លោក ផាម ញ៉ាត់វង់ (Pham Nhat Vuong) ប្រធានក្រុមប្រឹក្សាភិបាលក្រុមហ៊ុន Vingroup បាននិយាយនៅក្នុងកិច្ចប្រជុំភាគហ៊ុនិក កាលពីសប្ដាហ៍មុនថា "នេះគឺជាការធ្វើតេស្តមួយ។ ប្រសិនបើយើងឈ្នះលើទីផ្សារដ៏លំបាកបំផុតមួយនេះ យើងអាចចូលទៅកាន់ទីផ្សារផ្សេងទៀតបានយ៉ាងងាយស្រួល។ យើងត្រូវតែដាក់ចេញនូវគោលដៅឲ្យខ្ពស់" ។
ក្រុមហ៊ុនបុត្រសម្ព័ន្ធរបស់ Vingroup ដែលគ្រោងនឹងនាំចេញផលិតផលរបស់ខ្លួនទៅលក់នៅទីផ្សារសហរដ្ឋអាមេរិក រួមមាន ក្រុមហ៊ុន VinFast ដែលផលិតរថយន្ត និងក្រុមហ៊ុន VinSmart ជាក្រុមហ៊ុនផលិតទូរស័ព្ទស្មាតហ្វូន។ ក្រុមហ៊ុនបុត្រសម្ព័ន្ធទាំងពីរនេះ គឺជាធុរកិច្ចស្នូលថ្មីរបស់ក្រុមហ៊ុនមេ Vingroup ។
អត្ថបទទាក់ទង
ក្រុមហ៊ុន VinFast កាលពីសប្ដាហ៍មុន បានធ្វើតេស្តសាកល្បងម៉ូដែលឡានអាគុយលើកដំបូងបង្អស់របស់ខ្លួន នៅទីក្រុងហាណូយ ដើម្បីត្រៀមលក្ខណៈសម្រាប់ការយកទៅដាក់តាំងពិព័រណ៍រថយន្តនៅទីក្រុង Los Angeles សហរដ្ឋអាមេរិក នៅខែវិច្ឆិកា ឆ្នាំ២០២០នេះ។ ទោះបីក្រុមហ៊ុនមិនបានបង្ហាញតួលេខផ្លូវការក្ដី ប៉ុន្តែ ទិន្នន័យផ្លូវការបង្ហាញថា នៅត្រីមាសទីមួយឆ្នាំ២០២០នេះ ក្រុមហ៊ុន VinFast លក់រថយន្តបានជាង ៥១០០គ្រឿង ដោយជាប់ចំណាត់ថ្នាក់លេខ៥ នៅក្នុងការលក់រថយន្តសរុបនៅវៀតណាម ។
ចំណែកឯក្រុមហ៊ុន VinSmart វិញ បានលក់ទូរស័ព្ទស្មាតហ្វូន បានចំនួន ១,២លានគ្រឿង ក្នុងរយៈពេល ១៧ខែ ដោយដណ្ដើមបានចំណាត់ថ្នាក់លេខ ៣ នៅក្នុងចំណែកទីផ្សារទូរស័ព្ទនៅវៀតណាម បន្ទាប់ពីទូរស័ព្ទម៉ាក Samsung របស់កូរ៉េខាងត្បូង និងទូរស័ព្ទម៉ាក Oppo របស់ចិន។
ប៉ុន្តែ ទោះយ៉ាងនេះក្ដី លោក ផាម ញ៉ាត់វង់ បានព្រមានថា គេបានរំពឹងទុកថា ក្រុមហ៊ុនថ្មីទាំងពីរនេះអាចនឹងរកស៊ីខាតពី ៣ ទៅ ៥ឆ្នាំ។ លោក វង់ និយាយថា "សម្រាប់រយៈពេលជាច្រើនឆ្នាំខាងមុខនេះ ទិសដៅរបស់យើងមិនមែនជាប្រាក់ចំណេញទេ ប៉ុន្តែ យើងធ្វើយ៉ាងណាគ្រប់គ្រងទីផ្សារឲ្យបាន" ។
ក្រុមហ៊ុន Vingroup មានចំណែកទីផ្សារសរុបប្រមាណ ១៤ពាន់លានដុល្លារអាមេរិក ប៉ុន្តែ ក្រុមហ៊ុនក៏កំពុងប្រឈមនឹងផលប៉ះពាល់ពីជំងឺកូវីដ១៩ផងដែរ។ ក្រុមហ៊ុនបានប្រកាសពីពេលថ្មីៗនេះថា ខ្លួននឹងរឹតត្បិតការចំណាយ និងការវិនិយោគនៅឆ្នាំនេះ ដើម្បីកាត់បន្ថយចំណាយប្រតិបត្តិការ និងផ្ដោតសំខាន់ទៅលើការអភិវឌ្ឍធុរកិច្ចដែលមានស្រាប់របស់ខ្លួន។
នៅឆ្នាំនេះ ក្រុមហ៊ុនគ្រោងសម្រេចបានចំណូល ៦,២ពាន់លានដុល្លារអាមេរិក ដែលនឹងកើនឡើង ១២% បើធៀបនឹងឆ្នាំ២០១៩ រួមទាំងគ្រោងសម្រេចឲ្យបាននូវប្រាក់ចំណេញ ២១៤លានដុល្លារអាមេរិក (បន្ទាប់ពីបង់ពន្ធរួច) ដែលថយចុះ ៣៥%៕
