សន្ទស្សន៍តម្លៃស្បៀងរបស់អង្គការស្បៀងអាហារ និងកសិកម្ម ហៅកាត់ថា FAO ដែលបានតាមដានតម្លៃជាអន្តរជាតិលើមុខទំនិញម្ហូបអាហារ និងដែលបានជួញដូរច្រើនបំផុតនៅទូទាំងពិភពលោកបង្ហាញថា សន្ទស្សន៍តម្លៃបានកើនដល់ ១៤៣.៧ពិន្ទុ ក្នុងឆ្នាំ២០២២ពោលគឺបានកើនឡើង ១៤.៣% ធៀបនឹងឆ្នាំ២០២១។ នេះជាសន្ទស្សន៍ ខ្ពស់បំផុតមិនធ្លាប់មាន រាប់ពីកំណត់ត្រាឆ្នាំ១៩៩០មក។
មែនទែនទៅ តម្លៃអាហារបានកើនឡើងបន្ទាប់ពីការលុកលុយរបស់ប្រទេសរុស្ស៊ីទៅលើប្រទេសអ៊ុយក្រែនកាលពីខែកុម្ភៈឆ្នាំមុន និងដោយសារការព្រួយបារម្ភពីផលរំខានដល់ច្រកដឹកជញ្ជូននៅសមុទ្រខ្មៅ។ ប្រទេសទាំង២ដែលជាអ្នកផលិតស្បៀងសំខាន់ៗដ៏ធំ ក៏បានបាត់បង់ប្រាក់ចំណេញរបស់ខ្លួនមួយចំនួនដែរ។ ទោះយ៉ាងណាក្រោយមកប្រទេសទាំងពីររកបានផលចំណេញមកវិញខ្លះ ក្រោមកិច្ចសម្របសម្រួលនាំចេញគ្រាប់ធញ្ញជាតិគាំទ្រដោយអង្គសហប្រជាជាតិ និងបានពីក្តីរំពឹងទុកថា នឹងមានភាពល្អប្រសើរពី អ្នកផ្គត់ផ្គង់នៅតាមប្រទេសផលិតមួយចំនួនទៀត។
អត្ថបទគួរអាន
ទោះយ៉ាងណា កាលពីខែធ្នូចុងឆ្នាំ២០២២ សន្ទស្សន៍តម្លៃស្បៀងអាហារគោលបានធ្លាក់ចុះ បន្តិចក្នុងពិន្ទុ ១៣២.៤ ពិន្ទុបើធៀបនឹងការកម្រិត ១៣៥ពិន្ទុ ក្នុងខែវិច្ឆិកា។ ប្រការនេះអាចបង្ហាញពីភាពវិជ្ជមាន សម្រាប់តម្លៃស្បៀងក្នុងឆ្នាំ២០២៣។ បើតាមអង្គការ FAO ការធ្លាក់ចុះនៅក្នុងសន្ទស្សន៍តម្លៃកាលពីខែធ្នូនោះគឺដោយសារតែមានការធ្លាក់ចុះតម្លៃប្រេងអន្តរជាតិរួមជាមួយការធ្លាក់ចុះមួយចំនួននៃតម្លៃធញ្ញជាតិ និងសាច់។
ប៉ុន្តែបើគេគិតនៅពេញមួយឆ្នាំ២០២២ តម្លៃគ្រាប់ធញ្ញជាតិ បានកើនឡើង ១៧.៩% ដោយសារកត្តាមួយចំនួនរួមទាំងការរំខានដល់ទីផ្សារថាមពល និងថ្លៃដើមផលិតកើនខ្ពស់ កត្តាអាកាសធាតុមិនល្អ និងតម្រូវការអាហារសកលកើនឡើងជាបន្តបន្ទាប់៕
អត្ថបទ៖ សុខ ជា
