ទិន្នន័យផ្លូវការរបស់រដ្ឋាភិបាលវៀតណាមបង្ហាញថា ក្នុងចំណោមមជ្ឈមណ្ឌលឧស្សាហកម្ម អត្រាកម្មករបានកើនឡើងពី ៧ ម៉ឺននាក់ ទៅ ១៦ម៉ឺន ៤ ពាន់នាក់ នៅចន្លោះថ្ងៃទី ១ ដល់ថ្ងៃទី ៦ ខែតុលា ដែលចំនួននេះមានការកើនឡើងពីកំណើន ជាង២៤% ដល់ជិត៥៧%។
ទន្ទឹមនេះ អភិបាលរងទីក្រុងហូជីមិញ លោកស្រី ផាន ធីថាង បាននិយាយថា ក្នុងអំឡុងពេលបិទខ្ទប់រយៈពេលជាង ៤ ខែនេះ បានបង្កបញ្ហាប្រឈមជាច្រើនដល់អាជីវកម្មនៅទីក្រុងហូជីមិញ ដោយការបើកក្រុមហ៊ុនថ្មីៗបានធ្លាក់ចុះ ខណៈកំណើនសេដ្ឋកិច្ចនៅត្រីមាសទី ៣ ធ្លាក់ចុះពីរខ្ទង់បើធៀបនឹងរយៈពេលដូចគ្នាកាលពីឆ្នាំមុន។
ជាក់ស្ដែង ការនាំចេញស្បែកជើងរបស់វៀតណាមក្នុងខែកញ្ញាកន្លងទៅនេះ បានធ្លាក់ចុះជាង ៤៤% បើធៀបនឹងរយៈពេលដូចគ្នាកាលពីឆ្នាំមុន ដែលមានទឹកប្រាក់ ៧០០ លានដុល្លារ។ ខណៈការនាំចេញកាបូបក៏បានធ្លាក់ចុះ ៤៨ ភាគរយផងដែរ។អត្ថបទគួរអាន
ទោះយ៉ាងណាក៏ដោយ អភិបាលរងទីក្រុងហូជីមិញ បានអះអាងថា រដ្ឋាភិបាលកំពុងផ្តល់ការគាំទ្រដល់អាជីវកម្មរួមទាំងប្រាក់កម្ចីអតិប្បរមា ជាង៨ម៉ឺន៦ពាន់ដុល្លារ សម្រាប់ក្រុមហ៊ុនខ្នាតតូច និងមធ្យម នឹងផ្ដល់ជូនប្រមាណ ៤ ពាន់ដុល្លារសម្រាប់បុគ្គលជាមួយអត្រាការប្រាក់ទាប។ ទន្ទឹមនេះ ទីក្រុងហូជីមិញ ក៏បានស្នើសុំរដ្ឋាភិបាលផ្តល់ការបន្ធូរបន្ថយពន្ធសម្រាប់អាជីវកម្ម ព្រមទាំងអាជីវកម្មគ្រួសារដោយមិនចាំបាច់បង់ពន្ធណាមួយនៅត្រីមាសទី ៣ និងទី ៤ នៅឆ្នាំនេះផងដែរ។
គួរបញ្ជាក់ថា ទាក់ទងនឹងការដឹកជញ្ជូន ទីក្រុងហូជីមីញកំពុងធ្វើការជាមួយតំបន់ផ្សេងទៀតក្នុងការធានាការធ្វើដំណើរប្រកបដោយសុវត្ថិភាពហើយគេរំពឹងថា សេវាកម្មរថយន្តក្រុងទៅតាមបណ្ដាខេត្តអាចដំណើរការឡើងវិញនៅថ្ងៃទី ១ ខែវិច្ឆិកាប្រសិនបើស្ថានភាពជំងឺរាតត្បាតប្រសើរឡើង។ សូមជម្រាបថា ការចាប់ផ្តើមឡើងវិញនូវសកម្មភាពធ្វើដំណើរជាបន្តបន្ទាប់នេះ គឺដើម្បី ស្តារឡើងវិញ នូវឧស្សាហកម្មដែលរងការខូចខាតយ៉ាងធ្ងន់ធ្ងរពីវិបត្តិកូវីដ ១៩។
យ៉ាងណាមិញ ស្ថានភាពកូវីដក្នុងប្រទេសវៀតណាមពេលនេះមានការការថមថយហើយ ពោលគិតត្រឹមថ្ងៃទី ០៩ តុលា ករណីឆ្លងថ្មីមានប្រមាណជាង ៤ពាន់ ៥រយនាក់ ខណៈករណីស្លាប់ថ្មីមាន ១០៥នាក់ ដែលធ្វើឱ្យចំនួនឆ្លងសរុបកើនឡើងជាង ៨៣ម៉ឺននាក់ និងចំនួនអ្នកស្លាប់សរុបកើនប្រមាណ ២ម៉ឺននាក់៕អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
