កាលពីមុនទីភ្នាក់ងាររ៉យទ័របានរាយការណ៍ពីកិច្ចព្រមព្រៀងទិញធ្យូងថ្មរបស់ឥណ្ឌាដ៏ធំមួយដែលពាក់ព័ន្ធនឹងការប្រើប្រាស់ប្រាក់យ័នរបស់ចិន ខណៈទិន្នន័យរបស់មន្ត្រីគយបានគូសបញ្ជាក់ច្បាស់ពីរបៀបដែលការទូទាត់ថ្លៃធ្យូងថ្ម មិនមែនជាប្រាក់ដុល្លារ កំពុងក្លាយជារឿងធម្មតាកាន់តែខ្លាំងឡើងៗ រវាងឥណ្ឌានិងរុស្ស៊ី។
ឥណ្ឌាបានបង្កើនការទិញប្រេង និងធ្យូងថ្មពីរុស្ស៊ីយ៉ាងខ្លាំងក្លាចាប់តាំងពីសង្គ្រាមនៅអ៊ុយក្រែនបានចាប់ផ្តើមផ្ទុះឡើងកាលពីខែកុម្ភៈ។ ទង្វើនេះបានជួយឱ្យទីក្រុងម៉ូស្គូគេចផុតពីផលប៉ះពាល់នៃទណ្ឌកម្មរបស់បស្ចិមលោក និងធ្វើឱ្យទីក្រុងញូវដែលីទទួលបានវត្ថុធាតុដើមជាមួយការបញ្ចុះតម្លៃយ៉ាងច្រើនពីរុស្ស៊ី បើប្រៀបធៀបទៅនឹងការផ្គត់ផ្គង់ពីប្រទេសដទៃទៀត។
ប្រទេសរុស្ស៊ីបានក្លាយជាអ្នកផ្គត់ផ្គង់ធ្យូងថ្មធំជាងគេទី៣របស់ឥណ្ឌានៅក្នុងខែកក្កដា ដោយបានបង្កើនការនាំចូលធ្យូងថ្មរហូតដល់ជាងមួយភាគប្រាំ បើធៀបនឹងខែមិថុនា ពោលគឺបានឡើងខ្លាំងបំផុតរហូតដល់ជាង ២លានតោនឯណោះ។
អត្ថបទគួរអាន
នៅក្នុងខែមិថុនា ក្រុមអ្នកទិញធ្យូងថ្មនៅឥណ្ឌាបានចំណាយប្រាក់ទិញធ្យូងថ្មពីរុស្ស៊ីយ៉ាងហោចណាស់ជាង៧៤ម៉ឺនតោន ដោយប្រើរូបិយប័ណ្ណផ្សេងពីប្រាក់ដុល្លារអាមេរិក ដែលវាស្មើនឹង ៤៤% នៃការនាំចូលសរុបពីរុស្ស៊ីដែលមានចំនួន ១លាន៧សែនតោននៅក្នុងខែនោះ។ នេះបើតាមសេចក្តីសង្ខេបនៃកិច្ចព្រមព្រៀងដែលចងក្រងដោយប្រភពពាណិជ្ជកម្ម មានមូលដ្ឋាននៅប្រទេសឥណ្ឌាដោយប្រើឯកសារគយ និងបានចែករំលែកឱ្យ Reuters បានដឹងពីបញ្ហានេះ។
ជាមួយគ្នានោះដែរ ក្រុមហ៊ុនផលិតដែក និងផលិតស៊ីម៉ងត៍របស់ឥណ្ឌាបានទិញធ្យូងថ្មពីរុស្ស៊ីដោយប្រើប្រាស់រូបិយបណ្ណឌាហាមរបស់ប្រទេសអេមីរ៉ាតអារ៉ាប់រួម ប្រាក់ដុល្លារហុងកុង ប្រាក់យន់របស់ចិន និងប្រាក់អឺរ៉ូក្នុងប៉ុន្មានសប្តាហ៍ថ្មីៗនេះ។ នេះបើតាមឯកសារគយដែលត្រូវបានផ្សាយដោយ Reuters។
ប្រទេសឥណ្ឌាបានប្រើប្រាក់យន់របស់ចិនចំនួន ៣១% នៃការទូទាត់មិនមែនជាប្រាក់ដុល្លាររបស់អាមេរិក ដើម្បីទិញធ្យូងថ្មពីរុស្ស៊ីក្នុងខែមិថុនា និងប្រើប្រាក់ដុល្លារហុងកុងចំនួន ២៨% ហើយទិន្នន័យពីប្រភពពាណិជ្ជកម្មបានបង្ហាញថា ប្រាក់អឺរ៉ូរបស់តំបន់អឺរ៉ុបត្រូវបានប្រើនៅក្រោមកម្រិត១ភាគ៤ ចំណែកឯប្រាក់ឌាហាមរបស់អារ៉ាប់រួមត្រូវបានប្រើប្រហែល១ភាគ៥នៃការទូរទាត់ថ្លៃធ្យូងថ្មពីប្រទេសរុស្ស៊ី៕
អត្ថបទ៖ សុខ ជា
