កិច្ចប្រជុំរដ្ឋមន្ត្រីអាស៊ាន-អាមេរិក នឹងផ្តោតលើ ជំងឺរាតត្បាតនៃកូវីដ ១៩ ការប្រែប្រួលអាកាសធាតុ បញ្ហារដ្ឋប្រហារនៅប្រទេសមីយ៉ាន់ម៉ា និង សង្រ្គាមនៅអ៊ុយក្រែនជាដើម។
ក្រសួងការបរទេសអាមេរិកបាននិយាយនៅក្នុងសេចក្តីថ្លែងការណ៍មួយថា លោក Blinken នឹងចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ាន-អាមេរិក នៅទីក្រុងភ្នំពេញចាប់ពីថ្ងៃពុធ ទី ៣ ដល់ថ្ងៃទី ៥ ខែ សីហា បន្ទាប់មកលោកនឹងធ្វើដំណើរទៅកាន់ទីក្រុងម៉ានីល ប្រទេសហ្វីលីពីន ដើម្បីជួបជាមួយប្រធានាធិបតីលោក Ferdinand Marcos Jr និង រដ្ឋមន្ត្រីការបរទេស លោក Enrique Manalo ដើម្បីពិភាក្សាអំពីកិច្ចខិតខំប្រឹងប្រែងដើម្បីពង្រឹងសម្ព័ន្ធភាពអាមេរិក និង ហ្វីលីពីន។
សូមបញ្ជាក់ថា ក្នុងនាមជាប្រធានអាស៊ាន កម្ពុជា បាននិងកំពុងរៀបចំនូវកិច្ចប្រជុំរដ្ឋមន្ត្រីការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធក្នុងក្របខណ្ឌអាស៊ានផ្សេងៗទៀត ចាប់ពីថ្ងៃទី ២៩ កក្កដា ដល់ថ្ងៃទី ៥ ខែសីហា ឆ្នាំ២០២២ នៅរាជធានីភ្នំពេញ។
ក្រោយពីចាកចេញពីហ្វីលីពីន រដ្ឋមន្ត្រីការបរទេសអាមេរិក លោក ប្លីងខេន ក៏នឹងធ្វើដំណើរបន្ដទៅកាន់ប្រទេសអាហ្រ្វិកខាងត្បូង ក្នុងដំណើរទស្សនៈកិច្ចចាប់ពីថ្ងៃទី ៧ ដល់ ៩ ខែសីហា បន្ទាប់មកលោកនឹងបន្តដំណើរទស្សនកិច្ចរបស់លោកទៅកាន់សាធារណរដ្ឋប្រជាធិបតេយ្យកុងហ្គោ និង អរវ៉ាន់ដា(Rwanda)។
អត្ថបទគួរអាន
សេចក្តីថ្លែងការណ៍ក្រសួងការបរទេសអាមេរិកបាននិយាយថា លោក អាន់តូនី ប្លីងខេន នឹងផ្តោតលើតួនាទីដែលរដ្ឋាភិបាលនៃប្រទេស Rwanda អាចដើរតួក្នុងការកាត់បន្ថយភាពតានតឹង និង អំពើហិង្សាដែលកំពុងបន្តនៅភាគខាងកើតនៃប្រទេសនេះ។ ចំពោះដំណើរទស្សនៈកិច្ចរបស់លោក Blinken នៅក្នុងប្រទេស Rwanda ក៏នឹងលើកឡើងអំពីការឃុំឃាំងនៃអ្នករស់នៅអចិន្ត្រៃយ៍របស់ប្រជាជនអាមេរិកម្នាក់ផងដែរ ។ ជនជាតិអាមេរិកម្នាក់ គឺលោក Rusesabagina អាយុ ៦៧ ឆ្នាំត្រូវបានកាត់ទោសនៅខែកញ្ញាឆ្នាំ ២០២១ ឱ្យជាប់គុក ២៥ ឆ្នាំលើការចោទប្រកាន់ភេរវកម្មចំនួនប្រាំបី ដែលទាក់ទងនឹងអង្គការដែលប្រឆាំងនឹងការគ្រប់គ្រងរបស់ប្រធានាធិបតី Rwandan លោក Paul Kagame៕
