ការផ្ដល់ជូនវ៉ាក់សាំង១លានដូសរបស់អាមេរិក ទៅឲ្យប្រទេសម៉ាឡេស៊ីនៅក្នុងសប្ដាហ៍នេះ គឺជាចំនួនវ៉ាក់សាំងដំបូងនៃវ៉ាក់សាំង៨០លានដូសផលិតនៅអាមេរិក ដែលរដ្ឋបាលលោកចូបៃឌិន បានប្រកាសសន្យាក្ដែងៗកាលពីខែមុន ថានឹងចែករំលែកទៅឲ្យប្រទេសដែលកំពុងមានតម្រូវការវ៉ាក់សាំង នៅចំពេលដែលមានការបារម្ភអំពីការចែកចាយវ៉ាក់សាំងមិនស្មើភាពគ្នារវាងប្រទេសអ្នកមាន និងប្រទេសកំពុងអភិវឌ្ឍន៍។
មន្ត្រីជាន់ខ្ពស់នៃសេតវិមានអាមេរិក បាននិយាយថា អាមេរិក បាននិងកំពុងចែករំលែកវ៉ាក់សាំងដែលមានសុវត្ថិភាព និងប្រសិទ្ធភាព ទៅឲ្យប្រទេសម៉ាឡេស៊ី ដែលកំពុងមានតម្រូវការ ហើយអាមេរិកនឹងបន្ដដឹកជញ្ជូនវ៉ាក់សាំងបន្ថែមទៀតទៅក្នុងតំបន់នាពេលខាងមុខនេះ។
អត្ថបទគួរអាន
មន្ត្រីជាន់ខ្ពស់អាមេរិក បានបង្ហើបឲ្យដឹងទៀតថា អាមេរិកកំពុងធ្វើការងារឲ្យបានលឿនតាម ដែលអាចធ្វើទៅបាន ដើម្បីផ្ដល់វ៉ាក់សាំងបន្ថែមទៅឲ្យប្រទេសនៅក្នុងតំបន់អាស៊ីអាគ្នេយ៍ ហើយតាមផែនការ អាមេរិកនឹងផ្ដល់ជំនួយវ៉ាក់សាំងកូវីដ-១៩នេះ ទៅឲ្យប្រទេសមួយចំនួនទៀតដូចជា ហ្វីលីពីន, វៀតណាម ឥណ្ឌូនេស៊ី, ថៃ ឡាវ ប៉ាពួញ៉ូហ្គីណេ និងប្រទេសកម្ពុជាជាដើម។
តាមការគូសបញ្ជាក់របស់ប្រភពព័ត៌មានពីមន្ត្រីជាន់ខ្ពស់អាមេរិក ដែលបានប្រាប់សារព័ត៌មាន Reuters នាពេលថ្មីៗនេះ បានឲ្យដឹងថា វ៉ាក់សាំង Moderna ចំនួន ៤លានដូសទៀត នឹងត្រូវដឹកបញ្ជូនទៅឲ្យប្រទេសឥណ្ឌូនេស៊ីក្នុងពេលឆាប់ៗនេះតាមរយៈយន្ដការកូវ៉ាក់របស់អង្គការសុខភាពពិភពលោក។
ក្រៅតែពីគម្រោងជំនួយវ៉ាក់សាំង ៨០លានដូស ទីក្រុងវ៉ាស៊ិនតោនក៏បានអះអាងថា ខ្លួនក៏នឹងទិញវ៉ាក់សាំង៥០០លានដូសទៀត ពីក្រុមហ៊ុន Pfizer/BioNTech ដើម្បីចែកចាយទៅឲ្យសហភាពអាហ្វ្រិក និងប្រទេសក្រីក្រជាង ៩០ផ្សេងទៀតផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
