អ្នកនាំពាក្យលោក Thanakorn បាននិយាយដោយបង្ហាញអះអាងថា ការនាំចេញរបស់ថៃទៅប្រទេសចិនចាប់ពីខែមករា ដល់ខែមិថុនា បានកើនឡើងជិត១៣% ចាប់ពីឆ្នាំ ២០២១ ដោយបានកើនឡើងតម្លៃជាទឹកប្រាក់ ១៤០ ពាន់លានដុល្លារអាមេរិក ពោលគឺលើសពីគោលដៅដើមពី ៤-៥ ភាគរយ សម្រាប់រយៈពេលពេញ១ឆ្នាំ។
អ្នកនាំពាក្យរូបនេះបានបន្ថែមថា ការនាំចេញផលិតផលកសិកម្ម និងផលិតផលកសិឧស្សាហកម្មបានរួមចំណែកយ៉ាងសំខាន់ដល់កំណើននៃការនាំចេញសរុបដែលមានតម្លៃជាង២៦ពាន់លានដុល្លារកាលពីខែមុន។
ដោយដកស្រង់ព័ត៌មានពីនាយកដ្ឋានកសិកម្មលោក Thanakorn បាននិយាយថា រវាងថ្ងៃទី០១ ខែកុម្ភៈ ដល់ថ្ងៃទី២១ ខែកក្កដាមានការដឹកជញ្ជូនផ្លែឈើស្រស់ទៅកាន់ប្រទេសចិនចំនួន ជាង៦ម៉ឺនជើង ដែលមានបរិមាណផ្លែឈើស្រស់សរុបជាង១លានតោន ដែលមានតម្លៃជាង២ពាន់៥រយលានដុល្លារ។
អ្នកនាំពាក្យរូបនេះបាននិយាយថា តួលេខនេះបានរួមបញ្ចូលទាំងការនាំចេញផ្លែទុរេនជាង ៦៧ម៉ឺនតោនមានតម្លៃជិត២ពាន់លានដុល្លារ ដែលជាការឆ្លុះបញ្ចាំងពីទំនុកចិត្តរបស់អតិថិជនចិនចំពោះគុណភាព និងរសជាតិនៃផ្លែឈើរបស់ប្រទេសថៃ។
អ្នកនាំពាក្យរូបនេះបានបន្តទៀតថា ក្រៅពីផ្លែទុរេន ផ្លែឈើផ្សេងៗទៀតដែលត្រូវបាននាំចេញទៅប្រទេសចិនរួមមាន ផ្លែដូង ផ្លែមង្ឃុត ផ្លែមៀន ផ្លែសាវម៉ាវ និងផ្លែទទឹម។
លោក Thanakorn បាននិយាយទៀតថា នាយកដ្ឋានកសិកម្មបានដាក់ចេញនូវវិញ្ញាបនបត្រអនាម័យអេឡិចត្រូនិច ឬហៅថា e-Phyto ដែលជួយគាំទ្រ និងសម្រួលដល់ការនាំចេញផ្លែឈើទៅកាន់ប្រទេសចិនផងដែរ។
អត្ថបទគួរអាន
ទោះបីជាយ៉ាងណា លោក Wisut Chainaroon សមាជិកសភាគណបក្សភឿថៃ ជាតំណាងរាស្ត្រខេត្ត Phayao បានអំពាវនាវឱ្យរដ្ឋាភិបាលយកចិត្តទុកដាក់បន្ថែមទៀត ចំពោះស្ថានភាពមិនសូវល្អរបស់អ្នកដាំដំណាំផ្លែមៀននៅភាគខាងជើងប្រទេសនេះ។
សមាជិកសភារូបនេះបានបន្តថា តម្លៃផ្លែមៀនបានធ្លាក់ចុះដល់កម្រិតទាបបំផុតក្នុងរយៈពេល៣០ឆ្នាំ គឺផ្ទុយពីការឡើងថ្លៃផលិតផលកសិកម្មពិភពលោក ខណៈដែលតម្លៃជីកសិកម្មដែលចេះតែឡើងថ្លៃឥតឈប់ឈរបានធ្វើឱ្យអ្នកដាំដើមមៀនកាន់តែឈឺចាប់បន្ថែមទៀត។
តំណាងរាស្ត្ររូបនេះបាននិយាយថា ប្រទេសថៃគឺជាប្រទេសផលិតផ្លែមៀនធំជាងគេទី២របស់ពិភពលោកដែលមានទិន្នផលជាង ១ លានតោនក្នុងមួយឆ្នាំ បន្ទាប់ពីប្រទេសចិន៕
អត្ថបទ៖ សុខ ជា
