នៅក្នុងសន្និសីទសារព័ត៌មាន ស្ដីពី «សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងឧស្សាហកម្ម វិទ្យាសាស្រ្តបច្ចេកវិទ្យា និងនវានុវត្តន៍» នៅថ្ងៃទី ១១ ខែសីហា ឆ្នាំ២០២២ ឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ បានបញ្ជាក់ឲ្យដឹងថា គោលដៅរបស់កម្ពុជាគឺនៅក្នុងឆ្នាំ ២០២៥ ធ្វើយ៉ាងណាឲ្យវិស័យឧស្សាហកម្ម ត្រូវចូលរួមចំណែកក្នុងផលិតផលក្នុងស្រុកសរុប (GDP) ឲ្យបាន ៣០% តែគិតត្រឹមតែឆ្នាំ ២០១៧ ប៉ុណ្ណោះ វិស័យឧស្សាហកម្ម បានចូលរួមចំណែកនៅក្នុង GDP របស់កម្ពុជា រហូតទៅដល់ ៣០,៩%។ ក្នុងន័យនេះ វិស័យឧស្សាហកម្មបានរីកចម្រើនដើរមុនគោលដៅកំណត់រហូតដល់ ៨ឆ្នាំ ហើយតាមការប្រមើលមើល នៅក្នុងឆ្នាំ ២០២២នេះ អាចមានកំណើនពីវិស័យឧស្សាហកម្មក្នុងការរួមចំណែកក្នុង GDP របស់កម្ពុជា ដល់ទៅប្រមាណ៤០%ឯណោះ ខណៈនៅឆ្នាំ២០២១កន្លងទៅ មានការរួមចំណែក ៣៨,៧% ។
លោក ហេង សុខគង់ បញ្ជាក់បន្ថែមថា នាពេលបច្ចុប្បន្នរោងចក្រឧស្សាហកម្មនៅកម្ពុជា មានចំនួន ជិត២ពាន់រោងចក្រ មានទុនវិនិយោគជាង ១៥ពាន់លានដុល្លា ដោយបានបង្កើតការងាររហូតដល់ជាង ១លាននាក់។ លោកបន្ថែមថា គិតត្រឹមចុងខែកក្កដា ឆ្នាំ២០២២ មានរោងចក្របើកថ្មី ចំនួន១១២ រោងចក្រ បង្កើតការងារបន្ថែមចំនួនជាង ៧ម៉ឺន៦ពាន់នាក់ មានដើមទុនវិនិយោគចំនួនជាង ១ពាន់លានដុល្លារ។
អត្ថបទគួរអាន
ចំពោះផលិតផលដែលនាំចេញពីរោងចក្រទាំងនោះ ដោយគិតក្នុងរយៈពេលត្រឹម ៦ខែឆ្នាំ ២០២២នេះ មានទឹកប្រាក់ប្រមាណជាង ៧ពាន់៥រយលានដុល្លារ។ ក្នុងនោះ ការលក់នៅក្នុងស្រុកបានចំនួនជាង ២ពាន់៣រយលានដុល្លារអាមេរិក និងនៅក្រៅប្រទេសបានចំនួនជាង ៥ពាន់២រយលានដុល្លារអាមេរិក ដែលបង្ហាញឲ្យឃើញពីកំណើនខ្ពស់នៅក្នុង GDP របស់កម្ពុជា។
ជាមួយគ្នានេះ លោក ឈា ឡាយហ៊ី ប្រធាននាយកដ្ឋានសហគ្រាសធនតូច និងមធ្យម បានបញ្ជាក់ថា តាមការវាយតម្លៃស្របតាមរបាយការណ៍របស់ក្រសួងហិរញ្ញវត្ថុបង្ហាញថាក្នុងឆ្នាំ ២០២១ វិស័យឧស្សាហកម្មបានចូលរួមក្នុងកំណើនសេដ្ឋកិច្ចចំនួន ៨,៦% និងរំពឹងថា នៅចុងឆ្នាំ២០២២ និងមានការកើនឡើងដល់ ៩% ខណៈនៅក្នុងឆ្នាំ២០២៣ នឹងកើនដល់ ៩,២% បើទោះបីជាកម្ពុជាជួបនៅវិបត្តិកូវីដ១៩ និងការជះឥទ្ធិពលពីបញ្ហាភូមសាស្រ្តនយោបាយក្នុងតំបន់ និងអន្តរជាតិក៏ដោយ៕
