ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានគូសបញ្ជាក់ថា ស្របពេលដែលប្រទេសសហរដ្ឋអាម៉េរិក និងចិន កើតមានវិបត្តិសង្រ្គាមពាណិជ្ជកម្ម ប្រទេសកម្ពុជា ហាក់ដូចជា ចាប់បានឱកាសច្រើន ក្នុងការនាំចេញទំនិញមួយចំនួនទៅកាន់ទីផ្សារអន្តរជាតិ។ ឧកញ៉ា លឹម ហេង បានកត់សម្គាល់ឃើញថា ការវិនិយោគក្នុងឧស្សហាកម្មផលិតគ្រឿងអគ្គិសនី និងសម្ភារៈអគ្គិសនី នៅក្នុងប្រទេសកម្ពុជា មានភាពរីកចម្រើន ជាពិសេសការនាំចេញគ្រឿងអគ្គិសនី និងសម្ភារៈអគ្គិសនី ទៅកាន់ទីផ្សារសហរដ្ឋអាម៉េរិក សហគមន៍អឺរ៉ុប និងបណ្ដាទីផ្សារផ្សេងៗ ក៏បានកើនឡើង ផងដែរ។ ម្យ៉ាងវិញទៀត ការលើកលែងការយកពន្ធរបស់អាម៉េរិក លើការនាំចូលបន្ទះសូឡាពីកម្ពុជា ក៏ជាកត្តា ធ្វើឲ្យការនាំចេញគ្រឿងអគ្គិសនី និងសម្ភារៈអគ្គិសនី កើនឡើងដែរ។
អត្ថបទគួរអាន
ឯកឧត្តម វស្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ថា វិស័យកម្មន្តសាល ហាក់មានភាពរីកចម្រើន និងរឹងមាំ បើទោះបីជា កម្ពុជា ជួបប្រទះនូវវិបត្តិកូវីដ១៩ ក៏ដោយ ដែលជាការរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចនៅឆ្នាំ២០២២។ ឯកឧត្តមបានកត់សម្គាល់ឃើញថា ការផលិតនិងការនាំចេញផ្នែកឧស្សាហកម្មកម្មន្តសាលមិនមែនកាត់ដេរ ដូចជា កង់ បន្ទះសូឡា ខ្សែអុបទិច និងបន្ទះឈីប ជាដើម សុទ្ធតែមានកំណើនខ្លាំង នៅឆ្នាំ២០២២ លើកលែងតែការនាំចេញផលិតផលកាត់ដេរ ប៉ុណ្ណោះ។ ខណៈក្រុមវិនិយោគថ្មីៗ ដែលមានបំណងចូលមកវិនិយោគនៅក្នុងប្រទេសកម្ពុជា ក៏មាននិន្នាការទៅលើវិស័យកម្មន្តសាល ផងដែរ។
សូមបញ្ជាក់ថា នៅក្នុងរយៈពេលពេញ ១ឆ្នាំ ២០២២ កម្ពុជា បាននាំចេញទំនិញសំខាន់ៗ ទៅកាន់ទីផ្សារអន្តរជាតិ ក្នុងទំហំទឹកប្រាក់សរុបជាង ២២ពាន់លានដុល្លារ ដែលមានការកើនឡើង ១៦% បើធៀបទៅនឹងឆ្នាំ២០២១។ ក្នុងនោះ ចំណូលពីការនាំចេញគ្រឿងអគ្គិសនី និងសម្ភារៈអគ្គិសនី មានចំនួនច្រើនជាងគេ រហូតជិត២ពាន់លានដុល្លារ។ បន្ទាប់មកការនាំចេញផលិតផលកាត់ដេរ សម្លៀកបំពាក់ ស្បែកជើង និងសម្ភារៈធ្វើដំណើរ មានទឹកប្រាក់សរុបជាង ១២ពាន់លានដុល្លារ។ រីឯ ការនាំចេញមុខទំនិញផ្សេងៗ មានជាង ៤ពាន់លានដុល្លារ។ នេះបើយោងតាមរបាយការណ៍របស់ក្រសួងពាណិជ្ជកម្មកម្ពុជា៕
