លោក Tran Thi Tuyet Mai អគ្គលេខាធិការរងសមាគមវាយនភណ្ឌ និង កាត់ដេរវៀតណាម បាននិយាយថា នៅក្នុងត្រីមាសទី ២ នៅពេលដែលសង្រ្គាមនៅអ៊ុយក្រែនបានផ្ទុះឡើង រួមជាមួយនឹងការកើនឡើងតម្លៃប្រេង និងកត្តាផ្សេងទៀត វាបានបង្កឱ្យការបញ្ចាទិញ បានចាប់ផ្តើមធ្លាក់ចុះជាសកល ខណៈយីហោមួយចំនួនបានចាប់ផ្តើមកាត់បន្ថយចំនួនការបញ្ជាទិញរបស់ពួកគេ ដែលមានន័យថា រោងចក្រត្រូវកាត់បន្ថយការផលិត និង កម្មករត្រូវបន្ថយម៉ោងធ្វើការ។
ក្រុមកម្មកររោងចក្រ ដែលត្រូវបានស្រង់សម្ដីដោយសារព័ត៌មាន VN Express បានបញ្ជាក់ថា រោងចក្ររបស់ពួកគេ គឺមានការបន្ថយម៉ោងធ្វើការ លែងមានឲ្យធ្វើការថែមម៉ោងដូចមុនតទៅទៀតហើយ។ ហើយម៉ោងការងារ ក៏ត្រូវបានកាត់បន្ថយ។ កម្មករខ្លះ និយាយថា ប្រាក់ចំណូលរបស់ពួកគេ គឺបានធ្លាក់ចុះដល់ទៅពាក់កណ្ដាលឯណោះ ដោយសារតែមិនមានការធ្វើការថែមម៉ោងដូចមុន ហើយម៉ោងការងារត្រូវបានបន្ថយ។
លោក Nguyen Huu Tuan នាយកធនធានមនុស្សនៃក្រុមហ៊ុនវាយនភណ្ឌ និង ពាណិជ្ជកម្មវៀតណាម បាននិយាយថា ការបញ្ជាទិញនឹងធ្លាក់ចុះខ្លាំងថែមមួយកម្រិតទៀតនៅក្នុងខែកញ្ញា និង ខែតុលាខាងមុខនេះ ហើយចំនួនកម្មករច្រើននឹងត្រូវឈប់ធ្វើការជាបន្តបន្ទាប់នៅចំពេល ដែលរោងចក្រនឹងបិទប្រហែល ៨ ថ្ងៃនៃថ្ងៃឈប់សម្រាកបុណ្យជាតិវៀតណាមដែលនឹងចូលថ្ងៃទី១ ដល់ ទី ៤ ខែកញ្ញា។ លោកបន្តថា ការផ្លាស់ប្តូរកាលវិភាគការងារត្រូវបានគេរំពឹងថា នឹងកាត់ប្រាក់ខែកម្មករពី ១០% ទៅ ២០%។
អត្ថបទគួរអាន
នាយកធនធានមនុស្សរូបនេះបានបន្ថែមថា អាជីវកម្មជាច្រើន ដែលមានហិរញ្ញវត្ថុខ្សោយនឹងមិនអាចដំណើរការរហូតដល់ដំណាច់ឆ្នាំនេះទេ ជាពិសេសចំពេលមានការខ្វះខាតនៃការបញ្ជាទិញ និង តម្លៃកើនខ្ពស់ ហើយកម្មករបាត់បង់ការងារនឹងជៀសមិនរួចឡើយ។
លោក Tran Viet Anh អនុប្រធានសមាគមធុរកិច្ចនៅទីក្រុង ហូជីមិញ បាននិយាយថា វិស័យជាច្រើនកំពុងទទួលរងការបញ្ជាទិញទាបក្នុងចំណោមទីផ្សារសំខាន់ៗដូចជាអាមេរិក និង អឺរ៉ុប។
លោកបានមានប្រសាសន៍ថា មានផលិតផលដែលនៅសល់ក្នុងស្តុកជាច្រើននៅក្នុងរោងចក្រមួយចំនួនធំ ខណៈមានការបញ្ចុះតម្លៃ ប៉ុន្តែនៅតែគ្មានអ្នកទិញ ដោយផលប៉ះពាល់នៃជំងឺរាតត្បាត សង្គ្រាមដែលកំពុងបន្ត និងអតិផរណាកំពុងត្រូវបានធ្វើឱ្យមានភាពជាប់គាំងដល់វិស័យនេះ។ ទន្ទឹមនឹងនោះ អនុប្រធានសមាគមធុរកិច្ចរូបនេះបាននិយាយថា អាជីវកម្មមួយចំនួន ដែលមានហិរញ្ញវត្ថុខ្ពស់នឹងបន្តរក្សាកម្មក ដើម្បីរង់ចាំលក្ខខណ្ឌទីផ្សារប្រសើរឡើងវិញ ប៉ុន្តែនៅតែបន្តកាត់បន្ថយម៉ោងធ្វើការសម្រាប់កម្មករ។
លោក Viet Anh បានបន្ថែមថា ប្រាក់ចំណូលកាត់បន្ថយអាចធ្វើឲ្យកម្មករស្វែងរកការងារថ្មី ហើយនៅពេលដែលទីផ្សារងើបឡើងវិញ រោងចក្រក្នុងប្រទេសវៀតណាមនឹងប្រឈមមុខនឹងការខ្វះខាតកម្មករម្តងទៀត៕
