ដំណើររឿងគឺយ៉ាងដូច្នេះ។ កាលពីឆ្នាំ២០១៥ អ្នកជំនួញជនជាតិជប៉ុនមួយរូបបានចូលទទួលទានអាហារនៅក្នុងភោជនីយដ្ឋានមួយ ក្នុងទីក្រុងហូជីមិញ ប្រទេសវៀតណាម ហើយបង់ប្រាក់ដោយប្រើប័ណ្ណឥណទាន (credit card)។ ប៉ុន្តែ ខណៈដែលអ្នកជំនួញរូបនោះឲ្យប័ណ្ណឥណទានទៅអ្នករត់តុដើម្បីទូទាតលុយ អ្នករត់តុបានលួចថតចម្លងព័ត៌មានលម្អិតអំពីប័ណ្ណឥណទាននោះ រួចហើយយកព័ត៌មានប័ណ្ណឥណទាននេះទៅប្រើប្រាស់ទិញទំនិញអនឡាញ។
នេះបើតាមការចុះផ្សាយរបស់សារព័ត៌មានអនឡាញរបស់វៀតណាម VN Express។
ការស៊ើបអង្កេតរកឃើញថា អ្នករត់តុឈ្មោះ Nguyen Hoang Duc Nha អាយុ ២៧ឆ្នាំ បានលួចប្រាក់ចំនួន ២៦.៤០០ដុល្លារ ពីគណនីធនាគាររបស់អតិថិជនជនជាតិជប៉ុន ដោយបុរសអ្នករត់តុរូបនេះបានយកព័ត៌មានលម្អិតអំពីប័ណ្ណឥណទានដែលរូបគេបានលួចថតចម្លងកាលពីឆ្នាំ២០១៥ ទៅប្រើប្រាស់ទិញទំនិញអនឡាញអស់រយៈពេលជាង ៥ខែ។
មួយភាគធំនៃលុយដែលលួចចាយពីគណនីធនាគាររបស់ភ្ញៀវជនជាតិជប៉ុនពីសំណាក់បុរសអ្នករត់តុ គឺចាយទៅលើការទិញសំបុត្រមើលកុន ទិញទូរស័ព្ទដៃ និងទិញហ្គេមអនឡាញ។
តើអ្នកបានអានអត្ថបទនេះ ឬនៅ?
បុរសជនជាតិជប៉ុនបានដឹងថា ខ្លួនចាប់ផ្ដើមបាត់លុយពីក្នុងគណនី នៅដើមឆ្នាំ២០១៦ ហើយក៏រាយការណ៍ទៅនគរបាលវៀតណាម។
ប្រទេសវៀតណាមបាននិងកំពុងព្យាយាមប្ដូរពីការចាយវាយជាសាច់ប្រាក់ទៅជាការចាយដោយប្រើប័ណ្ណឥណទាន (កាត) ក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែ ការចាយវាយដោយប្រើកាតនេះ មិនមែនសុទ្ធតែមានសុវត្ថិភាពគ្រប់ពេលនោះទេ។
កាលពីខែសីហា ឆ្នាំទៅមិញ ទេសចរជនជាតិអូស្ត្រាលីមួយរូប ត្រូវគេគិតថ្លៃអាហារមួយពេលអស់ដល់ទៅជាង ៣ម៉ឺនដុល្លារ សម្រាប់អាហារដែលអស់ថ្លៃមិនដល់ ១០០០ដុល្លារផង នៅក្នុងភោជនីយដ្ឋានមួយក្នុងទីក្រុងហូជីមិញ។ ការគិតថ្លៃបន្លំនេះ គឺក្រោមរូបភាពឆូតប័ណ្ណឥណទានរបស់អតិថិជនច្រើនដង ដោយយកលេសថាប្រព័ន្ធមានបញ្ហា រួចហើយដកលុយពីធនាគារ។ ប៉ុន្តែ ក្រោយការស៊ើបអង្កេត ម្ចាស់ហាងត្រូវបាននគរបាលចាប់ខ្លួន៕
