ជាការពិត ការលុកលុយរបស់រុស្ស៊ីលើអ៊ុយក្រែនបានជំរុញឱ្យប្រទេសស៊ុយអែត និងហ្វាំងឡង់បោះបង់ជំហរអព្យាក្រឹត្យ មិនចូលបក្សសម្ព័ន្ធរាប់ទសវត្សន៍របស់ខ្លួន ហើយស្នើសុំចូលជាសមាជិកនៃអង្គការសម្ព័ន្ធយោធាអាត្លង់ទិកខាងជើង (NATO) ដែលដឹកនាំដោយសហរដ្ឋអាមេរិកនេះ។
ក៏ប៉ុន្តែ កន្លងមកប្រធានាធិបតីទួរគី លោករីសិប តាយីន អេដូហ្កាន (Recep Tayyip Erdogan) បានរារាំងជំទាស់ការសុំចូលជាសមាជិកប្រទេសនៃតំបន់សមុទ្របាល់ទិកទាំងពីរនេះ ដោយចោទប្រកាន់ប្រទេសទាំងពីរនេះថា បានគាំទ្រក្រុមឧទ្ទាមឃឺដ ដែលប្រទេសទួរគីចាត់ទុកថាជាក្រុមភេរវករ ដែលគំរាមគំហែងដល់សន្តិសុខជាតិទួរគី។
បន្ទាប់ពីកិច្ចប្រជុំកំពូលអង្គការណាតូនេះ អគ្គលេខាធិការណាតូលោក ចេន ស្តូថេនបើក (Jens Stoltenberg) បាននិយាយថា "ការចូលជាសមាជិកភាពនេះនឹងត្រួសត្រាយផ្លូវ ក៏ដូចជាកំណត់ជោគវាសនាថ្មីមួយសម្រាប់ប្រទេសហ្វាំងឡង់ និងស៊ុយអែត នៅក្នុងពិភពលោកមួយ ដែលកាន់តែគ្រោះថ្នាក់ទៅៗ និងមិនអាចទាយទុកជាមុនបាន" ។
ក្នុងនោះដែរ លោក Stoltenberg បានបន្លែមយ៉ាងដូច្នេះថា "ដើម្បីអាចការពារខ្លួននៅក្នុងពិភពលោកដ៏គ្រោះថ្នាក់នេះ យើងត្រូវវិនិយោគបន្ថែមទៀតនៅក្នុងវិស័យការពារជាតិរបស់យើង"។ ក្នុងនោះសមាជិកចំនួន ៩ ប្រទេសក្នុងចំណោមសមាជិក ៣០ របស់អង្គការណាតូបានសម្រេចគោលដៅក្នុងការចំណាយ ២% នៃផលិតផលក្នុងស្រុកសរុបលើវិស័យការពារជាតិរបស់ខ្លួន។ ប៉ុន្តែ ប្រទេសអេស្ប៉ាញ ដែលជាម្ចាស់ផ្ទះនៃកិច្ចប្រជុំកំពូលណាតូនៅឆ្នាំនេះ ចំណាយត្រឹមតែពាក់កណ្តាលប៉ុណ្ណោះ។
អត្ថបទគួរអាន
ទោះបីជា ប្រទេសទួរគីបានដកការវេតូប្រឆាំងរបស់ខ្លួនចំពោះប្រទេសហ្វាំងឡង់ និងស៊ុយអែតចូលជាសមាជិកណាតូមែនក៏ដោយ ប៉ុន្ដែទីក្រុងអង់ការ៉ា (Ankara) បានទាមទារយ៉ាងម៉ឺងម៉ាត់ ដែលឲ្យប្រទេសទាំងពីរបញ្ឈប់ការគាំទ្រក្រុមឧន្ទាមឃឺដ ដែលមានវត្តមាននៅលើទឹកដីរបស់ខ្លួន ព្រមទាំងលុបចោលការហាមឃាត់ការលក់អាវុធមួយចំនួនចូលទៅក្នុងប្រទេសទួរគីទៀត ហើយការណ៍នេះបានធ្វើឱ្យមានការភ្ញាក់ផ្អើលដល់សម្ព័ន្ធមិត្តណាតូយ៉ាងខ្លាំង។
យ៉ាងណា លោក Stoltenberg បាននិយាយយ៉ាងច្បាស់ៗថា ប្រទេសស៊ុយអែត និងហ្វាំងឡង់នឹងរឹតបន្តឹងការលក់អាវុធរបស់ខ្លួនបន្លែមទៀតចូលទៅក្នុងប្រទេសទួរគី។
មួយវិញទៀត សេចក្តីថ្លែងការណ៍របស់ប្រធានាធិបតីទួរគីបាននិយាយថា "ប្រទេសស៊ុយអែត និងហ្វាំងឡង់បានយល់ព្រមលើកិច្ចសហប្រតិបត្តិការពេញលេញជាមួយទួរគីក្នុងការប្រយុទ្ធប្រឆាំងនឹងក្រុមឧន្ទាមឃឺត ហើយបានបង្ហាញពីសាមគ្គីភាពជាមួយទួរគី ក្នុងការប្រយុទ្ធប្រឆាំងនឹងអំពើភេរវកម្មគ្រប់ទម្រង់ផងដែរ"។
លើសពីនេះទៅទៀត ការបញ្ចប់ភាពជាប់គាំងសំណុំរឿងការសុំចូលជាសមាជិកណាតូរបស់ប្រទេសទាំងពីរនេះ ក៏បានអនុញ្ញាតឱ្យមេដឹកនាំ ណាតូ ផ្តោតលើបញ្ហាសំខាន់របស់ពួកគេថែមមួយកម្រិតទៀត គឺការរំលោភបំពាននិងការឈ្លានពានដោយមិនអាចដឹងមុនពីសំណាក់រុស្សី និងការពង្រឹងកម្លាំងឲ្យកាន់តែរឹងមាំបន្ថែមទៀតនៅក្នុងរដ្ឋជាសមាជិកជុំវិញសមុទ្របាល់ទិក ដែលមានព្រំប្រទល់ជាប់ប្រទេសរុស្សីជាង ១៣០០ គីឡូម៉ែត្រឯណោះ។
មិនតែប៉ុណ្ណោះ ក្នុងកិច្ចប្រជុំកំពូលណាតូនេះ ត្រូវបានគេរំពឹងថា អង្គការយោធាដ៏មានឥទ្ធិពលមួយនេះនឹងចេញយុទ្ធសាស្ត្រថ្មីក្នុងការដោះស្រាយបញ្ហាសន្តិសុខតាមប្រព័ន្ធអ៊ីនធឺណិត ក៏ដូចជាការប្រែប្រួលអាកាសធាតុ និងការកើនឡើងនៃឥទ្ធិពលសេដ្ឋកិច្ច និងយោធារបស់ប្រទេសចិន រួមទាំងការផ្តោតសំខាន់លើតំបន់យុទ្ធសាស្ត្រឥណ្ឌូប៉ាស៊ីហ្វិកថែមទៀតផង។
ដោយឡែក វាជាលើកដំបូងហើយដែលមេដឹកនាំជប៉ុន អូស្ត្រាលី កូរ៉េខាងត្បូង និងនូវែលសេឡង់ ត្រូវបានអញ្ចើញឲ្យចូលរួមក្នុងកិច្ចប្រជុំកំពូលណាតូនៅទីក្រុងម៉ាដ្រីត ប្រទេសអេស្ប៉ាញនេះ។ ហើយសមាជិកអឺរ៉ុបមួយចំនួន ក៏មានការប្រុងប្រយ័ត្នណាស់ដែរក្នុងការដើរនៅចន្លោះភាពតានតឹងដែលអាមេរិកដាក់លើទីក្រុងប៉េកាំង ព្រោះពួកគេមិនចង់យកចិនធ្វើជាគូប្រជែងថ្មីមួយទៀតនោះទេ៕
អត្ថបទ៖ ហ៊ុន គន្ធថៃ
