អ្នកជំនាញWHO៖«អ្នកនយោបាយកំពុងបំពុលបរិយាកាសក្នុងដំណើរការស្វែងរកប្រភពដើមកូវីដ-១៩»

លោក ម៉ៃ រ៉ាយអិន (Mike Ryan) មន្ត្រីជាន់ខ្ពស់ និងជាអ្នកជំនាញរបស់អង្គការសុខភាពពិភពលោក បានលើកឡើងថា៖ដំណើរការរុករកប្រភពដើមនៃកូវីដ១៩ទាំងមូល កំពុងត្រូវបានគេបំពុល ហើយលោក ចង់ឲ្យអ្នករាល់គ្នាបែងចែកឲ្យដាច់រវាងបញ្ហានយោបាយ និងបញ្ហាវិទ្យាសាស្ត្រ។

ការលើកឡើងដូចនេះ ធ្វើឡើងនៅប៉ុន្មានថ្ងៃបន្ទាប់ពីប្រធានាធិបតីអាមេរិក លោក ចូ បៃឌិន បានបញ្ជាឱ្យទីភ្នាក់ងារស៊ើបការណ៍សម្ងាត់របស់អាមេរិក តាមដានរកប្រភពដើមនៃមេរោគកូវីដ-១៩ដោយផ្ទាល់តែម្តង ហើយត្រូវរាយការណ៍មកកាន់លោកវិញក្នុងអំឡុងពេល ៩០ថ្ងៃ។

គេនៅចាំបានថា កាលពីចុងឆ្នាំ២០២០ អ្នកជំនាញនៃអង្គការសុខភាពពិភពលោកមួយក្រុមបានធ្វើដំណើរទៅក្រុងវូហានប្រទេសចិន ក្នុងបេសកម្មស្រាវជ្រាវរកប្រភពដើមនៃកូវីដ១៩។ ប៉ុន្តែ៤ខែក្រោយមក លទ្ធផលដែលគេបានរកឃើញចំបងជាងគេនោះ គឺប្រភពដើមនៃកូវីដ១៩ បានចម្លងចេះពីសត្វប្រចៀវមកកាន់មនុស្ស ហើយការលើកឡើងដែលថា កូវីដ១៩បានធ្លាយចេញពីមន្ទីរពិសោធន៍នៅក្រុងវូហាន ត្រូវបានអ្នកស្រាវជ្រាវចាត់ទុកថា ជាមូលហេតុដែលពិបាកនឹងទៅរួចមែនទែន។

យ៉ាងណាមិញ ភាពចម្រូងចម្រាសជុំវិញការសង្ស័យថា កូវីដ១៩បានលេចធ្លាយចេញពីមន្ទីរពិសោធន៍នៅក្រុងវូហាន នៅតែសេណារីយ៉ូមួយដែលត្រូវបានលើកយកមកជជែកពិភាក្សាក្នុងសហគមន៍អន្តរជាតិ និងជាពិសេសរវាងចិន និងអាមេរិកតែម្តង។

ស្ថានទូតចិននៅក្នុងក្រុងវ៉ាស៊ីតោន សហរដ្ឋអាមេរិកបានធ្លាប់បានសំដែងការមិនពេញចិត្តថា ការកកូរកកាយរឿងប្រភពដើមដំបូងនៃជំងឺកូវីដ-១៩ គឺគ្រាន់តែជាហេតុផលនយោបាយ ដែលធ្វើឲ្យរាំងស្ទះដល់ដំណើរស៊ើបអង្កេតបន្ថែម និងកិច្ចខិតខំប្រឹងប្រែងជាសកល ដើម្បីប្រយុទ្ធប្រឆាំងនឹងជំងឺរាតត្បាតសកលមួយនេះតែប៉ុណ្ណោះ។

សូមបញ្ជាក់ថា នៅក្នុងកិច្ចប្រជុំមហាសន្និបាតលើកទី៧៤របស់អង្គការសុខភាពពិភពលោក កាលពីដើមសប្តាហ៍មុន មានប្រទេសជាច្រើន ក្នុងនោះមានអាមេរិក អូស្រា្តលី ជប៉ុន និង ព័រទុយហ្កាល់ជាដើម បានអំពាវនាវឲ្យ WHO បន្តធ្វើការសិក្សាស្រាវជ្រាវជុំទីពីរឲ្យបានស៊ីជម្រៅថែមទៀត ដើម្បីស្វែងរកប្រភពដើមដំបូងរបស់ជំងឺកូវីដ-១៩៕