ្សាររបស់ក្រុមហ៊ុនតូយ៉ូតា ខេមបូឌាបានគូសបញ្ជាក់ថា បច្ចុប្បន្នក្រុមហ៊ុនកំពុងរៀបចំនីតិវិធី និងឯកសារនានាពាក់ព័ន្ធការបង្កើតរោងចក្រផ្គុំ និងដំឡើងរថយន្តម៉ាកតូយ៉ូតានេះ។ ប៉ុន្តែលោកមិនទាន់អាចបញ្ជាក់បានទេថា រោងចក្រនេះនឹងចាប់ផ្តើមសាងសង់ និងបញ្ចប់នៅពេលណានិងអាចមានសមត្ថភាពផ្គុំ និងដំឡើងរថយន្តបានប៉ុន្មានក្នុង១ឆ្នាំនោះទេ។ តែយ៉ាងណាលោករំពឹងថា រោងចក្រនេះនឹងអាចដំណើរការក្នុងពេលឆាប់ៗខាងមុខនេះ។
អត្ថបទគួរអាន
លោក កែវ វឌ្ឍនៈ បានគូសបញ្ជាក់ថា កត្តាដែលជំរុញឲ្យក្រុមហ៊ុនសម្រេចបង្កើតរោងចក្រផ្គុំ និងដំឡើងរថយន្តម៉ាកតូយ៉ូតានៅកម្ពុជា ក្រោយក្រុមហ៊ុនមើលឃើញពីសន្ទុះគាំទ្ររថយន្តម៉ាកតូយ៉ូតារបស់ប្រជាពលរដ្ឋមានការកើនឡើង គូបផ្សំការប្រើប្រាស់រថយន្តថ្មីនៅកម្ពុជាមាននិន្នាការកើនឡើងគួរឲ្យកត់សម្គាល់នៅមួយរយៈចុងក្រោយ។ បើតាមការគូសបញ្ជាក់របស់លោក កែវ វឌ្ឍនៈ នៅឆ្នាំ២០២២ នេះទីផ្សាររថយន្តម៉ាកតូយ៉ូតាមានការរីកចម្រើនខ្លាំងបើធៀបនឹងឆ្នាំមុនៗ ដោយក្នុង១ខែក្រុមហ៊ុននេះអាចលក់រថយន្តបានចន្លោះពី៦០០ទៅ៨០០គ្រឿង។
សូមបញ្ជាក់ថា គម្រោងរោងចក្រផ្គុំ និងដំឡើងរថយន្ដតូយ៉ូតានេះ មិនមែនជារោងចក្រផ្គុំ និងដំឡើងរថយន្ដលើកដំបូងនៅកម្ពុជានោះទេ កន្លងមក ក៏មានរោងចក្រដំឡើងរថយន្ដម៉ាកផ្សេងៗជាច្រើនទៀត ក៏បានបង្កើតឡើងផងដែរ។ ជាក់ស្ដែង កាលពីខែមិថុនា ឆ្នាំ២០២២ ក្រុមហ៊ុន RMA Cambodia ទើបដាក់ឲ្យដំណើរការរោងចក្រផ្គុំ និងដំឡើងរថយន្តម៉ាកFord នៅខេត្តពោធិសាត់ ដែលមានសមត្ថភាពដំឡើងរថយន្តបានប្រមាណ១ម៉ឺនគ្រឿងក្នុង១ឆ្នាំ។ ក្រៅពីក្រុមហ៊ុន Ford ក៏មានក្រុមហ៊ុន GTV MOTOR CO., LTD. ក៏បានបោះទុនជាង១៥លានដុល្លារ បង្កើតរោងចក្រដំឡើងរថយន្តថ្មីមួយនៅស្រុកគងពិសី ខេត្តកំពង់ស្ពឺ ហើយថ្មីៗនេះ ក្រុមហ៊ុន K (CAMBODIA) CO., LTD ក៏បានបោះទុនជាង៧លានដុល្លារ បង្កើតរោងចក្រផ្គុំ និងដំឡើងរថយន្តអ៊ីស៊ូហ្ស៊ុ នៅស្រុកសំរោងទង ខេត្តកំពង់ស្ពឺផងដែរ៕
