សេចក្តីប្រកាសរបស់សេតវិមានអាមេរិកឱ្យដឹងថា ទំហំទឹកប្រាក់ចំនួន ៣,៧៥ ពាន់លានដុល្លារជាជំនួយក្នុងរូបភាពសព្វាវុធ និងជំនួយផ្សេងទៀតសម្រាប់អ៊ុយក្រែន ក៏ដូចជាជំនួយពីសម្ព័ន្ធមិត្តអឺរ៉ុបផ្សេងទៀត បានធ្លាក់មកនៅពេលដែលក្រុងម៉ូស្គូកំពុងប្រតិបត្តិបទឈប់បាញ់ដើម្បីប្រារព្ធពិធីបុណ្យណូអែលតាមប្រពៃណីរបស់ប្រទេសទាំងពីរ។ តែយ៉ាងណា បទឈប់បាញ់ត្រូវរុស្ស៊ីខ្លួនឯងជាអ្នកល្មើស។
កញ្ចប់ជំនួយយោធាដ៏ធំចុងក្រោយបំផុតរបស់អាមេរិកសម្រាប់អ៊ុយក្រែននោះ រួមមានរួមបញ្ចូលរថពាសដែកធន់ធ្ងន់ Bradley ចំនួន ៥០ គ្រឿង និងមីស៊ីលប្រឆាំងរថក្រោះចំនួន ៥០០ គ្រឿង។ ក្នុងនោះ ប្រទេសអាឡឺម៉ង់ក៏បានប្រកាសថាខ្លួននឹងផ្គត់ផ្គង់រថពាសដែក Marder ប្រហែល ៤០ គ្រឿង ហើយបារាំងបានសន្យាថា ក៏នឹងដាក់ពង្រាយរថក្រោះពិឃាត AMX-10 RC ទៅឱ្យទីក្រុងកៀវដែរ។
យ៉ាងណាមិញ មន្ត្រីអ៊ុយក្រែនបានថ្កោលទោសការផ្អាកការវាយប្រហារជាឯកតោភាគីរយៈពេល ៣៦ ម៉ោងរបស់ទីក្រុងម៉ស្គូនោះថា ជាការលេងសើច និងហាក់ដូចជាមិនត្រូវបានអើពើដោយកងកម្លាំងមួយចំនួនក្នុងតំបន់ជួរមុខ។ យោងតាមមន្ត្រីអ៊ុយក្រែនបានរាយការណ៍ពីការវាយប្រហារដោយគ្រាប់ផ្លោងរបស់រុស្ស៊ីនៅក្នុងតំបន់ឌីនីប្រូផេត្រូសក៍ (Dnipropetrovsk) និងតំបន់ Zaporizhzhia កាលពីថ្ងៃសៅរ៍នោះផងដែរ។
អត្ថបទគួរអាន
ទន្ទឹមគ្នានេះ ក្រសួងការពារជាតិរុស្ស៊ីបានទទូចកាលពីថ្ងៃសៅរ៍ថា កងកម្លាំងរបស់ខ្លួននៅតាមខ្សែបន្ទាត់ជួរមុខ ១,១០០ គីឡូម៉ែត្រកំពុងប្រតិបត្តិតាមបទបញ្ជាដោយវិមានក្រឹមឡាំងពីបទឈប់បាញ់រយៈពេលខ្លី ប៉ុន្តែបានបាញ់តបវិញនៅពេលត្រូវបានវាយប្រហារពីសំណាក់អ៊ុយក្រែន។
មែនទែនទៅ បទឈប់បាញ់ដើម្បីប្រារព្ធពិធីបុណ្យណូអែលដែលបានបញ្ជាដោយលោកពូទីនដែលបានចាប់ផ្តើមកាលពីថ្ងៃសុក្រ ត្រូវបានស្នើឡើងជាលើកដំបូងដោយប្រធានសាសនាគ្រិស្តនៃវិមានក្រឹមឡាំងរបស់រុស្ស៊ីគឺអយ្យកោ Kirill ។ បទបញ្ជារបស់លោកពូទីនបាននិយាយថា បទឈប់បាញ់នឹងអនុញ្ញាតឱ្យអ្នកគោរពបូជាដែលជាកងទ័ពនៅក្នុងតំបន់ជួរមុខផ្អាកការប្រយុទ្ធរបស់ខ្លួនដើម្បីចូលរួមពិធីបុណ្យណូអែល។
ផ្ទុយទៅវិញ មន្ត្រីអ៊ុយក្រែនមិនបានប្តេជ្ញាថានឹងធ្វើតាមនោះទេ ហើយបានច្រានចោលទង្វើនេះថាជាការប្រើល្បិចរបស់រុស្ស៊ីដើម្បីកេងពេលវេលាសម្រាប់កម្លាំងរបស់ខ្លួនក្នុងការប្រមូលផ្តុំឡើងវិញ។ លើសពីនោះ មន្ត្រីអ៊ុយក្រែន និងលោកខាងលិចបានចាត់ទុកថាជាការប៉ុនប៉ងរបស់រុស្ស៊ីដើម្បីដណ្តើមយកគំរូល្អផ្នែកសីលធម៌ក្នុងតំបន់ប្រយុទ្ធទាំងនោះ ចំពេលដែលកងកម្លាំងអ៊ុយក្រែនកំពុងធ្វើការវាយបកយ៉ាងមានប្រសិទ្ធភាពនៅដើមខែមករាថ្មីៗនេះ៕
