ឯកឧត្តមបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានប្រាប់ក្រុមការងារខេមបូណូមីសតាមប្រព័ន្ធតេឡេក្រាមថា នៅក្នុងដំណាក់កាលនេះ គឺជាស្ថានភាពដ៏លំបាកមួយ ដែលធ្វើឲ្យកំលាំងសេដ្ឋកិច្ចរបស់យើងកាន់តែថមថយទៅៗ។ តែយ៉ាងណា ឯកឧត្តមបណ្ឌិត ម៉ី កល្យាណនៅតាមបង្ហាញពីក្តីសង្ឃឹមថា មានកត្តាពីរ ដែលនឹងធ្វើឲ្យការចម្លងមេរោគមានការថយចុះវិញ។
ស្រដៀងគ្នានេះដែរ អ្នកជំនាញនៅផ្នែកវិស័យដឹកជញ្ជូនឯណេះវិញ ឧកញ៉ា ស៊ិន ចន្ធី ប្រធានសមាគមភ័ស្តុភារកម្មកម្ពុជា ក៏បានបង្ហាញពីការព្រួយបារម្ភផងដែរ ចំពោះវិស័យដឹកជញ្ជូន ដោយសារតែការបន្តអូសបន្លាយ នៃការរីករាលដាលនៃព្រឹត្តិការណ៍សហគមន៍នេះ ខណៈដែលសព្វថ្ងៃមានក្រុមហ៊ុនដឹកជញ្ជូនមួយចំនួនធំកំពុងតែជួបបញ្ហាលំបាកស្រាប់ទៅហើយនោះ។
អត្ថបទគួរអាន
ដោយឡែក ចំពោះ វិស័យកសិកម្មវិញ ត្រូវបានឧកញ៉ា ហ៊ុន ឡាក់ ប្រធានក្រុមប្រឹក្សាភិបាល នៃសហព័ន្ធស្រូវអង្ករកម្ពុជាបានបញ្ជាក់ថា សម្រាប់ការនាំចេញអង្ករមានការធ្លាក់ចុះខ្លះ តែផលិតកសិកម្មផ្សេងនៅតែមានភាពល្អប្រសើរដូចជាចេក និងស្វាយ ជាដើម។ ជាមួយគ្នានេះ ការនាំចេញស្វាយ ក្រោយពេលក្រសួងកសិកម្មបានពិភាក្សាគ្នាសម្រេចចុងក្រោយជាមួយភាគីចិនហើយនោះ លោករំពឹងថា ការនាំចេញស្វាយលែងមានឧបសគ្គទៀតហើយ។
សូមបញ្ជាក់ថា គិតត្រឹមរយៈពេលតែជិត១ខែប៉ុណ្ណោះ នៃការឆ្លងព្រឹត្តិការណ៍សហគមន៍២០កុម្ភៈចំនួនអ្នកឆ្លងក្នុងព្រឹត្តិការណ៍នេះសរុបមានជាង ៨០០នាក់ហើយ នៃចំនួនអ្នកឆ្លងសរុបជាង១ពាន់៣រយនាក់។ មន្ត្រីជាន់ខ្ពស់ក្រសួងសុខាភិបាលបានអះអាងថា ការឈានទៅបញ្ចប់ព្រឹត្តិការណ៍ឆ្លងសហគមន៍លើកនេះ អាចនឹងពិបាកធ្វើទៅបានណាស់ ប្រសិនបើពលរដ្ឋម្នាក់ៗហាក់មិនសូវខ្វាយខ្វល់ ធ្វេសប្រហែសក្នុងការការពារខ្លួន។
ដូច្នេះ សូមបងប្អូនប្រជាពលរដ្ឋទាំងអស់ ចូលរួមជាមួយរាជរដ្ឋាភិបាល ក៏ដូចជាក្រសួងសុខាភិបាល។ បើមិនចាំបាច់កុំចេញក្រៅផ្ទះ ហើយត្រូវអនុវត្តវិធានការបីកុំ បីការពារ គឺ ត្រូវពាក់ម៉ាស់ ឡាងដៃញឹកញាប់ និងរក្សាគម្លាតសុវត្ថិភាព និងកុំទៅកន្លែងមានមនុស្សច្រើនកកកុញ, កុំទៅកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក និងកុំប៉ពាល់គ្នា ចាប់ដៃ កៀកស្មា ឱបគ្នា នៅពេលជួបគ្នា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
