អាម៉េរិកថា ការរឹបអូសកប៉ាល់ជប៉ុន គឺជាការរំលោភច្បាប់អន្តរជាតិ និងទាមទារឱ្យក្រុមហ៊ួធីដោះលែងបន្ទាន់

តាមការឱ្យដឹងពីម្ចាស់កប៉ាល់ Galaxy Leader នៅក្នុងសេចក្តីថ្លែងការណ៍មួយកាលពីថ្ងៃចន្ទ កប៉ាល់ពាណិជ្ជកម្មត្រូវបានស្ទាក់ និងរឹបអូសដោយខុសច្បាប់ដោយបុគ្គលិកយោធា តាមរយៈឧទ្ធម្ភាគចក្រកាលពីថ្ងៃទី១៩ ខែវិច្ឆិកា ហើយកប៉ាល់ និងនាវិកឥឡូវនេះកំពុងស្ថិតនៅក្នុងតំបន់កំពង់ផែ Hodeidah ក្នុងប្រទេសយេម៉ែន។ បើតាមម្ចាស់កប៉ាល់នោះ ទំនាក់ទំនងទាំងអស់ត្រូវបានបាត់បង់ជាបន្តបន្ទាប់ជាមួយនាវានេះ។ យោងតាមក្រុមហ៊ុនរបស់កប៉ាល់នេះ Galaxy Maritime បានឱ្យដឹងថា នាវិកនៅលើកប៉ាល់ Galaxy Leader នោះមានសញ្ជាតិមកពីប៊ុលហ្គារី អ៊ុយក្រែន ហ្វីលីពីន ម៉ិកស៊ិក និងរ៉ូម៉ានី ហើយនាវាត្រូវបានជួលដោយក្រុមហ៊ុនដឹកជញ្ជូន Nippon Yusen របស់ប្រទេសជប៉ុន។

ទោះជាយ៉ាងណាក៏ដោយ ក្រុមហ៊ុន Galaxy Maritime បាននិយាយថា ការរឹបអូសនាវានេះគឺជាការរំលោភលើសេរីភាពនាវាចរណ៍តាមសមុទ្រអន្តរជាតិ និងការគំរាមកំហែងយ៉ាងធ្ងន់ធ្ងរដល់ពាណិជ្ជកម្មអន្តរជាតិ។ មិនតែប៉ុណ្ណោះ គេក៏ព្រួយបារម្ភពីសុវត្តិភាពរបស់នាវិកទាំង២៥នាក់ ដែលត្រូវបានចាប់ខ្លួនដោយជនល្មើស នៃអំពើឧក្រិដ្ឋកម្មនេះដែរ។ ទន្ទឹមគ្នានេះ សហរដ្ឋអាម៉េរិកបានបរិហារ និងទាមទារឱ្យក្រុមហ៊ូធីដោះលែងកប៉ាល់ និងនាវិកទាំងនោះជាបន្ទាន់។ យោងតាមអ្នកនាំពាក្យក្រសួងការបរទេសអាម៉េរិក លោក Matthew Miller បានឱ្យដឹងថា ការរឹបអូសរបស់ក្រុមហ៊ូធីលើកប៉ាល់ Galaxy Leader នៅសមុទ្រក្រហម គឺជាការរំលោភច្បាប់អន្តរជាតិ ដោយលោកទាមទារឱ្យដោះលែងជាបន្ទាន់ ហើយលោកនឹងពិភាក្សាជាមួយសម្ព័ន្ធមិត្ត និងប្រទេសដៃគូនៅអង្គការសហប្រជាជាតិ អំពីជំហានបន្ទាប់លើករណីនេះ។

ស្របពេលជាមួយគ្នានេះ រដ្ឋមន្ត្រីពាណិជ្ជកម្មរបស់ប្រទេសជប៉ុន កាលពីថ្ងៃចន្ទ បានព្រមានអំពីការរំខានដល់ខ្សែច្រវ៉ាក់ផ្គត់ផ្គង់ បន្ទាប់ពីកប៉ាល់នេះត្រូវបានរឹបអូសដោយក្រុមសកម្មប្រយុទ្ធហ៊ូធីកាលពីថ្ងៃអាទិត្យ។ យោងតាមរដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្មជប៉ុន លោក Yasutoshi Nishimura បាននិយាយនៅក្នុងសន្និសីទសារព័ត៌មានមួយថា ទំនិញផ្សេងៗ រួមទាំងរថយន្ត ត្រូវបានដឹកជញ្ជូនតាមផ្លូវទឹក ដែលតភ្ជាប់អឺរ៉ុប និងជប៉ុនតាមរយៈព្រែកជីកស៊ុយអេ។ លោកថា វាអាចមានផលប៉ះពាល់ដល់សេដ្ឋកិច្ចជប៉ុន រួមទាំងខ្សែច្រវាក់ផ្គត់ផ្គង់ផងដែរ៕