ប្រជាពលរដ្ឋ ពិសេសអ្នកនិយមប្រើរថយន្តម៉ាកហ្វតរំពឹងថា តាមរយៈរោងច្រកនេះ វានឹងជួយធ្វើឲ្យតម្លៃរថយន្តហ្វតនៅកម្ពុជានឹងអាចមានតម្លៃកាន់តែសមរម្យជាងមុនសម្រាប់អ្នកប្រើប្រាស់។ ពាក់ព័ន្ធបញ្ហានេះថ្នាក់ដឹកនាំ RMA Cambodia បានគូសបញ្ជាក់ថា តម្លៃរថយន្តហ្វតដែលដំឡើងនៅកម្ពុជាអាចធូរថ្លៃជាង ឬប្រហាក់ប្រហែលតម្លៃរថយន្តនាំចូល គឺវាអាស្រ័យលើយន្តការពន្ធរបស់រាជរដ្ឋាភិបាល។ យ៉ាងណាក៏ដោយចុះ បើតាមអ្នកជំនាញ បានគូសបញ្ជាក់ថា តម្លៃរថយន្តដំឡើងនៅកម្ពុជា ទំនងជាមិនអាចធូរថ្លៃជាងរថយន្តដែលដំឡើងនៅប្រទេសក្បែរខាងនោះទេ។ តើបញ្ហានេះបណ្តាលមកពីអ្វី?
ឯកឧត្តមបណ្ឌិត តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជាបានគូសបញ្ជាក់ថា ទីផ្សាររថយន្តថ្មីនៅកម្ពុជានឹងមានភាពល្អប្រសើរជាងមុន ប្រសិនបើក្រុមហ៊ុនផ្គុំ និងដំឡើងរថយន្តថ្មីៗនៅក្នុងស្រុកទទួលបានការជួយជ្រោមជ្រែង និងបន្ធូរបន្ថយពន្ធពីរាជរដ្ឋាភិបាល។ ជាមួយគ្នានេះ ឯកឧត្តម ជឿជាក់ថា បើគ្មានការជួយបន្ធូរបន្ថយពន្ធទេនោះតម្លៃរថយន្តដែលដំឡើងនៅកម្ពុជា នៅតែមានតម្លៃខ្ពស់ដដែលបើធៀបនឹងតម្លៃរថយន្តដែលដំឡើងនៅប្រទេសក្បែរដូចជាថៃ និងវៀតណាមជាដើម។ ខ្ពស់ជាងក៏ដោយសាររោងចក្រនៅកម្ពុជាត្រូវនាំចូលគ្រឿងបង្គុំសំខាន់ៗមួយចំនួនពីប្រទេសដទៃដោយឆ្លងកាត់របាំងពន្ធ ដើម្បីយកមកផ្គុំ និងដំឡើង ខុសពីថៃ និងវៀតណាម ដែលគេមានរោងចក្រផលិតគ្រឿងបង្គុំ និងបន្លាស់ស្រាប់។
ឯកឧត្តមបណ្ឌិត តាន់ មុនីវណ្ណ បានគូសបញ្ជាក់ទៀតថា រាជរដ្ឋាភិបាលទំនងជាមិនទាន់អាចបន្ធូរបន្ថយពន្ធឲ្យក្រុមហ៊ុនផ្គុំ និងដំឡើងរថយន្តហ្វតភ្លាមៗនោះទេ ដ្បិតវាអាចធ្វើឲ្យប៉ះពាល់ដល់ការប្រកួតប្រជែង និងក្រុមហ៊ុននាំចូលរថយន្តថ្មីដទៃទៀត ដែលមិនទាន់មានលទ្ធភាពក្នុងការបង្កើតរោងចក្រផ្គុំ និងដំឡើងរថយន្តដោយខ្លួនឯងនៅកម្ពុជា។ ទោះយ៉ាងណា ឯកឧត្តម ជឿជាក់ថា រាជរដ្ឋាភិបាលនឹងមានការអនុគ្រោះចំពោះក្រុមហ៊ុន ដែលវិនិយោគលើការផ្គុំ និងដំឡើងរថយន្តថ្មីនេះនៅពេលណាមួយនាថ្ងៃអនាគត។
អត្ថបទគួរអាន
ជាមួយគ្នានេះ លោកបណ្ឌិត គី សិរីវឌ្ឍ អ្នកស្រាវជ្រាវសេដ្ឋកិច្ច និងជាប្រធានមជ្ឈមណ្ឌលសិក្សាចិន នៃរាជបណ្ឌិតសភាកម្ពុជាយល់ឃើញថា កត្តាដែលធ្វើឲ្យតម្លៃរថយន្តថ្មីដំឡើងនៅកម្ពុជានៅតែមានខ្ពស់ជាងតម្លៃរថយន្តដំឡើងនៅថៃ និងវៀតណាម គឺដោយសារកម្ពុជាពុំទាន់មានរោងចក្រផលិតគ្រឿងបង្គុំរថយន្តគ្រប់គ្រាន់ ដែលទាមទារឲ្យនាំចូលពីប្រទេសដទៃ។ មួយវិញទៀត ដោយសាររាជរដ្ឋាភិបាលពុំទាន់មានយន្តការលើកលែងពន្ធ ដែលធ្វើឲ្យការនាំចូលគ្រឿងបង្គុំមានតម្លៃខ្ពស់ ហើយការមិនបញ្ចុះតម្លៃពីក្រុមហ៊ុនអ្នកផលិត ក៏ជាមូលហេតុមួយផងដែរ។
ទន្ទឹមនឹងនេះលោក ងន សាំង នាយកប្រតិបត្តិក្រុមហ៊ុន RMA Cambodia ដែលជាក្រុមហ៊ុនមេ នាំចូលរថយន្តម៉ាក Ford ផ្តាច់មុខមកកម្ពុជាបានបញ្ជាក់ប្រាប់ខេមបូណូមីសកាលពីពេលថ្មីៗថាតម្លៃរថយន្ត Ford ដែលដំឡើងនៅកម្ពុជាអាចនឹងមានភាពល្អប្រសើរជាងរថយន្តនាំចូល ប្រសិនបើមានការជួយសម្របសម្រួល និងជួយជ្រោមជ្រែងផ្នែកពន្ធពីរាជរដ្ឋាភិបាល។ នាពិធីសម្ពោធដាក់ឲ្យដំណើរការរោងចក្រផ្គុំ និងដំឡើងរថយន្ត Ford នៅខេត្តពោធិ៍សាត់កាលពីថ្ងៃតី១៦ ខែមិថុនា ឆ្នាំ២០២២ ថ្នាក់ដឹកនាំរូបនេះរំពឹងថា នៅឆ្នាំ២០២២ នេះ ក្រុមហ៊ុនរបស់លោកនឹងអាចផលិតរថយន្តបានចន្លោះពី១ពាន់ទៅ១ពាន់៥រយគ្រឿង។
សូមបញ្ជាក់ថា ១ថ្ងៃក្រោយការសម្ពោធដាក់ឲ្យដំណើរការរោងចក្រដំឡើងរថយន្ដហ្វត ក្រុមប្រឹក្សាភិបាលអភិវឌ្ឍន៍កម្ពុជាបានអនុម័តគម្រោងវិនិយោគក្រុមហ៊ុន GTV MOTOR CO., LTD. បង្កើតរោងចក្រដំឡើងរថយន្តថ្មីមួយទៀតនៅស្រុកគងពិសី ខេត្តកំពង់ស្ពឺ ដែលមានទុនវិនិយោគប្រមាណ១៥,៦លានដុល្លារ និងអាចបង្កើតឱកាសការងារបានចំនួន៧៣៨កន្លែង។ បន្ថែមលើនេះកាលពីថ្ងៃទី១៧ កុម្ភៈ CDC ក៏បានអនុម័តលើគម្រោងបង្កើតរោងចក្រផ្គុំ និងដំឡើងរថយន្តអ៊ីស៊ូហ្ស៊ុរបស់ក្រុមហ៊ុន K (CAMBODIA) CO., LTD ជាមួយទុនវិនិយោគជាង៧លានដុល្លារ និងផ្តល់ការងារ១១៦កន្លែងនៅស្រុកសំរោងទង ខេត្តកំពង់ស្ពឺផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
