ការហ៊ានចោទប្រកាន់ចំៗបែបនេះ ត្រូវបានអាជ្ញាធរក្រុងប៉េកាំងពន្យល់ថា ស្ត្រីដែលផ្ទុកអូមីក្រុងនោះមិនធ្លាប់មានប្រវត្តិចាកចេញពីទីក្រុងប៉េកាំងនោះទេនៅមួយរយៈចុងក្រោយ ហើយរូបនាងត្រូវបានគេរកឃើញថា វិជ្ជមានអូមីក្រុង នៅក្រោយពេលទទួលបានសំបុត្រមួយច្បាប់ពីប្រទេសកាណាដា។ ម្យ៉ាងវិញទៀតស្ត្រីដដែលនោះ ពុំធ្លាប់បានជួបទាក់ទងនឹងនរណាម្នាក់ ដែលមកពីក្រៅប្រទេសនោះដែរ។
ក្រោយការប្រកាសទាំងនេះ មន្ត្រីជំនាញសុខាភិបាលចិនបានបន្តអំពាវនាវឲ្យពលរដ្ឋបង្កើនការប្រុងប្រយ័ត្នពេលទទួលសំបុត្រ ដែលផ្ញើពីបរទេស ហើយប្រសិនបើជាសំបុត្រ ឬឯកសារចាំបាច់ អាជ្ញាធរបានទទូចឲ្យពលរដ្ឋពាក់ម៉ាស់ និងស្រោមដៃមុនពេលចាប់កាន់ ឬបើកសំបុត្រនោះ។ ទន្ទឹមនេះ អាជ្ញាធរបានប្តេជ្ញាថា នឹងបង្កើនការបាញ់ថ្នាំសម្លាប់មេរោគលើសំបុត្រមកពីបរទេស នៅតាមប្រៃសណីយ៍ទាំងអស់។ នេះបើតាមការចុះផ្សាយដោយសារព័ត៌មានរ៉យទ័រ។
គួរជម្រាបថា សំបុត្រដែលបានផ្ញើរចេញពីប្រទេសកាណាដានោះ មិនបានផ្ញើរត្រង់ពីកាណាដាមកចិនតែម្តងនោះទេ វាបានឆ្លងកាត់ប្រទេស និងមួយដែនដីផ្សេងទៀត រួមមានសហរដ្ឋអាមេរិក និងទីក្រុងហុងកុងផងដែរ មុននឹងមកដល់ប្រទេសចិននៅថ្ងៃទី១០ខែមករា។ យ៉ាងណាមិញ មន្ត្រីជំនាញនៃប្រៃសណីយ៍របស់ចិនបានអះអាងថា គេពិតជាបានរកឃើញកូវីដ១៩អូមីក្រុងនៅលើស្រោមសំបុត្រ និងនៅក្នុងសំបុត្រពិតមែន។
អត្ថបទគួរអាន
មិនយូរប៉ុន្មានក្រោយការចោទប្រកាន់ខាងលើពីក្រុងប៉េកាំង រដ្ឋមន្ត្រីសុខាភិបាលកាណាដា បានចេញមកនិយាយថា ការចោទប្រកាន់របស់ប្រទេសចិនអំពីករណីអូមីក្រុងដែលរកឃើញនៅទីក្រុងប៉េកាំង មានប្រភពចេញពីប្រទេសកាណាដានោះ គឺជាការចោទប្រកាន់មួយ ដែលគ្មានលក្ខណៈវិទ្យាសាស្ត្រទាល់តែសោះ។ ភាគីកាណាដាពន្យល់ថា វាគ្មានហេតុផលណា ដែលអាចឲ្យកូវីដ១៩រស់នៅលើផ្ទៃរបស់សំបុត្រ ដែលត្រូវបានគេដឹកជញ្ជូនអស់ពេលជាច្រើនថ្ងៃ ឆ្លងកាត់ស្ទើរពាក់កណ្តាលពិភពលោកហើយនោះទេ។ នេះបើតាមការចុះផ្សាយដោយសារព័ត៌មានក្នុងស្រុកកាណាដា CBC។
គួរកត់សម្គាល់ថា ការចោទប្រកាន់ពីទីក្រុងប៉េកាំងមកលើទីក្រុងអូតាវ៉ា ដូចនេះធ្វើឡើង ស្របពេលទំនាក់ទំនងរវាងប្រទេសទាំងពីរមើលទៅហាក់មិនសូវជាល្អូកល្អិននឹងគ្នាប៉ុន្មានទេ ពិសេសនៅមួយមួយរយៈពេលចុងក្រោយ។ ថ្មីៗនេះ កាណាដានិងកោះតៃវ៉ាន់ ទើបបាននិយាយព្រមព្រៀងគ្នាពីការចាប់ផ្តើមចរចា លើកិច្ចព្រមព្រៀង វិនិយោគទ្វេភាគីថ្មីមួយ ក្នុងពេលឆាប់ៗនេះ។ ការផ្តើមពិភាក្សាពីកិច្ចព្រមព្រៀងវិនិយោគរនេះ បានបង្ហាញពីការខិតទៅជិតគ្នាកាន់តែខ្លាំងរវាងភាគីទាំងពីរ។ ដោយឡែកគេនៅចាំបានថា កាលពីចុងខែធ្នូឆ្នាំ២០២១ មេដឹកនាំកាណាដាបានជំរុញឲ្យប្រទេសសម្ព័ន្ធមិត្តរួបរួមសាមគ្គីគ្នាឲ្យកាន់តែខ្លាំងដើម្បីប្រឆាំងទប់ទល់នឹងទីក្រុងប៉េកាំងថែមទៀតផង៕
