នៅប្រទេសវៀតណាម មានតម្រូវការលំនៅដ្ឋានសង្គមកិច្ច ក្នុងចំណោមប្រជាជនដែលមានចំណូលទាបនៅតាមតំបន់ទីក្រុង ប្រជុំជន និង កម្មករនៅក្នុងសួនឧស្សាហកម្ម ត្រូវគេប៉ាន់ស្មានថា មានតម្រូវការ ដល់ទៅជិត ៣០ម៉ឺនខ្នងផ្ទះ សម្រាប់រយៈពេល៥ឆ្នាំ ពីឆ្នាំ២០២១ ដល់ឆ្នាំ២០២៥ ។ បើទោះបី តម្រូវការមានខ្ពស់ក្ដី អ្នកអភិវឌ្ឍន៍ នៅតែរារែក ក្នុងការអនុវត្តគម្រោងលំនៅដ្ឋានសង្គមកិច្ច ដោយសារតែវាចំណេញតិចពេក ពិសេសត្រូវឆ្លងកាត់នីតិវិធីលំបាកស្មុគស្មាញច្រើន។
បើតាមសំណើក្រសួងសំណង់របស់វៀតណាម ដែលបានដាក់ជូនរដ្ឋាភិបាល និង ក្រសួងផែនការនិងវិនិយោគ កាលពីចុងខែតុលា កញ្ចប់ឥណទាន ដែលបានស្នើនោះរួមមាន កញ្ចប់ ឥណទានសម្រាប់ទូទាត់អត្រាការប្រាក់ និង កញ្ចប់ឥណទាន សម្រាប់ការផ្ដល់ហិរញ្ញប្បទានបន្ត ។
កញ្ចប់ឥណទានសម្រាប់ការផ្ដល់ហិរញ្ញប្បទានបន្ត គឺសម្រាប់គាំទ្រដល់ធនាគារពាណិជ្ជ ដើម្បីផ្ដល់កម្ចីដែលមានលក្ខណៈអនុគ្រោះដល់បុគ្គលិកកម្មករនៅក្នុងសួនឧស្សាហកម្ម និងដល់វិនិយោគិនអភិវឌ្ឍន៍គម្រោងលំនៅដ្ឋានសង្គមកិច្ច ព្រមទាំងគម្រោងនានាដែលសាងសង់ ទីស្នាក់នៅសម្រាប់ជួលឲ្យកម្មករ និយោជិតនៅក្នុងសួនឧស្សាហកម្មនៅវៀតណាម។អត្ថបទគួរអាន
ទៅថ្ងៃអនាគត នៅពេលដែលសាងសង់សួនឧស្សាហកម្ម អាជ្ញាធរត្រូវបែងចែកទុកដីសម្រាប់សាងសង់ទីស្នាក់អាស្រ័យ ជួលឲ្យកម្មករ និយោជិត ដោយតម្រូវឲ្យទុកផ្ទៃក្រឡាសម្រាប់កម្មករម្នាក់ៗយ៉ាងតិចបំផុត១០ម៉ែត្រការ៉េ ។ នេះបើតាមប្រភពព័ត៌មានវៀតណាម VN Express ។
សំណើខាងលើរបស់ក្រសួងសំណង់វៀតណាមបានស្នើឲ្យរដ្ឋាភិបាលផ្ដល់ការអនុគ្រោះជាពិសេស ដល់អ្នកអភិវឌ្ឍន៍សួនឧស្សាហកម្ម និងលំនៅដ្ឋានធូរថ្លៃ ដោយរួមមានដូចជា ការលើកលែងពន្ធ ការបញ្ចុះតម្លៃថ្លៃឈ្នួលប្រើប្រាស់ដី កាត់បន្ថយពន្ធលើតម្លៃបន្ថែម និង ពន្ធលើប្រាក់ចំណូលអាជីវកម្ម ព្រមទាំងផ្ដល់កម្ចីដែលមានភាពអនុគ្រោះផងដែរ។
បច្ចុប្បន្ន វៀតណាមមានគម្រោង លំនៅដ្ឋានសង្គមកិច្ច ២៦៦គម្រោង ដែលរួមមាន ផ្ទះអាផាតមិនផងដែរ ។ ក្រៅពីនេះ នៅសួនឧស្សាហកម្មចំនួន ១២១កន្លែង មានលំនៅដ្ឋានសម្រាប់ឲ្យកម្មករស្នាក់នៅ ហើយ១០០កន្លែងផ្សេងទៀត កំពុងសាងសង់ទីស្នាក់នៅឲ្យកម្មករនៅឡើយ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
